A Lam Wu Dang Bum Poi Galoi Kaw Na Galaw Hpang Ai Kun?

San: Anhte catholic hpung masha ni U dang shagrau poi hpe galoi kaw na galaw hpang ai wa ai kun? bai n na U dang shagrau poi hpe n ga hkritstan hpung masha ni hpa na n galaw ma ai kun ? Bai n na A lam bum na u dang shagrau poi hpe galoi kaw na galaw hpang wa ai lam hpe chyeju hte naw htai ya rit wa jau. Waimaw jau ginwang jamga mare kaw nga n na ya ten miwa mung htingshung kaw du nga ai Easter Dashi hkawn ra a gasan hpe htai ya na nngai.

• Wudang shagrau poi nhtoi gaw shaning shagu September 14 ya shani rai nga ai. Anhte Hkristan ni gaw wudang ngu ai hte Hkristu hpe mu lu ga ai. Dai majaw Hkristan law malawng gaw wudang shagrau poi hpe galaw lai wa ai labau nga nga ai. Kahtawlik Nawku Hpung hte rau Anglican, Lutheran ni mung labau hta wudang shagrau ai lam galaw lai wa ai lam mu lu ai.

Hkristu Madu a si du hpe awng padang lu ai kumla kaba nan rai nga ai. Mungkan masha yawng a hkye hkrang la labau masat dingsat kaba nan rai nga ai.

Hpu nau wa san ai hte maren sha, ndai wudang poi galaw hpang ai labau nga nga ai. Madu Yesu hpe jan noi sat kau ai wudang hpe nan mu tam la lu ai lam labau gaw anhte hpe shadum nga ai.

Dai wudang hpe tam mu ai hta madung ahkyak ai wa gaw San Pra ai Helena rai nga ai. Shi gaw Constantine the Great ngu mying ai hkawhkam a kanu rai nga ai. San Helena Hkristan makam hpe hkap la hpang ai aten gaw shi a asak (63) ning rai sam lam ka da ma ai. Shi a kasha Constantine hkawhkam hpyen gasat dang ai gaw kanu a matsun hte maren wudang sumla hpe jai lang ai majaw re ngu nna mung hkam la kam sham ma ai.

San Helena gaw Yesu Madu hte seng ai lam ni hpe grai myit lawm ai rai nna, Yesu hpe jan noi sat kau ai wudang hte rau shi hpe lup da ai lup ni hpe mung sawk sagawn lai wa ai wa rai nga ai.

Madu Yesu hpe jan noi sat ai wudang hpe mu tam ai aten gaw 326 shaning, September 14 ya shani re ai lam nawku hpung labau hta ka da ai.

Roma na nawku hpung labau hta gaw ndai poi hpe tsa ban sanit (7) hta galaw hpang ai ngu matsing rawng ai lam ka da ma ai. Shaning hkrak gaw ka da ai lam n mu lu ai.

A Lam Wudang Bum hpe hpang wa ai hta madung shakut lai wa ai Jau gaw, Jau Prat(50) ning hpring sai Wa Jau kaba Paul La Sang La rai nga ai.

A Lam Wudang Bum gaw Myitkyina muklum kaw nna deng 13 jan tsan ai A Lam mare a Sinna maga deng (2) daram tsan aiN Hkai Bum kaba a Bum marawn langai rai nga ai. Pe (2850) daram tsaw ai Bum ntsa hta gaw gap da ai rai nga ai.

Ndai A Lam Wudang Bum hpe Tanghpre jau ginwang hta Ginwang Up magam hpe gun hpai nga ai ten Wa Jau Paul La sang La hkum nnan 1983 kaw nna 2003 du hkra A Lam mare na Tara hkaw Sara ni hte hpung masha ni rau Shang hkawk hte Pe 2850 tsaw ai Bum ntsa du hkra lam gaw galaw woi awn galaw lai wa sai rai nga ai.

Alam wudang bung gaw shawng ningnan hpaw hpang ai shaloi gaw Tanghpre Jau Ginwang wudang bum hku masat nna sha galaw hpang ai raitim, hpang daw de Myitkyina Saradaw Ginwang a wudang bung ngu bai masat la ai re lam chye lu ai.

Alam wudang bum hta wudang shagrau Misa Hkungga hpe gara shaning hta galaw hpang ai, Saradaw Ginwang masing hte gara shaning hta galaw hpang ai hpe gaw hkrak n chye shi ai majaw sawk sagawn la lu jang bai n dau ya na nngai.