Lachyen Lahka Ai Lam Hta Madung Da Ai Makam Masham Gaw Tengman Ai Makam Masham N re.

Wa Sarabyin Francis gaw lai wa sai laban shani San Peter Pa kaba hta kam sham ai Christan hpung masha ni hpe tsun ai hta tengman ai makam masham hte akyu hpyi ai lam hpe hkam la lu na matu anhte a myit masin salum ni hpe hpaw tawn da nna lachyen lahka ai lam hpe galoi mung n galaw na saw shaga lai wa ai.

Dai shani na kabu gara shiga ( Yawhan 6: 41 – 51 ) hpe myit sumru yu let lachyen lahka ai lam, myit ja ai lam  hte myit masin salum hpe pat da ai gaw wenyi rawt jat lam hta pat hkum, shing dang da ai lam byin shangun nga  ai.

Ja la ai myit masin hte lachyen lahka ai lam ni a majaw masha langai a wenyi rawt jat lam hte  kam sham ai myit hpe  kade daram hkra machyi shangun ai gaw Karai a kasha  Madu Yesu Hkristu hpe pyi n  kam sham ai myit, wenyi rawt jat lam hpe pat shing dang kau ya ai lam byin shangun nga ai nga nna Wa Sarabyin tsun shadum lai wa ai.

Tengman ai makam masham hte akyu hpyi ai gaw ja la ai  myit masin salum ni  hpe hpaw ya lu ai. Anhte ni Madu Karai Kasang hpang de akyu hpyi ga ai rai tim akyu hpyi ai lam hta myit masin hpe pat da ai rai yang  dai akyu hpyi ai lam gaw  Karai Kasang a man hta teng man ai akyu hpyi nsen n rai nga ai.

Anhte ni tengman ai makam masham hte akyu hpyi ai lam hpe hkam la lu hkra Karai Kasang a man hta shagrit shanem ai myit hte azim sha nga nna  Karai Kasang tsun ai nsen hpe madat la ga nga nna saw shaga dat nga ai.