Laban Shani Na Mungga -Pranwan Ladaw (27), C, 2022 Makam masham gaw Karai Kasang jaw ai kumhpa

Pranwan Ladaw (27), C, 2022

Makam masham gaw Karai Kasang jaw ai kumhpa

Hkristu hta tsaw ra ai nu wa hpu nau ni e, ndai laban gaw Pranwan Ladaw hta (27) ngu na laban rai nga ai.

Myihtoi Habakkuk a mayak

Myihtoi Habakkuk a laika kadun ai lam hpe chye da ai hta lai nna, shi a lam kachyi mi sha chye lu ga ai.

Shi gaw Myihtoi Yeremiah a lakhtak hta nga lai wa ai wa rai nga ai. Yerusalem gaw dai aten hta masa grau n tsawm ai rai nga ai. Shaning law law Israel myusha ni hpe dingbai dingna jaw jahte tam ai, hpung dagu ja ai Syria hpyen ni kaw na lawt lu sai raitim, hpang daw hta Babylon myusha hpyen bai paw pru wa ai.

Babylon hpyen ni gaw Israel myusha ni a mungdan na mare kaba langai ngut langai gasat jahten sharun kau ya lai wa ma ai. Yerusalem hpe mung gasat nna hten run mat ai.

Tinang myusha ni hpe grai tsaw ra ai Myihtoi Habakkuk gaw, dai mabyin ni n chye na lai wa na daram rai mat ai.

Dai majaw Karai Kasang hpe aput angun hpyi shawn lai wa ai. (1) Yaweh Karai Kasang rai nga ninglen tinang a myusha ni a akyu hpyi nsen hpe hparai n na ya ai rai? Shanhte hpe hpyen ni a lata kaw na shalawt ya rit. (2) Israel myusha ni hpe galoi mung makawp maga na nga nna jiwoi jiwa ni hpe ga sadi jaw da lai wa ai n rai ni? (3) Anhte shut lai wa ai gaw teng ai. Hpyen ni gaw anhte hta grau kaja ma a ni, ngu Karai Kasang hpe ga san hte aput lai wa ai.

Dai ten hta, ahkyak ai laika ni hpe nya ai ga ni ntsa hta ka da ai rai nna, dai ga lungpa ni hpe na na hkam lu hkra wan kaw ju ma ai. Daini du hkra dai ga lungpa nkau ni naw nga ai.

Karai Kasang gaw, sadi dung ai wa re lam prat shagu na masha ni chye na matu Myihtoi hpe dai ga lungpa ntsa laika ka shangun lai wa ai.

“Karai Kasang shingran jaw ai hpe ka tawn u! Hpa majaw nga yang dai gaw teng teng byin wa na aten garai n du nga ai. Rai ti mung aten gaw alawan du nga sai, ngai nang hpe madun ai lam gaw teng wa na ra ai. Dai du wa na aten gaw lanyan ai zawn rai nga ai, rai ti mung, dai hpe la nga u; dai gaw teng teng byin wa na ra ai, dai gaw na taw nga na  ra ai n rai” (Habakkuk 2:2-3).

Dai gaw, Ngai hpe kam mu! Nye a ga sadi hte maren ga sadi dung nga ai re; Nang, dai ga sadi hpe ala dingda nga ai ten hta gaw ya myit n galu rai na ra ai; Raitim, Nye a ga hkaw mi pyi n hkum tsup wa na n rai; Nang myit mada da ai hte grau hkum tsup ai hpe mu lu na ra ai, ngu ai rai nga ai.

Timothy a mayak

San Pawlu gaw Timothy hpe Ephesus mare na Hkristan ni a ningbaw hpa-awn shatai, lit shatsam da ai; shi sak naw ram ai rai nna hkrit tsang, myit tsang chye ai wa rai nga ai (1Kol 16:10).

Timothy hta kaga mayak lam law law naw nga ai. Shi gaw Ephesu na Saradaw rai nna, Nawku Hpung a Saradaw langai mung rai nga ai. Shi a shawng na asak kaba sai sara nkau ni gaw Hkristan nawku hpung hpe shut shai ai hku sharin shaga lai wa ma ai.

Sara kaja ngu hkap la da ai San Pawlu gaw lakawng lang ngu na lang Roma htawng hta bai sharawng hkrum ai majaw Timothy gaw shi hpe jasum kau na tsang kaba tsang lai wa ai.

Lai wa sai shaning ni hta San Pawlu gaw shi hpe lam matsun laika langai ka lai wa yu ai. Ya ndai lang mung shi hpe n-gun jaw na matu lahkawng lang ngu na lang na laika hpe bai ka sa dat ai.

Ndai Lahkawng lang na laika hpe sumru yu ga.

Karai Kasang kaw na chyeju kumhpa myu lahkawng hkam la lu ai lam shadum dat ai. (1) Hkristu hta kam sham nna kashin kamun hkam la ai shaloi Wenyi a marang e sak ningnan hte sak hkrung lu ai. (2) Jau, Saradaw aya hpe hkam la lu ai gaw Kabu Gara Shiga hpe hkaw tsun na ahkaw ahkang lu la ai.

Hkristu hta kam sham ai gaw Karai Kasang jaw ya ai kumhpa re ai ngu San Pawlu, Timothy hpe shadum ya lai wa ai.

“Karai Kasang gaw anhte galaw sai mai kaja dum ai amu bungli lama ma a majaw n rai, shi nan a yaw shada ai lam hte chyeju a majaw anhte hpe hkrang la nna shi a amyu masha tai na matu shaga la mani ai. Shi gaw mungkan nnan lat ai ten a shawng kaw nna Hkristu Yesu a marang e dai chyeju anhte hpe jaw da mani ai” (2Tim 1:9).

Hkristu hta kam sham lu ai gaw anhte gingdan ai majaw gaw n rai nga ai; Karai Kasang a tsaw ra matsan dum lama ai san san a majaw lu la ai she rai nga ai.

Hkristu hta kam sham lu ai kumhpa hte Kabu Gara Shiga hkaw tsun lu ai ahkaw ahkang gaw Hkristu hkum nan ap jaw da ai kumhpa hte ahkang aya, ahkaw ahkang rai nga ai.

“Nang hpe kam nna ap ya da sai mai kaja ai arai ni hpe anhte hta shanu nga ai dai Chyoi Pra ai Wenyi a atsam hte a mahkyu nga u” (2Tim 1:14).

Roma tara upadi hte maren, sumtsan hkrunlam hkawm ai wa, shing n rai, si wa maw ai wa gaw, shi kam kaba dik ai wa hpe gumhpraw hte sut rai ni ap tawn da nna, shi bai wa ai ten, shing n rai, si mat ai rai yang mung, si mat ai wa a kasha ni sak ram ten du jang she ap jaw ra ai rai nga ai.

Ndai zawn rai kamhpa myit kaba hte ap jaw da ai lam hpe grai nan manu shadan makawp maga ai wa gaw manu dan sut rai ni hpe kam mara jai galaw na n re, dai hpe hpagawn mara galaw na n rai nga ai.

San Pawlu gaw Timothy hpe Hkristu hta kam sham ai lam, mi na nga taw sai hte maren, ngang gring nga shangun na matu hte Kabu Gara Shiga hkaw tsun na matu n-gun jaw lai wa ai rai nga ai.

Kasa ni a mayak

Ndai laban na Kabu Gara Shiga Chyum daw gaw, Yesu Madu nni nkri n hkam shi yang, Yerusalem mare de sa ten sharin ai sharin shaga mungga langai rai nga ai.

De a shawng kade n na shi yang, San Petru gaw, kasa ni yawng a malai, Yesu Madu hpe “Messaiah” hkye la Madu, Karai Kasang a kasha re ngu tsun shapraw hkap la ai lai wa ai (Lk 9:18-21). Dai ten kaw nna, kasa ni gaw Yesu Madu hpe kam sham ai hta myit um-ang, lam dam ai n nga sana re ngu hkam la wa ma ai.

Rai ti mung, kade n na yang, Yesu Madu gaw hpyen ni a lata de ap kau hkrum na lam, nni nkri hkam nna si hkam ra na lam shanhte hpe tsun dan wa ai. Masum lang tup tsun dan ai hpe mu lu ga ai. Lk 9:22,44 hta shawng na lang hte lahkawng lang ngu na tsun dan ai. Lk 18:31-34 hta masum lang ngu na tsun dan ai hpe mu ga ai.

Ndai lam hte seng nna kasa ni na ma ai shaloi mau ai hte, kajawng ai hte, hkrit ai hte, rai mat ma ai. Shanhte a sara wa nni nkri hkam si hkam na hpe mau ai hte, myit n lu, kam n lu rai wa masai. Dai zawn myit sumru let myit n pyaw, myit yawn lai wa ma ai.

Bai, ndai laban na chyum daw a hpang daw hta, tingnang hpe hkra machyi shangun ai ni hpe, shaloi jang, mara dat ya ra ai, nga nna Madu Yesu sharin shaga matsun da ai. Sape ni gaw dai hpe hkap la lu na grai yak lai wa ma ai (Lk 17:4).

Shanhte ni myit um-ang, myit kaji nga ma rai nna, “Kasa ni gaw, Madu hpe, anhte a kam sham ai myit kaba shangun ya mi nga nna hpyi ma ai” (Lk 17:5).

Yesu Madu gaw shanhte hpe makam masham hte seng nna kalang n-ga, n-gun jaw da ai. Shanhte a makam n hkum tsup ai rai tim, mau hpa hpung dagu kaba mai nga ai. San Luka gaw hpun hpe pyi gang baw lu na lam, San Mahte gaw bum ting hpe pyi htawt sit lu na lam (Mt 17:20) tsun da ma ai.

Yesu Madu gaw dai zawn galaw lu na lam kalang n ga, law law lang tsun lai wa ai. Shi tsun ai lam law law rai tim tsun mayu ai lam maren sha rai nga ai.

Shinggyim masha galaw lu ai gaw masat shadang, jarit nga ai. Raitim, Karai Kasan hpe kam sham kam hpa ga ai rai yang, gawng kya ai lam ni hta Madu Karai a mahkra dang chye ai hte galai bang ya nna galaw awng dang lu ai chyeju hkam la lu na ga ai. Madu Hkristu hta kam sham kam hpa ai masha gaw nlung shadaw zawn ngang gring ai, n-gun kaba wa ai.

Teng man shagrit shanem ai lam gaw, shinggyim masha ni hpe, Hkristu hta kam hpa ai lam de woi sa ya ai

Ndai laban na Kabu Gara Shiga Chyum daw jahtum daw gaw anhte chye na ai hta lai nna lachyum grau sung ai. Yesu Madu gaw hkauna madu a hkauna pa hta nchyang shang bungli galaw ai wa langai mi lani mi tup bungli galaw ai ga shadawn tsun da ai.

Nchyang mayam wa gaw shani tup hkauna bungli galaw ngut nna hkauna madu a nta de bai wa ai shaloi, tinang hkum tinang jasan jasen la nna, shi a madu a matu shana shat lajang ra nna daw jau ra ai. Dai lam ni yawng ngut jang she shana shat sha la nna hkring sa lu ai.

Yesu tsun mayu ai gaw mayam ni galaw ra ai lit magam hpe hkan shatup ai majaw, dai mayam wa bungli shajan galaw nna ahkaw ahkang hpyi ai n rai nga ai.

(Yesu Madu ga shadawn jaw ai ndai nchyang mayam wa gaw, dai ten na Palestine mungdan hta tara maigan ni a mayam tai ai ni hta grai nan naw hkyam sa ai gaw teng sha rai nga ai.)

Madu hte shangun ma ni a lapran na kanawn mazum, matut mahkai ai lam gaw Karai Kasang hte shinggyim masha ni matut mahkai ai hte maren bung nga ai ngu Yesu Madu tsun da ai rai nga ai.

Ndai ga shadawn hpe tsun ai gaw, Yesu Madu, Pharisee ni hpe madung da nna tsun ai rai nga ai.

Shanhte, Mawshe tara hpe hkrak hkan shatup ai majaw, Karai Kasang gaw shanhte hpe, yawng hta ahkyak da ra ai ngu hkam la lai wa ma ai. Raitim, anhte yawng mung ndai sharin shaga ga shadawn kaw nna sharin la ra ga ai. Anhte hte mung seng ai rai nga ai.

Karai Kasang gaw kadai hpe mung hka n kap ai. Shinggyim masha ni mahtang, Karai Kasang hpe jaw ra ai law law nga nga ai.

Karai Kasang anhte hpe hkye la ra ai ngu ai gaw n rai nga ai. Shi anhte hpe tsaw ra matsan dum lama ai majaw she hkye hkrang la ai rai nga ai hpe San Pawlu Timothy kaw shagun dat ai laika hta ka shalawm da nga ai.

Dai majaw, kadai raitim, teng man Hkristan sak prat hte nga nna sha, shing n rai, Karai Kasang sharawng awng ai hku hkan shatup nna sha gaw, Karai Kasang hpe akyu n jaw lu ai. Shi a hpung shingkang arawng shadang hpe kaba jat shangun n lu ai. Mahkra dang chye ai Karai Kasang hta yawm mat na, jat wa na hpung shingkang arawng shadang kaga n nga sai. Shi hta yawng hkum tsup nga sai.

Karai Kasang mahtang she anhte hpe sadi dung na matu, nhtoi hte atsam marai jaw bang ya nna akyu chyeju hkam sha shangun ai rai nga ai.

Hpa lam hta raitim, gara hku mi sumru sumru, anhte a shakut shaja ai ngu na hta, Karai Kasang garum madi shadaw ya ai hpe mahtang mu chye lu na ga ai.

“Dai Madu gaw shi a ntsa palawng hpe raw, nshang e shingkyit kyit let, shanhte hpe shaku grup dung shangun nna galaw daw na ra ai” (Lk 12:37).

Akyu hpyi saga

Wa Karai Kasang e, mai kaja ai lam ni hpe galaw shakut let Nang Madu du wa na hpe maja nga lu na atsam jaw ya rit. Anhte a Madu Hkristu a marang e hpyi nem nga ga ai.  Amen.

Hkristu hta tsaw ra hkung ga ai kanu kawa tarahkaw sara/num ni hte nu wa hpu nau ni e, ndai laban gaw Pranwan Ladaw hta (27) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) – Habahku 1:2-3; 2:2-4

Chyum Mungga Daw (2) – 2Tim 1:6-9, 13-14

Kabu Gara Shiga – Lk 17:5-10

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.