Kun Dinghku Langai Hta Makam Nbung Ai Hku Hkawm Sa Yang Mara Lu Na Kun?

San: (Mixed Marriage/faith of their children) San: Num wa gaw RC, La wa gaw KBC re. RC num wa mung shi a makam hta hkawm, la wa mung shi a makam hta hkawm sa ai. Shan a kashu kasha ni gaw kawa kaw hkan na zawn kanu kaw hkan na zawn rai nna, ma ni bawnu shuk taw ai hpe mu mada lu ai. Ndai zawn rai yang mara lu na kun Wa jau e chyeju hte naw tsun dan rit. Namlim pa Jau aseng hka san sara ning htawn hka san mare kaw,nga lai wa na ya bum tsit pa hpyen yen Camp 2 kaw,shanu nga ai Ritar Hpaula Ji Tawng a ga san hpe htai na na nngai.

Htai: Kalang mi Karai Kasang hte Jau, shawa a man e Ga sadi, Ga shaka hkam la sai dinghku num dinghku la yan gaw tawn da ai Ga shaka hpe galoi rai tim, ganang rai tim, ganing re  ai shingra maka kaw rai tim sadi dung ai hte hkan lang hkan shatup ra ai. Nawku hpung a tara Canan law no.1055 hta matsun da ai hkungran Ga shaka hkam la sai madu jan, madu wa ni gaw

-Prat tup n daw n hka ai hteganawn matsum ra ai.

-Kashu kasha shangai shaprat ra ai.

-Langai hte langai a myit dik myit pyaw na hpe myit tau ya let hkungga tsawra ai myit hte ganawn matsum ra ai.

Kashu kasha ni hpe bau sin makawp maga na hpaji sharin kung hpan hkra sharin shaga ya na. ndai lam ni hpe myit jung kamsham ai hte hkan lang hkan sa ai.

Kahtawlik Nawku Htung hte maren, hpung n bung ai wa hte kayau hkungran na rai yang, dai hpung n bung ai ningrum ning tau tai na wa gaw, Kahtawlik hpung masha wa a makam hta shang lawt ai hku hkawm sa lu, nawku lu, shangai shaprat wa ai ma ni hpe mung shi a makam hpe shachyan ya, lam woi ya lam matsun ya, tara laika ni sharin hkaja shangun ya na ahkaw ahkang jaw ra ai. Hpung n bung ai wa hpe mung dai hte maren shi a makam hta hkawm sa na ahkaw ahkang hpe Kahtawlik hpung masha maga hku nna jaw ra ai.

Lahkawng maga na yan, tinang a ningrum ningtau wa a makam htung lailen ni hpe hka ja da ra ai rai nga ai. Rai yang she, shada grau chye na hkat wa na, teng sha rai nga ai.

Ma ni hpe mung shanhte a asak aprat hta hkan nna bawnu dep lu ai, sawn sumru lu ai madang hpe maram yu nna tinang a makam hte nawku htung lai ni hpe sharin achying ya ra ai lit nga ai.

Ndai zawn rai, ma ni a matu hte tinang a ningrum ningtau a makam masham hpe myit tau ya nna, Canon 1125 hta tsun da ai, mi shawng kaw tsun sai lam ni hpe hkan shatup na ngu hkap la jang she, nawku hpung hta ahkaw ahkang nga ai Jau ni gaw hkungran ya mai ai rai nga ai.

Ma ni chye myit chye mang sumru dinglik chye ginhka la ai asak aprat hta shanhte a shang lawt ai myit hte hkap la kam sham hkan sa ai makam hpung hpe lata nna shanhte hkap la kam sham ai makam hta hkawm sa na ahkaw ahkang nga ai hpe mung, dai kanu yan kawa gaw myit san seng ai hte chye na hkap la ya ra ai.

Bawnu shuk ai gaw hpa lam hta rai tim shuk ai sha rai nga ai. Anhte a prat gaw dai bawnu shuk n kam hkam ai majaw ahpa atang sha myit shalai kau n mai ga ai.

Canon 1136 – Parents have the most grave duty and the primary right to take care as best they can for the physical, social, cultural, moral, and religious education of their offspring.

Kanu kawa ni gaw shanhte shangai shaprat la lu ai ma ni a makam masham lam, shinggyim nga sat nga sa lam, htunghking lam, shinggyim kanawn mazum lam, hkum hkrang myit masin wenyi hkam ja lam ni hta kaja dik ladat hte, galaw ya lu ai made ahkyak da galaw ya na lit kaba nga ai lam tsun ai rai nga ai.