Karai Kasang Hpe Hkrit Hkungga Lachyum

Hpung Woi nkau mi tsun ai karai kasang hpe "HKRIT HKUNGGA RA AI" nga ai hpe nau nchye na ai majaw, sang lang dan na hpe ga san san dat n.ngai. Nkau mi tsun sharin ai gaw "Hkrit ai ngu gaw, n kaja ai Hungga tsawra ra ai she re " nga ma ai gara wa gaw jaw grau htut manu ai, kaja ai mahtai rai nga ai Kun? Sanglang dan rit. 

Lawa jau ginwang, Warazup mare na. Ya KMSS-MKN kaw bl galo let, Myitkyi na shatapru kaw nga taw ai wa a ga san hpe htai ya na nngai.

Myusha baw sang ga ni hpe hkaja yu ai ni tsun dan hkai dan, sawk sagawn dan ai hpe maram yu yang, ga si langai hpe sha, lachyum amyu lahkawng masum hku jai lang mai ai ga si ni law law nga nga ai hpe, anhte mung hka ja lu ga ai. Dai hte maren, jai lang ai ga si n bung tim, tsun mayu ai lachyum wa bung ai ga si ni mung nga nga ai. Dai zawn re wa bung ai, shing n rai, shai hkat ai lam ni gaw tsun dat ai yaw shada ai, lachyum nga ai ni hta hkan nna, mung mai byin wa ai.

Bai, ga si, ga ngau ga yan ni hta hkan nna mung, lachyum ni shai mat ai mai rai nga ai. Bai, anhte jai lang ai myu hpan ni hta hkan nna mung, shai mat chye nga ai; ndai kaw tsun mayu ai gaw, ga shadawn, tsi hpaji hte seng ai kaw jai lang ai ga si hte hpung tang hpaji hte seng ai kaw jai lang ai ga si gaw langai sha raitim, tsun mayu ai lam shai mat chye nga ai. Anhte hkum nan kalang lang tinang myit ai hte hti htang re ai ga si hpe jai lang, tsun nna pyi dai tinang tsun mayu ai hpe n htang hku tsun chye ga ai.

Ga shadawn grai ningtawng ai manang langai mi hpe yu n-gun lu ai majaw “ngai nang hpe grai yu manawn ai ngu tsun chye ga ai”, dai hku tsun ai lachyum gaw n ju n dawn ai majaw n rai nga ai, kaja wa manawn masham ai majaw mung n rai nga ai. N-gun lu ai majaw mung, shakawn ai hku nna mung tsun ai mai rai nga ai. Tsun ai wa a myit masa hta hkan ai zawn, shi jai lang ai ga si ga ngau ga yan ni hte nsen nyem tsaw, myiman nsam hkrang, myit masa ni yawng hte mung seng nga ai.

Nau na wa san ai ga si “hkrit hkungga ra ai” hte “hkungga tsaw ra ai” ngu ai gaw jai lang ai ga si shai hkat ai zawn rai tim, lachyum gaw wa bung ai daram rai nga ai.

“Hkrit ai” ngu ai ga si hpe jai lang yang, dai tsun ai wa hpa hpe hkrit ai, hpa majaw hkrit ai ngu ai ni naw nga nga ai. Ga shadawn nat hpe hkrit ai, lup wa kaw lai yang hkrit ai, nsin kaw rai yang hkrit ai, machyi na, si na hpe hkrit ai, ndai zawn rai hkrit ai hte seng nna law law mai byin nga ai. Tinang hkrit ai gaw hpa majaw re ai kun ngu ai hpe sumru yu na re ngu mung kam ai.

Chyum laika hta na, Karai Kasang hpe hkrit hkungga ai ngu ai hte Karai Kasang hpe tsaw ra hkungga ai ngu ai ga si ga yan gaw kaga ga re ai zawn raitim, lachyum gaw grai nihtep ai hku matut manoi ai lam nga ai hpe mu lu ga ai.

“Karai Kasang hpe tsaw ra ai” ngu ai gaw kaja ai lam ni hpe galaw sa wa na matu rai nga ai; “Karai Kasang hpe hkrit hkungga ai” ngu ai gaw anhte n kaja ai lam ni hta na koi yan kau na, makawp maga lu na matu rai nga ai. Tsun mayu ai gaw, Karai Kasang hpe tsaw ra hkungga ai rai yang, Shi a hkang da tara ni hpe hkrit tsang myit hte hkan shatup ra ai. Dai hkrit tsang ai myit kaw hkungga tsaw ra ai kaw na prut pru wa ai rai ra ai.

Karai Kasang gaw tsaw ra ai wa rai nga ai, tara rap ra ai wa rai nga ai, matsan dum myit kaba ai wa rai nga ai, hkam sharang myit galu kaba ai wa rai nga ai, mara dat hkam sa ya ai wa rai nga ai, ndai zawn re ai mai kaja ai lam ni yawng gaw Karai Kasang hta nga ai hpe anhte chye na da ra ga ai.

“Karai Kasang hpe hkrit hkungga ra ai” ngu ai gaw Shi a Chyoi Pra San seng ai lam hpe hkrit hkungga ra ai hpe tsun ai mung rai nga ai. Anhte shinggyim masha shada hta, tinang kam ai sara, shing n rai, kanu kawa, shing n rai, tinang ahtang kaba ai masha langai ngai a hpaji, atsam, marai ni hpe hkan dep lu na, shingjawng lu na n gwi, byin chye ga ai. Masha langai ngai a dingman dinghpring ai, si mani ai, myit tsawm htap ai, zawn re ai, tinang ahtang kaba ai lam shi hta nga ai rai yang, shi zawn nga lu na, shi zawn byin hkra shakut na n gwi mung byin chye ga ai. Dai majaw mung shi hpe yu nna n-gun lu kasi la nna nga sa chye ai ni mung nga nga ai. Lama ma galaw ai shaloi, tinang hta kung kyang ai masha wa e shawng galaw ai hpang shi a shawng kaw dai lam hpe tinang bai galaw dan na n gwi byin chye ga ai. Raitim, shi hpe hkrit ai majaw gaw n rai nga ai. Shi hpe ahtang kaba ai she rai nga ai. Karai Kasang gaw shinggyim masha ni hta shadawn n dang, htam law law grau nga ai.

Karai Kasang hpe hkrit hkungga ai gaw Makam masham apu asi hpe hkam la lu ai. Ga shaka dingsa prat na Israel myu sha ni Karai Kasang shanhte hpe mayam prat kaw na hkye hkrang la ai shaloi, hkrun lam hta madun dan ai mau hpa lamik kumla ni, atsam ni hpe mu hkrum hkam sha lai wa ma ai majaw mung, Karai Kasang hta ga sadi dung kam hpa yang akyu chyeju hkam la nga ai hpe mung, Shi hpe n kam n sham ma ai majaw, Shi hkang da tara hpe tawt lai nna tinang myit shadang nna nga ai shaloi dingbai dingna, jam jau jau hkau hkrum ai mahkrum madup ni a majaw mung Karai Kasang hpe hkrit hkungga ai ngu ai gaw kaning re hpe tsun ai gaw shanhte chye na lai wa ma ai. Dai Majaw mung Karai Kasang hpe hkrit ai ngu gaw shanhte a matu Karai Kasang hta kam sham ai makam masham rai nga ai hpe shanhte asan sha chye na ma ai.

Karai Kasang gaw mara shabyin ai Tsadan hpe n dawng ai; mara hpe n dawng ai, mara hpe n ra sharawng ai. Shi a myusha ni dai sadan kaw na rai nga ai mara galaw shut na hpe n ra sharawng ai. Mara gaw n kaja ai; masha hkum nan hpe, masha shada hpe, Karai Kasang hte masha lapran jahten sharun ai. Dai majaw dai mara hpe n galaw shut u ga matu Hkum galaw ngu ai tara ni hpe hkang da ai. Dai hkum galaw ngu ai hpe n galaw shut na matu anhte shinggyim masha ni hting hkang n lu byin chye ga ai. Dinghta ra marin ai myit, hkum sai shan ra marin ai myit ni hpe galaw na grau kam chye ga ai. Dai zawn re ai lam hpe hting hkang lu na matu gaw hkrit myit rawng yang she mai byin ai masa mung nga chye ai. Dai hkrit myit mung mai kaja lam hpe hkam la lu na re majaw gaw hkan shatup kam chye nga ai. N kaja ai lam a majaw jahkrit shama ai gaw hkrit hta hkrit kahtap wa ai. Karai Kasang hpe tsaw ra hkungga ai a majaw hkrit myit hte galaw shatup ai rai yang gaw mai kaja ai apu asi hpe bai hkam la lu ai; tsaw ra hpe bai lu la ai.

Karai Kasang hpe hpa majaw hkrit ga ai rai? (1) Karai Kasang hpe hkrit ai ngu ai gaw hkungga ai hpe tsun ai. Hkrit hpa re majaw hkungga ai hpe tsun ai n rai nga ai. Kam hpa ai, tsaw ra ai majaw hkungga ai hpe tsun ai she rai nga ai. Shagri she brep hkra jahkrit hkrum ai rai tim, dai zawn masa hte hkrum katut ai wa gaw galoi raitim dai jahkrit ai wa hpe tsawra hkungga na n rai nga ai. Hkrit hkungga na mung n rai nga ai. Ntsa lam myi hte mu mada ai hta hkungga jaw tim kaja wa myit kraw kata hta gaw shi hpe grai nan n dawng n ra ai rai nga ai; myit machyi ai rai nga ai.

Karai Kasang gaw nga yawng nga pra hpe hpan ai wa rai nga ai. Shi a hpung dagu hpe hkrit hkungga lara di ra ai. Karai Kasang hpe hkrit hkungga ai ni gaw shi a tara kanu hpe hpe hkan shatup ai. N kaja ai lam ni hpe koi yan kau lu na matu rai nga ai; mara ni hpe koi yan kau lu na matu rai nga ai; Kaja ai akyu ara hkam la lu na matu rai nga ai. Dai majaw mung Karai Kasang hpe madat mara lu ai rai nga ai.

Karai kasang hpe hkrit hkungga ai gaw hpaji byen-ya hpe hkam la lu na lahkam ningnan rai nga ai. Dai majaw mung anhte a kashu kasha ni hpe dai lam sharin shaga nga ga ai.

Karai Kasang hpe hkrit hkungga ai a marang e anhte hkum hpe jasan jaseng la lu ga ai (Sk.Kd 19:9). Karai Kasang hpe hkrit hkungga ai a marang e, myit masin mahkra hte shi hpe nawku daw jau lu ga ai. Karai Kasang hpe hkrit hkungga ai gaw shi hkum nan ga sadi jaw da ai chyeju kumhpa hkam la na lam rai nga ai. Karai Kasang hpe hkrit hkungga ai gaw anhte hkum hpe shagrit shanem la lu ai; madu hkum hpe kam hpa gwi myit ni mung nga wa ai.

Karai Kasang hpe hkrit hkungga ai lam gaw Ga shaka ningnan hpe myit lawm ai, hkap la ai ngu ai lachyum rai nga ai; Tinang a myit masin hpe chyum mungga hta myit bang da ai, chyum mungga hte jahkru shakat la ai, ngu ai lachyum rai nga ai; Karai Kasang a mara dat hkyam sa ai hte tinang a wenyi hpe jahkru shakat ai ngu ai lachyum rai nga ai; Karai Kasang a mai kaja ai lam hte wenyi hpe jahkru shakat la ai ngu ai lachyum rai nga ai; Karai Kasang ngai hte rau rai nga ai hpe myit dum ai lachyum rai nga ai; Karai Kasang a ntsa ga sadi dung na lit nga ai hpe myit dum ai lachyum rai nga ai; Karai Kasang hpe hkrit hkungga ai ni hte nihtep ai hku nga ai, matut mahkai makri shawn nga ai ngu ai lachyum rai nga ai; karai kasang hpe hkrit hkungga chye na matu hte de a lachyum, bai akyu ara ni hpe grau grau chye na hkan sa lu na matu mung rai nga ai.

Dai majaw gaw anhte ni Karai mungga hpe hkaja ra ai; Karai Kasang a magam bungli hpe myit dum ra ai. Karai Kasang hpe hkrit hkungga ai gaw, (1) Wenyi machye machyang hpe hkam la lu na (Ga Shagawp 1:7) (2) Karai Hpaji hpe hkam la lu na (Shk.Kd 111:10; Yoba 28:28; Is 33:6), (3) Mara hpe ninghkak gasat na langai sha re ai laknak shatai lu na (Pru Mat 20:20), (4) Karai Kasang a matsan lama ai chyeju hpe hkam la lu na, (5) Htani htana asak hpe lu la na, (6) Nang hkum nan hte na kashu kasha ni hpe makawp maga ya na ra ai, (7) Karai Kasang hte hpu nau tai wa na rai nga ai.

Karai Kasang hpe hkrit hkungga ai lam hpe anhte a prat hta hkrak nga ra ai rai nga ai. Karai Kasang a yaw sin, yaw shada ai myit hte gaw de da ai tara ni hpe shagrit shanem, madat mara let hkan shatup nga ga. Karai Kasang hpe hkrit hkungga ai gaw Shi hpe tsaw ra ai, hkungga ai, Shi hpe madu lu ai lam rai nga ai.

By Fr. Patrick Gawmaw Hkawng Yae