Kahtawlik Nawku Hpung Masha Ni Gaw Hkristu Hkum Nan Gaw De Da Ai Nau Na Myit Majing Hte Tsaw Ra Lam Ngu Ai Nga Ra Ai

Chyoi Pra ai Manga ya shana na wudang shagrau ai nawku daw jau lamang Missa hkungga ga hta, The Preacher of the Papal Household, Cardinal Raniero Cantalamessa a mungga hta Kahtawlik Nawku Hpung masha ni gaw Hkristu hkum nan gaw de da ai nau na myit majing hte tsaw ra lam “Christological foundation of fraternity” ngu ai nga ra ai ngu tsun shadum da ai.

Dai shana na Missa hkungga hpe San Peter Nawku Htingnu hta Wa Sarabyin Francis hkum nan woi awn galaw ai rai nna Mungga hpe Cardinal Raniero htawn tsun ai rai nga ai. Misa Shang lawm ai ni mung Covid 19 makawp mahkyen hte maren hkrak hkan shatup let masat da ai masha shadang hte sha shang lawng ma ai.

Nawku Hpung woi hpa-awn ni hkum nan kahkying gumding lam nga nna, dai hpe gaw de ai lam hte seng ai hpe sung sung myit sumru let ta tut woi awn hkrang shapraw ai ningshawng ni rai ra ai ngu ga hpaw hta tsun da ai.

hpe San Peter Nawku Htingnu hta Wa Sarabyin Francis hkum nan woi awn galaw ai lam chye lu ai. Shang lawm ai ni mung Covid 19 makawp mahkyen hte maren hkrak hkan shatup let masat da ai masha shadang hte sha shang lawng ma ai.

“Anhte hpung woi ni gaw shada tsaw ra lam hpe simsa ai hku gaw de sa wa nna, shada ni ni htep htep nga ai ladat hte hpang ra ga ai; Mungkan masha yang nau na myit majing hte galung kahkying gumding wa na matu gaw anhte Kahtawlik Nawku Hpung kaw nna hpang ra ai,” ngu Cardinal shadum n-gun jaw da ai.

Hpu Nau Ni Ngu Ai Lachyum?

Wa Sarabyin Francis a hpang jahtum sharin shaga laika, encyclical “Fratelli tutti” hta Wa Sarabyin sharin shaga da ai nau na myit majing hte seng ai mungga hpe mung bai sang lang da nga ai.

Ndai sharin shaga laika “Fratelli tutti” gaw nawku hpung kata hta sha n rai, mungkan masha yang hte seng ai rai nna, shinggyim masha yawng hkan shatup ra ai lam rai nga ai. Mungdan masa lam hta, shinggyim wuhpung wuhpawng ni hta, makam masham hpung ni hta, kaja wa sha akyu pru akyu rawng ai sharin shaga laika rai nga ai.

Grau nna, Madu Yesu nni nkri hkam, si hkam ai wudang a mungsung lam hpe sumru nga ga ai anhte ni gaw Hkristu Calvary hkrunlam hta wudang hpai nna madun dan ai nau na myit majing rawng ai Hkristu a tsaw ra ai hta anhte myit manoi nga ra ga ai.

Anhte ni tsun taw ai “hpu nau ni” ngu ai ga si hpe Chyum laika hta “htingbu ni” ngu tsun da nga ai. Madu Yesu tsun ai ni htep ai nau na ni ngu ai gaw anhte a htingbu ni rai nga ai. Madu Yesu tsun ai “htingbu” ngu ai gaw anhte a garum shingtau ya na hpe ra kadawn nga ai matsan jam jau hkrum nga ai ni rai nga ai.

Chyoi Pra ai Kru ya shana gaw hpu nau ni hta Hkristu gaw shawng shangai ai apu asi rai nga ai lam Rom 8: 29 hpe lakap nna mung Cardinal matut tsun dan da nga ai.

“Shi a Kasha gaw Kahpu kanau lanlak hta e kasha alat ningshawng tai u ga, Karai Kasang gaw shi lata san da sai ni hpe mung, shi a Kasha a gawng shingyan hte bung wa na masha lata san da mu ai.”

Hkritu hta hpu nau tai wa ai ni gaw ningnan re ai hpu nau majing ni tai wa saga ai. “Pru sa nna, nye a hpu nau ni hpe Galile mung de sa wa na matu tsun mu; dai yang e shanhte ngai hte mu hkrum na mara ai, ngu nna Maria Magdalena hpe Yesu Madu htet da ai”, (Mt 28:10).

Madu Yesu bai hkrung rawt ai Paska poi a hpang “hpu nau” ngu ai gaw Hkristu hta kam sham ai makam masham hte ningnan re ai, hpu nau majing myit masa hte gaw de da ai hpe tsun ai rai nga ai. Ndai hpu nau myit majing hpe Hkristu hkum nan mungkan masha yawng a matu gaw de da ya ai rai nga ai.

Kahtawlik Nawku Hpung a matu hpu nau majing rawng ai lam gaw simsa lam hpe gaw de sa wa ai lam rai nna, Nawku Hpung kata anhte a lapran shawng hpang ai. Teng man myit malai majing lu nna galai shai ai hkrunlam hpe tsang hte tsang sung sung sumru let galai shai sa wa na gaw anhte kata grai ahkyak ai.

 Anhte hpe garan ginhka shangun na matu grai nan zeng kaba zeng ai Satan gaw anhte a masin hta n kaja ai tsing si ni hpe aten shagu sa gat bang ya nga ai hpe dum hprang let sadi maja nga ra ga ai.

Yesu Madu gaw Pharisee ni, Sadducee ni, Herodian ni, hte Zealot hpung ni hta n lawm na matu Yesu Madu ja ja shadum lai wa sai. Shanhte a myit jasat ni gaw Satan e ka-up da hkrum ai myit jasat ni rai nga ai.

Nawku Hpung hpa-awn ni gaw myit sumru akyu hpyi ai lam hta ahkyak la nna sung sung myit sumru nga ra ai lam, Shanhte sagu hpung masha ni hpe Yesu Madu hpang de tinang hkum nan hte rau woi sa ra ai lam tsun let Cardinal Cantalemessa shi a mungga hpe ginchyum dat da ai lam Vatican Shiga Dap kaw nna ndau da ma ai.

By Fr. Patrick Gawmaw Hkawng Yae

#vaticannews #rvakachinservice #message

Source : Vatican News