Kaga Hpung De, Num Wa, Gale Shang Wa Nna,Kahtawlik Hpung De Bai Shang Wa Yang, Dam Jaw Ai Kun?

 Anhte kahtawlik hpung masha langai mi kaga hpung jan, shing n rai, nat jaw jan ni tai nna dai hpung hku hkrungran nna dai hpung hku nga lawm nna tinang ala si mat, shing nrai, hka mat ai. Bai nna num wa gaw kahtawlik de bai gale shang wa ai dai gaw mara gade dang kaba ai kun bai nna anhte hpung kaw na ganing ra ari dan hpe hkam la ra ai kun chye ju hte htai ya rit wa jau. Muse jau aseng den (105) kaw shanu nga ai Francisca ying sawng a ga san hpe htai ya na nngai.

Kahtawlik hpung masha langai mi dinghku de na rai yang hkungran sakramentu lawan dik hkam la ra ai. Ramma prat kaw na mayaw dinghku de sana rai jang tau nau hkyen lajang shachyip ra ai lam law law rai nga ai. Hkungran sakramentu hkam dinghku de na masha ni hkum nan Nawku Hpung a makam masham hte dinghku lam hpe tau nau hka ja da ra ai.

Kaga makam masham hpung, shing n rai, hpu nau hpung ni kaw num wa mat ai, shang mat ai rai yang gaw shi a makam hte shi rai mat sai rai nga ai. Kahtawlik Nawku Hpung gaw shinggyim masha ni a shang lawt ai makam masham hpe mung hkung ga manu shadan ya ai.

Kahtawlik Nawku Hpung sharin shaga ai hta, num hkungran ai hte seng nna, Kahtawlik Hpung masha shada hkungran ai, hpu nau Hkristan makam masham hpung masha langai nga hte hkungran ai, bai makam n bung ai hpung ni hte hkungran ai mahkrun lam ni nga nga ai hpe Kaga makam hpung masha ni hte rau Kahtawlik hpung masha ni law malawng n chye na ma ai hpe mu mada ai.

Hpu nau makam hpung ni hte hkungran ai lam hpe mung Kahtawlik hpung kawn lam hpaw da ya ai rai nga ai. Kahtawlik hte Kahtawlik n re ai hpu nau Hkristan yan lahkawng hkungran ai hte Kahtawlik hte makam n bung ai kaga makam hpung ni hte hkungran ai hpe gaw kayau hkungran ngu myit la ga ai. Canon law hta jai lang ai ga si hpe English hku gaw, Kahtawlik hte Kahtawlik n re ai hpu nau ni hte hkungran ai hpe gaw “Mixed Marraige” ngu tsun ai. Kahtawlik hte makam n bung ai kaga makam hpung hte hkungran ai hpe gaw “Disparity of Cult” ngu tsun ai.

Kahtawlik Hpung masha shada hkungran ai gaw mayak nau n nga ai. Hpu nau makam masham hpung masha langai ngai hte Hkungran na rai yang gaw, Kahtawlik Hpung masha shada hkungran ai hta mayak lam loi grau nga wa ai. Makam n bung ai Hpung masha langai ngai hte hkungran ai rai yang mayak mang hkang grau law wa ai rai nga ai. Ndai masa hpe Nawku Hpung labau hta mahkrup madup law law nga lai wa ai majaw mung, ndai hkungran na mahkrun lam masum hte seng nna hkan sa ra ai Nawku Hpung tara upadi “Canon Law” hta tara jahkrat da ai lam ni nga nga ai. Hpung bung ai masha shada hkungran ai hpe gaw alak mi n tsun sana.

Kahtawlik hte Kahtawlik n re ai hpu nau Hkristan ni hte hkungran ai “Mixed Marraige” madang hpe gaw Saradaw e ahkang jaw da ai Ginwang Up Jau ni kawn Nawku Hpung a matsun, mahkrun lam hte maren san jep, hkungran ya mai ai. Kahtawlik hte makam n bung ai kaga makam hpung ni hte hkungran ai madang hpe gaw Ginwang Up Saradaw hkum nan kaw Nawku Hpung kawn matsun da ai mahkrun lam hte maren hpyi shawn ai lam galaw nna, dai Ginwang Up Saradaw e ahkang jaw ai rai yang she hkungran Sakramentu hkam la mai ai.

Dai majaw gaw Kahtawlik Nawku hpung masha shagu gaw kadai hte mi dinghku de na rai rai, Nawku Hpung kawn mahkrun lam jaw da ai hta hkawm sa mai ai rai nga ai. Tinang a makam hpe mung n shamat, hpu nau ni a makam hpe mung hkung ga manu shadan ya ai hpe dan dan leng leng shapraw ai hpe mu lu na ga ai.

Hpu nau wa a ga san hpe htai ga nga yang, Kahtawlik makam hpung a sharin shaga ai hta, dinghku de sai ni gaw si hka hta lai nna hkrung hka hka ai hpe n hkap la ai. Si hka hka ai teng ai rai yang gaw sak naw hkrung nga ai wa gaw dinghku bai mai de ai rai nga ai. Kahtawlik kaw nna kaga hpu nau makam ni kaw du mat ai wa mung Kahtawlik makam de bai mai shang wa ai. Ningrum ningtau wa si mat nna bai shang wa ai mi rai rai, n si ai mi rai rai, Kahtawlik Nawku Hpung de bai shang wa mai ai. Kaga hpung hku hkungran da ai wa Kahtawlik hpung de bai shang wa na rai yang, shawng de shang lang da sai hte maren Kahtawlik Nawku a sharin shaga ai hte maren Kahtawlik nawku htung lai hte bai hkungran la rai nna bai shang wa mai ai.

Ndai kaw dum chye da ra ai gaw, lama na ningrum ningtau wa si mat n na kaga masha hte dinghku bai de na rai yang, Nawku Hpung kawn matsun da ai tang shawn sakse ni hpe madun dan ra ai.

Tinang a ningrum ningtau galoi si mat ai, gara kaw si ai, ra wa yang gara kaw lup da ai, ngu ai lam ni hpe sakse hte hkrak madun dan ra ai. Kaga hpung de gale mat nna Kahtawlik Nawku Hpung de bai gale shang wa ai wa hpe ari dan jaw ai dam ni gaw n nga ai. Dai Kahtawlik Hpung de bai gale shang wa ai wa hkun nan Kahtawlik Nawku Hpung a makam hte sharin shaga ai lam ni hpe htep lahti hka ja, sak hkrung sa wa na gaw ahkyak dik rai nga ai.

By Fr. Patrick Gawmaw Hkawng Yae