Htam Shi Alu Mahkawng Da Nna, Bai Jai Lang Kau Ai Rai Yang?

San: Wa jau e Nkau mi tsun yang gaw htam shi alu hpe tawn da nna lam amyu myu a majaw htam shi alu hpe bai jai lang kau nna bai bang da yang mara kaba ai nga nna tsun ai bai nna Nkau ni gaw jai lang kau nna bai bang da yang mai ai nga nna tsun ma ai gaja wa nga yang gaw mai ai kun nmai ai kun chye mayu ai majaw chyeju hte htai ya rit wa jau. Muse jau aseng den (105) kaw shanu nga ai Francisca Ying Sawng a ga san hpe htai ya na nngai.

• Htam shi alu ngu masat nna bang da sai hpe gaw bai n mai shaw, n mai jai lang sai rai nga ai. Htam shi alu hpe jai lang kau ai shaloi kaw na nan mara tai sai rai nga ai. Tinang hkum nan htam shi ngu masat bang da sai hpe gaw Nawku Hpung kaw na alu hte seng ang ai ni kaw ap jaw ra sai rai nga ai. Alu ni hpe ap jaw ai ngu ai hta, dai tinang a Saradaw Ginwang kata hta Ginwang Up Wa Saradaw e masat shagrin da ai masin hte maren galoi ten, gara kaw, kadai hpe ap ra ai ngu matsun da ai hte maren hkan galaw ra ai.

Dai masat da ai aten n du shi a lapran kaw htam shi hpe shaw jai lang ai hpe tsun ai rai na re ngu kam ai. Dai zawn re ai aten hta rai tim, htam shi hpe n mai shaw jai lang sai gaw rai nga ai. Grai ra ahkyak wa ai rai yang gaw tinang kaga mahkrun lam hku hparan mai yang dai kaga mahkrun lam hku hparan sa wa yang gaw kaja dik manu dik rai nga ai. Dai kaga lam hte hparan yak ai masa rai yang mung, tinang htam shi ngu masat nna bang da ai hpe gaw tinang myit hte sha dawdan nna bai hparan ai gaw n jaw n ang ai rai nga ai. Hpa majaw nga yang dai alu gaw Nawku Hpung hte seng mat sai majaw rai nga ai. Dai re majaw, dai zawn re masa hta gaw seng ang ai nawku hpung na alu hte seng nna lit la ai ni hpe shana jahkrum nna tinang a mayak ni hpe hparan sa wa ai gaw grau manu na re ngu hpaji jaw mayu ai.

Tinang san tawn da sai Htam shi alu hpe lam amyu myu a majaw htam shi alu hpe bai jai lang kau nna bai kapa bang da yang mara lu ai, n lu ai ngu ai gaw Karai Kasang hte she madung seng wa na re. Karai Kasang e nawku hpung hku nna hkang da ai tara hpe hkan shatup na, n hkan shatup na gaw dai tinang a shanglawt ai myit masa rai nga ai.

Htam shi alu hte Nawku Hpung alu ngu san da ai hpe gaw chyum laika matsun hte maren jaw bang ra ai; bai chyum laika matsun hte maren jai lang ra ai rai nga ai.

Karai Kasang a mying ningsang hta jaw bang ai alu ni hpe Chyum laika matsun hte maren jai lang ra ai.

Nawku Hpung alu hpe Karai Kasang a Sasana magam gun ai ni hpe garum madi shadaw ai hta jai lang ra ai.

Karai Mungga hkaw tsun ai ni hpe garum ya ra ai.

“Ningbaw ningla amu hpe atsawm galaw ai hpung woi ni gaw shabrai htam lahkawng hkam la ging ai ni re ngu nna sawn la mai nga ai. Grau nna mungga htawn tsun ai lam htesharin achyin ai lam hpe shakut shaja gun hpai ai ni gaw shing rai hkam la ging ai ni rai nga ma ai” (1 Tim 5:17).

“Dai Hkristu a mungga hpe sharin achyin hkam la ai wa gaw, sharin achyin ya ai sara wa hpe tinang lu mai ai kaja ai ja gumhpraw arung arai yawng hte garum madi shadaw nga u ga” (Gal 6:6).

“Dai hte maren, dai Kabu Gara Shiga hkaw dan ai ni gaw, dai Kabu Gara Shiga hta kan bau lu na, nga nna dai Madu hkang da nga sai” (1 Kor 9:14).

1 Kor 9:1-18 hpe hti yu yang Kasa langai mi a ahkaw ahkang ni hte lit magam a lam tsun da nga ai.

Kabu Gara Shiga Gun Sa Ai Ni Hpe garum ya ra ai hte seng nna Phil 1:5; 4:15-18; 2Kor 11:8-9; Kasa 18:3-5; 3Yh 5-8 ni hpe hti sumru mai ai.

Ra kadawn ai ni hpe garum shingtau ai lam hte seng nna mung 1Yh 3:17 hta “Sut gan lu su ai wa rai nga da nhtawm, shi a hpu nau wa matsan mayan ra kadawn nga ai hpe mu ninglen, shi a matsan dum ai myit masin hpe pat kau wu yang gaw, shi gaw Karai Kasang hpe tsaw ra ai ngu nna kaning rai tsun lu na a ta?”, ngu tsun da nga ai.

Mt 25:34-40 hta mung Karai Kasang gaw hpang jahtum jeyang ai aten hta kaji htum ai hpu nau ni hpe garum shingtau ai ni hpe hkra maga de sagu ni hpe lata la ai zawn lata la na re lam tsun da ai.

Gal 6:10 hta, “Dai re ai majaw anhte gaw aten ladaw naw nga pra nna ahkaw ahkang lu shagu masha nlang hte a matu mai kaja ai amu galaw nga ga, rai ti mung makam masham a dinghku na ni hpe grau nna galaw nga ga,” ngu San Pawlu n-gun jaw da nga ai.

By Fr. Patrick Gawmaw Hkwng Yae