Hpawtni Na Matu Hkum Tsang U,Hpawtni Gaw Dai Hpe Tsang Na Ra Ai

Myitkyina myo de ngai sa hkawm chyai ai shaloi lam maw kaba hku lai sa,lai wa re ai mawdaw,cycle ni law law lai sa,lai wa ai hpe ngai mu mada ai.Shanhte gaw shanhte a magam bungli ra ai a majaw ndai zawn hkawm sa ai ni rai na re ngu shadu ai.Raitim ngai mau ai lam gaw langai hte langai hkawm sa ai lam gaw ngai she grau ahkyak ai nga ai zawn lawan dik ai hku shawng de gashun gashe jawn lai wa ai hpe mu mada ai.Ndai zawn anhte mungkan shinggyim masha ni grai ahkyak ai grai kyin ai hpe mu mada ai gaw hpa baw a majaw ndai daram nrau ai,kyin nga ai rai kun? Anhte yawng myit yu ga.

Kalang lang anhte hta byin chye ai gaw ngai hpa lam a matu kyin nga ai,hpa majaw ndai daram kyin taw ai ngu ai hpe ndum ai.Bai nna Gat de sa ai shaloi nta kaw ra ai lam hpe mari na matu sa wa ai rai tim gat kata de du ai shaloi gaw ra ai arung arai ni grai law nga taw ai hpe mu mada ai shaloi nta kaw ra ai arai mari ra ai hpe jahkring mi gan ndum kau nna,tinang ra ai hpe mahtang mari kau dat ai.Ndai zawn mabyin ni mung byin chye nga ai.Ndai gaw gara wa grau ahkyak ai ngu ai hpe nchye myit ai majaw re.

Daini na kabu gara shiga hta Martha hte Maria yan nau a lam hpe hti na la lu ga ai.Martha gaw mungkan lam hta kyin taw nga ai hte Maria gaw Madu Yesu a mungga hpe madat hkam la ai lam na la lu ga ai.Madu Yesu tsun ai gaw Martha Martha nang gaw amu law law a majaw myitru nna tsang nga ndai.Rai timung ra grau ai lam gaw langai sha she rai nga ai.Maria gaw kaja ai kum htaw lata la nu ai, nga nna tsun da nga ai.

Anhte shinggyim masha ni yawng a myit mang ai lam gaw bung ai hpe mu mada ai.Kaning re ai  gaw bung a ta nga yang jahpawt yup rawt ai hte myi lahkawng hpaw dat ai hte rau hpa baw galaw ra ai,gara de sa ra ai ,bungli mahkrun lam  hpe sha myit ai.Bai nna hpawt de hpa lu na,hpa sha na,myitru myit tsang ai hte myit hkyi ba lit li ai,ndai zawn myit tsang ai lam ni hta anhte masha ni yawng bung ai hpe mu mada ai.Rai kun? Teng ai kun? Madu Yesu tsun ai hpawt ni na matu hkum tsang u,hpawt ni gaw dai hpe tsang na ra ai,nga nna tsun da nga ai. Rai timung anhte gaw Wenyi mahkrun lam hta grau nna hkum hkrang a ra sharawng ai mahkrun lam hta grau nna madung dat  let shakut ai,kyin ai gaw mara nan rai mat sai.Daini na kabu gara shiga a marang e hkum hkrang mahkrun lam hta grau nna Wenyi makam masham hkrun lam hta grau nna madung dat let shakut ra ai hpe bai shadum  ya  nga ai.Hkum hkrang a lam kyin ai hta Wenyi mahkrun lam hta kyin ai gaw  kaja dik mahkrun lam re.

Dai ni anhte ni mung gara mahkrun lam a majaw myitru myit tsang nga ai kun? Gara mahkrun lam gaw kaja ai n kaja ai ginhka la yak nga ai hte lata la yak nga ai kun? Myit yu ga.Dai ni na Madu Yesu a mungga hta anthe lata la ra ai lam gaw sumsing mahkrun lam re ai hpe madi madun nga ai.Dai rai yang daini anhte sumsing hkrum lam a matu kade wa myitru myit tsang ai hte kade wa shakut taw nga ai kun?Anhte hti lai wa sai laika hpe bai galam yu ai zawn tinang galaw lai wa sai lam ni hpe mung bai sawn sumru yu yang mahtai mu na re.Dai mahtai hta mahta nna ngai kade ram naw shakut ra ai hpe mu mada ai hte maren matut shakut sa wa ga.Karai Kasang ra sharawng ai mahkrun lam hta hkawm sa lu na matu ra ai chyeju ni hpe matut hpyi la ga.

Fr.Augustine Hka Mai Brang Htoi