Hkungran Num kaga la hte nga mat ai – ngam nga ai La wa sacramentu chyeju kumla ni hpe hkam la main a kun?

Hkungran Num kaga la hte nga mat ai – ngam nga ai La wa sacramentu chyeju kumla ni hpe hkam la main a kun?

Monica  Maran Ah Dim, chyenan lawk, Nmauk Jau Ginwang, a ga san hpe htai ya na nngai.

Ga san: Hkungran Sacramentu hte rau de sai dinghku hta Madu jan gaw la kaga la nna nga mat ai. Ngam nga ai madu wa ngu na wan um mung bai kahtap laai lam nnga ai. Dai la wag aw sacramentu chyeju kumla ni hpe hkam la main a kun?

Dai ngam nga ai madu wa ngu na wa gaw, Sacramentu chyeju kumla ni hpe hkam la mai nga ai. Rai tim shi hkum nan shut nna byin wa ai mang hkang nrai na grai ahkyak nga ai.

Nawku hpung a Canon Law rit kawp upade c. 1321 hta tatut mu mada ai hku chye nga ninglen dingsang shut ai ni hpe sha mara a dam hkam la ra ai hpe matsun hkang da ai.

Tinang a maga de nna shut ai lam nnga ai sha, masha kaga shut ai mara a matu kadai hpe mung dai mara dam hpe nmai jaw ai.  Nmai hkam la shangun ai. Mungkan mungdan shagu mung dai tara hte maren masha uhpung uhpawng hpe woi awn taw nga ai rai.

Daimajaw ndai ga san na hte maren nga yang Madu jang ngu na la kaga bai la mat ai num jan sha sacramentu chyeju kumla ni hpe nmai hkam la ai. Pat shingdang hkrum ai. Catholic Nawku hpung kaw nna gaw shapraw kau ai lam nnga ai.

Nawku Hpung a upade Canon Law c. 1055 hta Hkungran ai ngu ai la the num Ga shaka hkam ai, hkungran ai yan myit hkrum let prat tup rau kanawn mazum na, langai the langai a matu galoi mung kaja di kai hpe myit nna garum shingtau la hkat na, kasha matu mara shangai shaprat na, shangai shaprat la lu ai tinang a ma ni hpe Karai Kasang a mungga the mungkan hpaji sharin ya lit, ndai lam ni yawng gaw langai sha rai nna hkungran Sacramentu chyeju kumla a lachyum majing rai nga ai.

Dai majaw kalang hkungran sai ni gaw prat tup rau kanawn mazum na the shada sadi dung rai hpe mung galoi mung myit dum nga ra ai. Catholic Nawku Hpung hta hkungran gas haka hkam la sai dinghku num la ni gaw tinang a ga sadi gaska hpe galoi mung nhkoi nhkyet mat ai mas the galoi mung Makai hkak gahkyin gumdin nga ra ai hpe Canon Law c. 1056 hta matsun hkang da nga ai.

Hkungrarn ga shaka hkam la nna Sacrmentu chyeju hkam la sai kanu kawa dinghku num la ni shada da sadi dung ga. Manu shadan hkat ga. Tinang a ningrum ningtau wa jan a matu galoi mung kaja dik myit hpe bang da garum la nga ga. Shut shai ai ten hta shada mara raw hkyam sa jaw makawp maga nga ga.

Ndai hta Waingmaw Jau Ginwang Jam Ga marre na Esther Dashi Hkawn Ra a ga san hpe matut htai dat ya lu ai. Kanu yan kawa gaw catholic htung the maren hkungran ta matut Sacrementu hkam da ai. Raitim hka mat ai. Kashu kasha ni Jau Mama tai mai na kun? Kanu kawa ni a mara a majaw kasha ni hpe mai kaja ai lam, rawt jat lam hpe pat hkum shingdang na gaw n tara ai lam rai nga ai. Dai zawn re kanu kawa ni catholic htung the maren hkrak hkungran sai ni a kasha ni Jau Tai na Mama tai na hpe pat hkum da ai lam nnga ai. Langai mi gaw nga ai. Hkungran Sacramentu chyeju kumla hkam da ai lam nnga ai dinghku na kasha ni hpe gaw anhte Myitkyina Saradaw Ginwang hta ya ten du hkra Jau Tai Mama tai na hpe naw jahkring da ai.

Hpang jahtum ndai mabyin  ni hta madu wa ngu na wa chyeju kumla ni yawng hpe mai hkam la ai. Hka bra mat ai kanu yan kawa a kasha ni Jau Mama tai na mai nga .i