Hkungran Da Ai Ni, Si Hka Mat Ai Hpang, Dinghku Bai Nde Ai Rai Yang, Sakramentu Naw Hkam Mai Ai Kun?

Anhte kahtawlik hpung masha langai mi ti nang a hkungran num, la hte lam a myu myu a majaw hka mat n na kaga hpung jan shing nrai nat jaw jan tai nna dai hpang madu jan/wa si mat ai shing n rai lam a myu myu a majaw dai num/ la hte bai hka mat n na kaga dinghku bai n de ai sha ti nang hkrai nga yang kaning re mara dam lu ai baw kun. mara kaba lu ai kun.mara raw shakrammentu hpe shaning kade na ten du hkra n mai lu ai baw kun.bai n na ti nang a num / la si mat ai shing nrai hka mat ai nna kahtawlik de bai gale shang wa ai dai gaw mara kade dang kaba ai kun .bai nna anhte hpung kaw na ganing re ari dan hpe hkam la ra ai kun .chye ju hte htai ya rit wa jau. Waimaw jau ginwang jamga mare kaw nga n na ya ten miwa mung htingshung kaw du nga ai Easter Dashi hkawn ra gaw a ga san hpe htai ya na nngai.

  • Kahtawlik Hpung masha langai mi gaw hkungran ga shaka hkam da sai rai yang, si hka hta lai nna kaga dinghku bai n mai de sai, ngu Kahtawlik Nawku Hpung sharin shaga ai. Dai majaw gaw hpu nau wa san ai, kaga jan bai tai ai nga tsun ai. Shawng na hkungran da ai ga shaka gaw htani htana ga shaka rai nga ai. Shi a ningrum ningtau sak naw hkrung nga dingsa gaw kaga dinghku bai n mai de sai.

Lam amyu myu ngu tsun da ai hpe mahta nna, ningrum ningtau wa si mat nna kaga jan bai tai ai hku sawn la nna sumru yu ga. Si hka hka ai rai yang gaw kaga dinghku bai mai de ai. Raitim, tinang dinghku bai de na wa gaw masha jan/ masha la n mai rai ai. Dinghku n shang shi ai wa, shing nrai, dai si hka nna ngam taw ai wa zawn re ai masha hte sha mai hkungran ai.

Kalang hkungran da sai ni, shanhte a ningrum ningtau wa si hka hka mat ai rai yang, dai si mat ai wa, kaja wa si sai ngu ai sakse madun dan ra ai. Rai yang she, Kahtawlik Nawku Htung hte hkungran sakramentu bai mai hkam la ai.

Ga san hta gaw kaga dinghku bai de ai, shing n rai, nat jaw tai mat ai nga tsun ai. Dai hpang shi hpang kalang bai la ai ningrum ningtau hte mung bai hka mat ai nga ai.

Shawng de tsun sang lang dan sai hte maren, shawng na lang hkungran da ai wa n si shi ai rai yang gaw dinghku kade lang mi bai de de, Sakramentu bai n mai lu sai. Lama na shawng na ningrum ningtau wa si mat ai rai yang gaw ngam nga ai wa Kahtawlik makam de bai gayin wa ai rai yang, nawku hpung matsun hte maren hkan shatup nna Sakramentu ni hpe bai mai hkam la lu ai rai nga ai. Hkungran Sakramentu hpe mung bai mai hkam la ai.

Bai hkungran ai ngu myit la nna bai sumru ga. Dai bai hkungran ai gaw Kahtawlik Nawku hpung a sharin shaga, matsun lam hte maren hkan nna hkungran sakramentu bai lu ai wa a ningrum ningtau e si hka bai hka da hkrum ai. Ndai lang gaw shi dinghku bai n de sai nga ai. Dinghku n de sana mi rai rai, bai de na rai rai, si hka hka hkrum ai wa gaw Kahtawlik nawku hpung e sharin shaga lam matsun ai tara hte maren sak hkrung nga sa ai rai yang Sakramentu ni hpe matut hkam la mai ai. Kahtawlik Nawku htung tara hte nhtan sai ai hku dinghku bai de ai rai yang gaw Sakramentu bai n mai hkam la ai.

Kahtawlik de bai gale shang wa ai hte seng nna gaw shawng na ga san ni hta mung tsun da sai hte maren, makam n bung ai ni kaw dinghku sang mat ai masha mi rai rai, hpu nau hpung masha mi rai rai, makam n bung ai ni mi rai rai, nat jaw mi rai rai, Kahtawlik makam hpe hkap la kam sham, hkan sa tara ni hte maren nga sa na rai yang gaw kadai rai tim, Kahtawlik Nawku hpung sharin shaga lam matsun ai hta hkan nang hkan sa ai rai yang gaw galoi mung hkap la ai rai nga ai.

Dai zawn re ai masha ni mara kade kaba ai gaw Karai Kasang she daw dan na ra ai. Nawku hpung kawn ari dan gara hku jaw ai ngu gaw n masat da ai. Ari dan mung n jaw ai. Kahtawlik makam masham hta sak hkrung sa lu na matu lam matsun lam woi sharin shaga ai lam hpe gaw Kahtawlik Nawku hpung kawn lit la galaw sa wa na rai nga ai.

By Fr. Patrick Gawmaw Hkawng Yae

Add new comment

9 + 4 =