Hkristmas Ladaw Hpaw Hpang Mungga, Shaning C, 2021

Hkristu hta tsaw ra ai nu wa hpu nau ni e, anhte Kahtawlik Nawku Hpung A Nawku Daw Jau Shaning a “Du Sa Ladaw” htum ai hte rau gaw “Hkristmas Ladaw” de du shang wa saga ai.Hkristmas ladaw hta anhte Hkristan ni yawng gaw kaga poi lamang ni hta grau nna kabu pyaw ai hku hkam sha chye ga ai. Laklai ai lam langai ngai hpe hkam sha chye nga ga ai.

Anhte a hkam sha lam gaw, nsin htawng hta rawng nga ai anhte hpe hkye la na, nhtoi jaw ya na, shalawt dat ya ai hkrum sana ngu hkam sha ai gaw Hkristmas a namchyim nan rai nga ai.“Mungga gaw shinggyim hkum hkrang dagraw la nna, chyeju hte teng man ai hpring let anhte hta nga nga yu sai. Anhte gaw shi a hpung shingkang hpe mu lu sagaw ai. Dai hpung shingkang gaw Kawa Karai Kasang a Kasha shingtai ngu ai hpe shi hkam la lu ai lam rai nga ai” (Yh 1:14).

“Rai ti mung, nkau mi shi hpe hkap la kam sham ma ai rai nna, shi gaw shanthe hpe Karai Kasang a kasha ni tai lu ai ahkang jaw mu ai” (Yh 1:12) Karai Kasang, anhte zawn sha shinggyim hkum sa la ai gaw anhte Karai Kasang a kashu Kasha ni tai wa lu na matu yaw shada ai rai nga ai. Dai re majaw gaw anhte ndai Hkristmas hta kabu pyaw ai lam hkamsha ga ai rai nga ai.

Nawku Hpung labau hta Hkristmas Poi labau gaw jau dik poi ni hta na langai rai nga ai gaw teng sha rai nga ai. Moi shawng na Hkristan Nawku Hpung kata hta Poi kaba langai sha nga lai wa ai. Dai gaw Paska poi ngu ai Madu Yesu bai hkrung rawt wa ai poi kaba rai nga ai. Ndai Poi hpe laban shani shagu Paska Poi kaji hku galaw ai ngu hkam la lai wa ma ai. Hpang daw de Hkristmas Poi kaba hpe January 6 ya shani hta masat galaw lai wa ma ai rai tim, Nawku Hpung kata, Mungkan madang galaw ai gaw n rai nga ai.

Yesu Madu, Yawdan hka hta, Yawhan Baptista a lata kaw kashin kamun hkam la ai masat dingsat hte Cannon mare na hkungran poi hta hka hpe tsabyi shatai ai masat dingsat hpe gaw rau gumprawn nna galaw lai wa ma ai.

Shaning 330 na ai hpang gaw Yesu Madu shangai wa ai Hkristmas Poi nhtoi hpe, Roma mare kaw na Hkristan ni, December 25 ya shani galaw hpang wa ma ai. Shahte gaw tara maigan ni a “Jan a awng padang nhtoi” hpe kaja ai yaw shada masa hku nna galaw lai wa ai masa hta nga ai, ngu sawk shagawn da ma ai.

December 21 ya shani gaw shaning tup a kadun dik nhtoi rai nga ai. De a hpang shani nhtoi ni hta gaw nhtoi grau grau galu wa ai. Roma mare kaw nga ai tara maigan ni gaw December 25 ya shani hpe nsin e ndang lu ai Jan a nhtoi poi hku masat da ma ai.

Hkristan ni gaw Yawhan tsun ai hte maren, Hkristan shagu a Jan shingkang Hkristu Madu a shangai nhtoi hpe dai shani galaw yang htap htuk dik rai nga ai ngu hkam la lai wa ma ai. “Dai nhtoi gaw mungkan ga de du sa nna, masha nlang hte a ntsa e jahtoi ya ai nhtoi majing rai nga ai” (Yh 1:9)

Nat jaw ai tara maigan ni gaw yat hte yat rai nna Hkristan masha ni tai wa ma ai. Shanhte gaw Jan bai shangai wa ai nhtoi hpe malap mali wa let Hkristu a shangai nhtoi mahtang daini du hkra galaw nga ai. Hkristmas Ladaw hpe December 25 ya shani hpang ai rai nna, January 6, “Hkawhkam Masum Poi (Ephapany) nhtoi hta jahtum ga ai.

Hkristmas poi hte shaning ningnan lapran na laban hpe gaw, “Chyoi Pra Ai Htinggaw Poi” hpe galaw ga ai.Shaning ningnan nhtoi hta gaw, shaning ningnan hte rau “Karai a Kanu Nu Maria Poi” hpe galaw ga ai.Hkristmas ladaw hta kaga poi masum hpe mung myit dum galaw ga ai. December 26- shawng ningnan sat hkrum ai San Pra ai Stephen a Poi, December 27- Chyum Laika Sara San Yawhan a Poi, December 28- Ma Yesu hpe sat kau lu hkra Herod hkawhkam wa e masin jahkrat nna sat kau hkrum ai sasana ma ni a poi nhtoi ni rai nga ai.

Hkristmas ladaw gaw Kahtawlik Nawku Hpung a nawku daw jau shaning ladaw ni hta na kadun dik ladaw raitim, anhte a hkye la Madu du sa ai ladaw re majaw gaw grai nan lachyum rawng lachyum sung ai ladaw rai nga ai.Hkristmas ladaw gaw kadun dik ai rai tim, anhte a hkye hkrang la hkrum lam hpaw hpang ya ai re majaw lachyum sung la nga ai.

By Fr. Patrick Gawmaw Hkawng Yae