Hkristan Hpung Nkau Ni Hpa Majaw Wudang Masat N-galaw Ma Ai Kun?

1. San: Mung kan ntsa makam masham hpung grai law ai hta na kahtawlik nawku hpung  masha shagu  gaw akyu hpyi yang hkristu a udang masat hpe  galaw  nga ai. kahtawlik hpung ni gaw hkrung ti mung si wa ai shani rai ti mung  madu yesu a u dang hpe nawku hkung ga shagrau nga ga ai. Kaga hkristan hpung masha ni gaw Asak naw hkrung nga ai aten hta hkristu a udang hpe masat galaw hkung ga shagrau ai lam n nga, si wa ai shani sha lup de  sa wa ai shaloi she hkristu a udang hpe hpai sa chye ma ai  hpa majaw dai zawn rai shai hkat nga ga ai kun naw sang lang dan rit. Mogaung jau gin wang Natkyi kone lawk kaw shanu nga ai  Teresa Galang lu tawng a ga san hpe htai ya na nngai.
2. Kawa Kasha Chyoi Pra ai Wenyi a Mying Ningsang hta ga san san ai Teresa Galang Lu Tawng e, anhte Kahtawlik nawku hpung a makam hta Sign and gesture ngu ai hkrang kumla hpe mung grai manu shadan jai lang ga ai.

Wudang masat galaw ai gaw anhte Kahtawlik ni sha n rai nga ai. Hpu nau Anglican Hpung ni mung galaw ma ai re.

Wudang masat galaw ai gaw atai masum Karai langai rai nga ai Kawa Karai Kasang, Kasha Karai Kasang, Chyoi Pra Ai Wenyi Karai kasang hpe myit dum na matu, Shia makaw maga shaman chyeju hpe hkam la ai rai rai nga ai.

Wudang masat galaw ai gaw Yesu Madu wudang ntsa e shi hkam nna mungkan ga hpe hkye la ai hpe myit dum hkungga shagrau ai kumla mung rai nga ai. Wudang masat galaw ai gaw awng padang masat galaw ai mung rai nga ai.

Ga Shaka dingsa prat hta Egutu mung hta Israel myu sha ni mayam prat hku nga lai wa ma ai. Dai mayam prat kaw nna shalawt ya na matu Karai Kasang gaw shanhte a nta shagu hta sagu hpe sat nna nta chyinghka kaw chya da na matu matsun ai. Dai matsun lam hpe n hkan nna nta chyinghkra kaw sagu sai n chya da ai ni yawng hpe Madu a lamu kasa jeyang kau ai lam na lu ai. Dai matsun hte maren hkan galaw ai Israel myu sha ni Karai Kasang a jeyang ai kaw nna lawt lu ma ai.

Ga Shaka Ningnan Prat hta gaw Madu Yesu wudang ntsa si hkam ai a majaw mungkan masha yawng hkye hkrang la lu sai re ngu anhte Kahtawlik nawku hpung hta makam ngaa nga ai. Dai maajaw Yesu madu wudang hta jan noi si hkam ai hpe manu shadan hkungga lara di ai kumla hku nna, wudang sumla hpe masat ai, wudang hpe dum nta ni hta, nawku tawn ni hta, lup wa ni hta, nawku jawng ni hta, tinang a hkum hta shakap da, gali da ai lam ni galaw ga ai.

Wudang masat galaw ai, wudang hpe jai lang ai a labau law law nga nga ai.

Tsa ban masum a hpang Constantine hkawhkam a prat hta shi a kanu Helena a shingran hte maren wudang hpe shi a hpyen ni hpe gasat ai hta jai lang ai laknak arung arai mahkra hta wudang shakap nna gasat ai shaloi hpyen ni hpe awng dang kau ai lu labau nga nga ai.

Hkristan ngu ai n nga shi ai shaloi, wudang kumla gaw Roma daru magam hpe ninghkak ai ni hte asawng asang galaw ai ni hpe zingri sat ai kumla kaba mung rai nga ai. Hkristan ngu ai Madu Yesu gaw de da ai Nawku Hpung paw pru wa ai aten kaw nna gaw dai wudang kumla gaw masha hpe akyu jaw ai, shaman ya ai, satan hpe dang kau lu ai kumla tai wa ai rai nga ai.

Wudang masat galaw ai shaloi Kawa, ngu tsun ai shaloi, kahtan kaw lata madi ai; Kasha ngu tsun ai shaloi, sinda ka-ang kaw lata madi ai; Chyoi Pra ai ngu htsun ai shaloi pai maga lahpa shawng kaw lata madi ai; Wenyi a ngu tsun ai shaloi hkra maga lahpa shawng kaw lata madi ai, Mying ningsang hte, Amen ngu tsun ai shaloi pai hkra lata lahkawng yang hpe sinda shawng kaw hkrum pawng dat ai rai nga ai. Ndai hkrang kumla hpe Kahtawlik ni hte rau Anglicans ni hte Protestants nkau ni mung galaw ai rai nga ai.

Lahkawng lang ngu na Council of Nicea (A.D. 787) hta Orthodox hte Kahtawlik ni, dai wudang kumla gaw sak jaw wudang re ai majaw Nawku Jawng ni hta, chyoi pra arung arai ni hta, Misa nawng jau ai shaloi hpun ai chyoi pra bu hpun palawng ni hta, dum nta ni hta, lam n tsa ni hta shakap da mai ai lam myit hkrum daw dan da ma ai rai nga ai.

Wudang masat n galaw ai hpunau Hkristan hpung ni gaw shanhte a makam shahte hkam la ai hta hkan nna wudang masat n galaw ai rai na re. Kahtawlik Nawku Hpung hte rau wudang masat galaw ai hpunau Hkristan hpung ni gaw wudang masat kumla e madun dan ai shi a rupawt madung rai nga ai, Trinita Karai Kasang, atai masum Karai langai karai kasang hpe mung, Yesu Hkristu a nni nkri hkam si hkam nna mungkan ga hpe hkye hkrang la ai hpe mung myit dum nga na matu rai nna, dai anhte a makam masham mungsung lam ni hpe myit dum hkap la kam sham ga ai ngu ai lachyum hte wudang masat galaw ai mung rai nga ai.

By Fr. Patrick Gawmaw Hkawng Yae