Hkristan Hpung Masha Ni Lata Maka Mai Yu Ai Kun?

1. Madu yesu a hpang hkan ai kasa ni ka da ai chyumlaika hta, gam maka hte seng nna hkaw tsun ai lam, Ka da ai hpe langai mi mung n mu lu ga ai rai yang dai ni mungkan hta ga lang tsun shaga lang ai ga hta gaw gam maka ngu ai ga si hpe lo law jai lang ga ai. rai yang Gam maka ngu ai hte shaman chyeju a lam hpe htai ya rit.  Sang lang daw Ga Shadawn,Tinang ta tut shakut shaja galo yang hkrak sha lu na tinang ta tut shakut galo let shi madu hpang de hpyi ai rai yang shaman ya na lam, jaw ya na lam matsun da ai.
   Bai nanhte kade hpyi tim gam n kaja yang gaw nlu na re nga nna n sharin ya ai. Ga shadawn, shan gaw grai tsawra hkat nna kun ding hku de, kasha mung lu nna, shan gaw shan lahkawng grai tsawra hkat ai lam hta n shakut mat nna, dinghku kata hta mayak a myu myu a majaw hka bra mat ai; dai hpe mung, shi hte Gam maka n rum ai majaw nga tsun ai. Ga shadawn langai bai: Shan gaw dai tsawra myit hta grai tsawra manu shadan let shakut shaja let kunding hku hta hpa mayak lam a myu myu nga tim manu shadan tsawra myit hte majung shakut shaja let lot lu let shakut matut de sa lu ai rai yang shaman chyeju rai nga ai. Ndai ga san hte bung ai kaga langai mi gaw, Wa Jau anhte hkristan hpung masha ni gaw lata maka mai yu ai kun? lata maka yu yang mara lu ai kun? chye ju hte naw htai ya rit. Waimaw jau ginwang, Maga Yang hpyen yen hta nga lai wa nna, ya waimaw maina hta shanu nga ai Yaw Han Shawle marip La Nu a gasan hte Shata pru jau ginwang manhkring lawk (12) kaw shanu nga ai Rosa Lasang kai hpa a ga san hpe gumhpawn nna htai ya na nngai.

• Kahtawlik Nawku Hpung a tara laika hta, garan ginhka shangun ai lam yawng hpe Nawku Hpung n hkap la ai. Nat satan kaw na re ai majaw rai nga ai (CCC 2116).

N mu mada lu ai lam ni hte matut mahkai ai lam ni gaw anhte kaw nga taw ai teng ai. Karai Kasang a tara kanu lam (10) hta na tara masat langai hta “Ngai gaw na Madu Karai Kasang rai nga nngai, Ngai hta lai nna kaga Karai Kasang shaje hpe hkum naw hkum ku e, ngu tara nga nga ai. “Dai Madu na a Karai Kasang hpe na a myit kraw lawang mahkra hte, na a myit masin mahkra hte, na a myit mang mahkra hte nang tsaw ra lu na rai ndai,” (Mt 22:37) “Nanhte a tawn hkungri ntsa na wan hta nanhte a shayi shadang sha ni hpe shagu hkungga nat nawng lu na n rai; nanhte a amyu masha ni hpe shaba wawt ai, lamik kumla myit mada ai, ahkyu hkyu ai amu ni hpe hkum galaw shangun myit; mandan bau ai hte si ai masha a tsu minla hte ga shaga ai mung shanhte hpe hkum galaw shangun myit. Dai zawn re ai matsat shabat amu galaw ai amyu masha ni hpe dai Madu nanhte a Karai Kasang n dawng nga ai; dai majaw nanhte rawt lung wa myit dai shloi dai masha amyu ni hpe shi shaden ya nga ai” (Tara Jahprang 18:10-12).

“Hkawhkam Shawlu gaw dai Madu hta sadi n dung mat ai majaw si mat ai. Shi gaw dai Madu a hkang da ai ga hpe n madat ai sha shi hpe lam woi la na matu, dai Madu hpe san la na malai si mat sai wenyi minla ni hpe san wu ai majaw dai madu gaw shi hpe sat kau nhtawm mungdan hpe mung Yese a kasha David a lata de ap kau ya wu ai,” (1 Hkawhkam labau 10:13-14).

“Kam sham sai ni hta na law law mung sa nna tinang galw shut ai lam ni hpe tawngban tsun dan ma ai. Lakle mandan bau sha ai ni law law mung, shanhte a laika ni hpe la sa nna masha yawng a man e nat kau mu ai. Dai laika ni a manu sawn yu yang gumhpraw dengga mun manga ging malu ai,” (Kasa 19:18-20).

Minla ni hte matut mahkai ai rai yang Karai Kasang hpe kam hpa ai hta ningra wa ai; Karai Kasang hte matut mahkai ai aten n lu jaw byin wa na; dai zawn aten n jaw ai rai yang gaw Karai Kasang hta kam sham lam yawm htum mat wa na sha rai nga ai.

Makoi magap taw ai lam ni gaw wenyi lam hte seng ai ngu nna tsun mai ai; dai lam ni gaw anhte hpe lam shadam ya lu ai, lagawn lamawn byin shangun lu ai. Grau nna gaw Karai Kasang hta kam sham kam hpa ai myit hpe shamat kau ya chye nga ai. Ramma ni hte ma kaji ni a myit hpe mung jahten kau lu ai. Makam masham ngu ai hta gam maka hpe kam ai hpe tsun ai n rai nga ai. Karai Kasang hpe kam sham ai, Shi hte seng ai lam ni hte Shi a sharin shaga ai lam ni hpe kam sham ai hpe tsun ai rai nga ai. Karai Kasang kaw na lu la ai gaw gam kaja ai majaw lu la ai n rai nga ai. Karai Kasang jaw ya ai majaw, anhte hkam la grin ai majaw rai nga ai.

“Karai Kasang hpe tsaw ra nna shi a shatawng shada ai hte maren shaga la hkrum ai ni a matu mara yawng mayawng hta mai kaja ai lam byin wa u ga, Karai Kasang gaw shanhte hte rau amu galaw nga ai hpe anhte chye ga ai,” (Roma 8:28).

“Gam maka” ngu ai ga si hpe gaw lang ga ai; tsun mung tsun chye ga ai; Raitim, anhte Kahtawlik makam masham hta dai “gam maka” ngu ai hpe hkap la kam kaba ai rai yang shawng de tsun dan sai hte maren Karai Kasang a chyeju ngu ai hpe n kam ai tai wa ai; Kawa Karai Kasang a hpan da magam, Kasha Yesu Hkristu a hkye hkrang la magam hte Chyoi Pra ai Wenyi Karai Kasang a myit jahtoi ya ai lam ni hpe kam sham ai ngu anhte Kahtawlik ni hkam la kam sham ai lam lachyum n pru tai wa na rai nga ai.

Kaja wa nan sha mung Yawng mayawng gaw Karai Kasang kaw nna hpang wa ai rai nga ai. Kaman kaw nna shi a shi byin wa ai gaw hpa n nga ai. Yawng gaw Karai Kasang kaw na hpang wa ai; Karai Kasang lajang ai hku sha rai nga ai.

Gam maga ngu ai gaw anhte n mu lu ai lam rai nna, dai anhte hta byin wa na lam yawng gaw anhte n mu lu ai kaw na byin ai lam ni mi raitim, Karai Kasang kaw na sha rai nga ai. Karai Kasang kaw na n rai yang gaw Satan kaw na rai na. Satan kaw na gaw anhte hta kaja ai ngu hpa n nga ai rai nga ai.

By Fr. Patrick Gawmaw Hkawng Yae

#rvakachinservice