Francisco hte Jacinta Marto Yannau a Poi Nhtoi (February 20)

Francisco hte Jacinta Marto Yannau a Poi Nhtoi (February 20)

Francisco Marto gaw, lai wa sai 1908 ning, June shata (11) ya shani shangai chyinghkai wa ai rai nna, Jacinta Marto gaw, 1910 ning, March shata (11) ya shani shangai chyinghkai wa ai rai nga ai. Shannau gaw, Porturgal mungdan, Fatima Mare makau na, Aljustrel kaw dai daw wa ai yan rai nga ai. Shan nau a kanu yan kawa gaw, Manuel hte Olimpia Marto yan rai nga ai.

1917 ning, May shata (13) ya shani kawn, October shata (13) ya shani laman, Portugal Mungdan, Lisbon mare kaba a dingdung maga deng (110) daram tsan ai, Aljustrel, Fatima mare makau, Cova da Iria hta e, sagurem ma kasha marai (3) gaw, Nu Maria dan pru dan ai hpe mu lai wa masai. Dai ma ni gaw, Francisco, Jacinta hte Lucia ni rai nga ma ai. Lucia gaw, shannau a lawu lahta kahpu kanau rai nga ai. Dai ma ni marai (3) kaw Nu Maria sa dan pru ai aten hta e, Uropa dan gaw, mung masa n ngwi n pyaw rai taw ai sha n-ga, 1910 ning hta, Portugal Mungdan mung, Hkawhkam Uphkang ladat hpe jahten kau ai hpang mungdan n sim n sa byin taw ai aten mung rai nga ai. Kade nna yang, Asuya gaw, Nawku Hpung a wuhpung wuhpawng ni hpe mung jahten shaza kau ya sai rai nga ai.

No (1) Nu Maria dan pru ai aten hta, Nu Maria gaw, dai ma ni marai (3) hpe shata shagu a nhtoi (13) ya ngu na shani du shagu, shata (6) tup dai shara de sa wa na matu hpyi lajin lai wa ai. Nu Maria gaw, shanhte hpe “Mungkan majan ni zim mat nna simsa wa lu na matu” Rosary hti chye hkra hkaja la na matu hpyi lajin lai wa ai. 1917 ning, October shata (13) ya shani, Nu Maria hpang jahtum dan pru ai aten hta, dai Fatima hta e Masha marai 90,000 daram du hpawng lai wa sai rai nga ai.

1918 ning, October hta Tukkwi ana zinli hpan langai mi gaw, Europa Mungdan ting ngu na hta byin hkrum lai wa ai majaw, kabu hpa lam ni kawn, yawn hkyen lam ni bai du pru wa sai rai nga ai. Dai ana zinli hpe Francisco hte Jacinta yannau mung hkrum sha lai wa sai. Shaloi Jacinta gaw, Lucia hpe, anhte a Hkawhkam Jan gaw, Franciso hpe sa woi la na ra ai ngu tsun dan wu ai. Kaja wa, Francisco gaw, dai Tutkwi Ana byin nga ai ten, Madu hta yup pyaw wa sai rai nga ai. Shi a Hkum tsawp moi maang hpe Nawku Hpung Lupwa hta makoi mayang da let, 1952 ning hta gaw, Fátima Mare na Basilica Nawku Htingu de bai lup makoi mayang da sai rai nga ai.

Kahpu n nga mat ai hpang, Jacinta hkum nan mung, Jacinta gaw, Ourem na, Vila Nova ngu ai tsi rung de htawt nna tsi tsi hkam la lai wa sai. Ya na zawn, machyi ai majaw, Lucia hte kaga ga garan da ai hpe shi grai n ra sharawng lai wa sai raitim, shi a machyi makaw tsin yam lam ni hpe Madu hta hkam sharang ap nawng ai re ngu myit awai la lai wa sai. Dai tsi rung hta shata (2) tsi tsi hkamla tim, tsamai wa ai lam n nga ai majaw, dum nta de bai nhtang wa mat ra sai. Shaloi, ginwang up Jau mung, yupra ntsa kaw hkringsa let kyu hpyi nga na matu hpaji jaw lai wa ai hte maren, kade mi nkam tim, rawt nna shanhte hpe ga shaga lai wa ai, nga nna labau hta ka matsing da nga ai.

Dai hpang, Jacinta hpe Lisbon de tsi tsi na matu woi sa manu ai. Raitim, dai shara du yang she matsan jahkrai ma hpa rai mat ai, hpa majaw nga yang, dai tsi rung hta e, yup-ku nman mat ai majaw rai nga ai. Dai zawn re ai masa hta raitim, Jacinta gaw, grai pyaw ai, hpa majaw nga yang, shani shagu Madu a Chyoi Pra Hkum hpe hkam la lu nga ai majaw rai nga ai. 1920 ning, Feb praw (2) ya shani hta, hpang jahtum Estfania Tsi Rung de sa nna tsi tsi hkam la lai wa sai. Dai shara hta shi grai n pyaw ai hte shingtai garen lam ni hpe hkam sha lai wa nu ai. Feb (10) ya shani hta, shi a garep nra lahkawng hpe shaw kau ra mat nu ai. Gade machyi kaba hkrum tim aput angun ai lam n nga hkam sharang lai wa sai.

Jacinta gaw, dai kaw lit ang ai hpawmi langai hpe, Hkawhkam Jan gaw ngai hpe sa dan pru ai hte kade nna ai ten ngai hpe sa woi la na re lam tsun dan nu ai. Bai ngai a wunma mung mai mat sana re da, nga nna tsun dan nu ai. Shingrai, Feb (20) ya shana maga de, hpang jahtum namman sau chya Sacramentu hpe hkam la nu ai. Wajau kaw mara raw ai shaloi, Wajau ngai hpe hpotde Chyoi Pra hkum hpe bai la sa wa ya rit yaw ngu htet tsun dat ai raitim, dai shana jang, Madu hta yup pyaw wa sai rai nga ai. Shi a hkum tsawp moi mang makoi mayang ai shani, Di-u hpe hpaw yu ai shaloi yawng mau mat ma ai, nga ai. Dai gaw, Jacinta a moi mang gaw, asak hkrung taw ai zawn re ai nsam hte rai taw nga ai majaw rai nga ai. Shi a machyi makaw wunma ni hpe grai manam hawm ai nampan sama hte galai mat wa sai rai nga ai.

Ndai zawn, shi nnga mat ai (15) ning ram na ai hpang, 1935 ning, September (12) ya shani, Shi a Lupwa hpe bai hpaw yu yang, n hten n-yat ai sha nan nan sha rai taw nga ai hpe mu lu ma ai. Jacinta a hkum tsawp moi mang hpe mung, shi a kahpu Francisco hte rau, Fatima Mare na Basilica Nawku Htingnu kaw e lup makoi da ma ai. Shannau a Lupwa ntsa hta e, “Ndai Francisco hte Jacinta yen nau a hkum tsawp moi mang gaw, shanhte hpe Nu Maria dan pru dan lai wa sai ngu ai lam, anhte hpe galoi mung  shadum ya nga ai” nga nna ka shakap da nga ai.

Jacinta hte shi a Kahpu Francisco hpe 2000 ning, May shata (13) ya shani, dai aten na, San Pra ai Wa Sarabyin Yawhan Paulu (II) hkum nan A lu ai masha yen hku nna, Portugal Mungdan, Fatima mare, Nu maria dan Pru ai shara na, Basilica of Our Lady of The Rosary ngu ai, Rosary a Hkawhkam Jan Nawku Htingnu hta e, shagrau dat ya sai rai nga ai. Dai shagrau hpawng hta, moi shannau hte arau Nu Maria Dan Pru ai hpe mu lai wa sai, Camelite Mama Wuhpung Magam gun mat ai, lawu lahta kahpu kanau rai nga ai, Mama Lucia mung shang lawm lai wa sai lam, labau hta ka da nga ai. Mama Lucia mung, dai shagrau lamang galaw ngut ai hpang (5) ning ngu na hta, Madu kaw yup pyaw ban sa wa sai rai nga ai.

Dai hpang, Shannau hpe, 2017 ning, May (13) ya shani, Wa Sarabyin Francis Hku nna, mi a lu ai masha tang da lai wa sai, Nawku htingnu kaw sha, Sanpra ai masha yan hku nna, tang da lai wa sai hte Shannau a Poi Nhtoi hpe gaw, February (20) shani masat shagrau dat ya sai rai nga ai.

Daini na ten hta dai ma Marai (3) hpe Nu Maria dan pru ai shara, Fatima Mare na Nu Maria Lungpu gaw, Mungkan mungdan shara shagu hkan na ni sa du akyu hpyi bu hkawm shara madung langai rai nga sai re.

Nuwa Hpunau ni, anhte na la lu sai, San Pra ai Francisco, Jacinta hte Lucia ni gaw, ma sha naw raitim, Karai Kasang Wa hpe tsawra hkungga manu shadan ai, Nu Maria hpe hkrit hkungga manu shadan ai lam ni mau hpa rai nga ai. Jacinta mung, Shi a machyi makaw hkamsha ai lam ni hpe, aput a ngun n nga ai sha, Madu hta ap nawng ai lam re ngu myit la nna, hkam sharang lai wa sai lam ni gaw, anhte a matu n gun la hpa rai nga ga ai. Dai majaw, anhte a sak prat hkrun lam hta mung, Karai Kasang Wa anhte hpe hpa tsun taw nga ai, hpa galaw shangun nga ai ngu ai lam ni hpe, San Pra ai Francisco hte Jacinta zawn, myit hpe azim sha rai let, sak hkrung hkawmsa lu hkra shakut sa wa ga ngu, n gun jaw dat n ngai law.

By; Sister Rose Angeline Maran Nang Doi

RVA Kachin Service