Dinghku Num Ni Chyum Jawng Mai Lung Ai Kun ?

San: Anhte catholic nawku hpung hta kun dinghku de sai kawa la ni gaw tara hkaw sara tai chyum jawng mai sa nna, kun dinghku kanu num ni gaw hpa majaw n mai sa lung ai kun? Chye mayu ai majaw san dat lu nngai grai chyeju kaba sai law. Manmaw saradaw ginwang namlim pa jau aseng mung hkawng san luka nawku jawng wang na hpyen yen dabang hta shanu nga ai Magdalena lasang hkawn ra gaw a ga san hpe htai ya na nngai.

• Tara hkaw sara/ Num ni hpe English ga hku “catechist” ngu shaga shamying ai rai nga ai.

“catechumens” ngu ai ga si gaw Kashin Kamun hkam la na matu makam masham lam shangang shakang shajing jachyip la ai hpe tsun ai rai nga ai. Hkristan masha tai wa na matu sharin hkam la ai rai nga ai. Sacramentu hkam la na matu sharin hkaja ai mung rai nga ai.

Nawku Hpung masha ni hta na tara hkaw sara/num mying hkinghtawng hte mungkan shara shagu hta jai lang na matu, Wa Sarabyin Yawhan Pawlu II, 1992 June 25 ya shani tara shang masat dat ai rai nna, dai shaning October 11 ya shani tara shang ndau shana dat sai rai nga ai.

Tara hkaw sara/num ni a lit magam hpe mung Vatican kaw nna masat da ya ai hpe mu lu nga ai. (1) preaching to non-Christians, Hkristan n re ai ni hpe Yesu a lam hkaw tsun na matu (2) Catechizing catechumens and those already baptized, kashin kamun hkam na matu shajin nga ai ni hpe makam masham sharin ya na hte hkam la ngut sai ni hpe mung matut manoi sharin shaga lam woi ya na matu (3) leading community prayer, expecially at the Sunday liturgy in the absence of a priest, shinggyim wuhpung wuhpawng ni hta akyu hpyi woi awn ya na, grau nna Jau n nga ai shara ni hta laban nawku woi awn ya na matu (4) helping the sick and presiding at funeral, machyi makaw hkrum nga ai ni hpe kawan katsan na hte, si mat sai ni hpe makoi mayam na matu (5) training other catechists in special centers or guiding volunteer catechists in thier work, tara hkaw sara/num ningnan ni hpe shapan shalat ya na hte shanhte a magam bungli ni hpe lam woi lam matsun ya na matu (6) taking charge of pastoral initiatives and organizing parish function, Jau ginwang hta sagu rem ginwang up jau hte rau magam bungli ni hpe gunhpai ai shingdep shingtau tai na matu (7) helping the poor and working for human development and justice, matsan mayan ni hpe garum shingtau na matu hte shinggyim bawngring lam hte tara rapra lam ni hta garum shingtau lawm na matu.

Ndai ya tsun sai lachyum htai ai hta naw galaw ra ai gaw nga na nhten. Ya tsun ai lam shanit gaw tara hkaw sara/num ni a madung magam bungli, Vatican kaw nna masat da ai rai nga ai.

Sasana ginra, buga ginra, htunghking masa lam ni hta hkan nna mung tara hkaw sara/num ni a magam bungli jat wa ai lam ni mung nga na re.

Rai yang, Chyum jawng de dinghku de ai num/la hpe ginhka nna na hkap la ai lam gaw galoi mung n ngai lai wa shi lam chyum jawng Up Wa Jau Leo hpe san yu ai a marang e chye lu ai.

Chyum jawng kaw nna gaw yawng hpe hkap la ai lam rai nga ai. Rai ti mung, ma hkum re ai ni, shing n rai, ma chyu n hka shi ai ni, rai yang gaw shanhte hkum nan dai chyum jawng hta masha law law hte rau nga hpaji sharin hkam la na mayak lam a myu myu nga mai nga ai. Bai ma ni a ahkaw ahkang hku bai yu yang mung kanu ni gaw ma ni hte htep lahti nga ra ai rai nga ai. Ma kanu ni n mai sa ai, shanhte hpe n hkap la ai gaw n rai na n hten. Masa lam amyu myu hku maram yu yang nan kanu ni a matu ma hpe tawn kau da nna chyum jawng sa lung mai tim, n htuk n tara ai tai na nhten. Dai hku ngu yang la ni gaw ma hte n seng i ngu san na ma ai. Dai gaw anhte sumru dat yang nan yawng gaw chye na na re ngu kam ai majaw alak mi n tsun sana. Kun dinghku kawa la ni mung, kun dinghku kanu num ni mung ramma shayi shadang shani mung chyum jawng lung ai ai ni grau grau law jat wa u ga akyu hpyi ya let ga san hpe ndai kaw jahkring da nngai.

By Fr. Patrick Gawmaw Hkawng Yae