Dinghkrai akyu hpyi ai hta Uhpung Uhpawng hte akyu hpyi ai gaw akyu grau hkam la hpring tsup ai nga tsun ai na lu ai. Sang lang hkra chye la mayu ai majaw san dat lu ai.

 Dinghkrai akyu hpyi ai hta Uhpung Uhpawng hte akyu hpyi ai gaw akyu grau hkam la hpring tsup ai nga tsun ai na lu ai. Sang lang hkra chye la mayu ai majaw san dat lu ai.

Wuhpung Wuhpawng hte akyu hpyi ai ngu ai hta Nawku Htingnu, Nawku shara ni, shawa hte rau jawm nawku daw jau ai hpe tsun ai. Saradaw Shatai Poi, Jau shatai Poi, Brother hte Mama sanggan la Poi, Jubali Poi, kaga poi kaba ni, zuphpawng kaba ni hta shawa daw tsa hte rau jawm Nawku shakawn ai hpe mung tsun ai. 2017 ning November shata e Wa Sarabyin Francis anhte myen mung de du gawan ai shaloi, Yangoon mare kaba Tuwana bawlung gawdin ginsup Pa shara hta hpung shawa mun sen law law rau jawm nawku ai.

Ndai zawn Uhpung Uhpawng hte rau jawng nawku ai mung grai ahkyak ai. Hpung shawa hte rau jawm Nawku shakawn ai gaw anhte Christian ni, Catholic hpung masha ni gahkyin gumdin myit hkrum ai lam hpe nawku hpung a sharin shaga lam matsun ya ai, chyum mungga hpe grau n’na madang tsaw ai hte lachyum sung ai hte chye na hkap la kam sham lu ai. Missa hkungga jawm nawng ai Nawku Daw Jau kaw rai yang Karia Kasang a mungga hpe shawa uhpung hte rau jawm na lu ai. n’gun atsam hkam la lu ai. Madu Yesu Christu a hkum, Chyoi Pra ai Hkum hpe hkam la lu ai. Wenyi n’gun atsam hpe Chyum Mungga hte mung Madu Yesu a Chyoi Pra ai Hkum hte mung hkam la lu ai. Mahte a Kabu Gara Shiga 6:5 hta nawku daw jau ai hte sawt ai myit hte n’re ai sha Karai Kasang kaw akyu hpyi ra ai lam shawa masha law law hpe Yesu sharin ya ai. Mahte a Laika 4:13, Marku a Laika 1:21-28, Luka Laika 4:16-37, ndai Kabu Gara Shiga ni hta Madu Yesu gaw Ca pa naum mare na Nawku Jawng kaw shawa masha ni hte sa jawm Nawku ai. Karai Kasang a Mungga hkaw tsun dan ai. Machyi ai masha ni hpe shamai shatsai ya ai, ndai mabyin ni hpe mu lu ai.

Madu Yesu gaw Shawa hte rau man man rau jawm nawku lawm ai hpe mung mu chye luai. Madu Yesu shangai wa ai shaloi Chyoi Pra ai Nu Maria hte San Pra ai Joseph gaw ndai lam hpe Luka laika 2:22-39 hta mu lu ai. Nawku makam masha lam hpe masat da ai, Tara lam ni hpe shawa hkhkan ai zawn hkan galaw shatup ai hpe mu lu ai. Luka a laika 2:41-52 hta Madu Yesu hpe asak 12 ning hpring sai hte Yuda Htung Tara hta asak hpring 12 ning - jan sai la sha shagu gaw Karai Kasang a Nawku Htingnu Jerusalem Nawku Htingnu de langai mung n hprai ai sha, Karai hpe myiman madun du ra ai. Chyoi Pra ai Nu Maria hte San Prai ai Yoseph, Madu Yesu hpe Jerusalem Nawku Htingnu de woi sa ai.

Masum ya mat mat ai Dai hpang Nawku Htingnu kata Sara ni, Hpaji ninghkring ni a ka-ang bai sa mu la ai. Madu Yesu gaw law law lang shawa masha ni hte uhpung uhpawng hte rau jawm nawku ai lam hpe chyum laika hta law law lang anhte mu lu ga ai. Bai, Yesu gaw shi hkun dinghkrai akyu hpyi Kawa Karai Kasang hte matut mahkai hkrum shaga n’gun hkam la ai lang law law hpe mung Chyum laika hta ka da nga ai. Mahte a Laika 26:36 hta Shi n’ni nhkri hkam la na shawng e sha Gesenane ngu ai shara kaw Kasa ni hpe makau di da n’na Shi hkrai akyu hpyi ai. Luka a laika 9:18, Shi hkam la na n’ni nkri lam hpe garai n’hpaw tsun dan yang Shi hkrai ding hkrai akyu hpyi aiYawhan a Laika 17 hta Madu Yesu gaw Karai Kasang hte shi hkrai dinghkrai akyu hpyi ai lam galaw ai hpe mu lu ai. Mahte a laika 4:1-2 hta Madu Yesu gaw Kawa Karai a Kabu Gara Shiga hpe hkaw tsun hpang na rai yang 40 ya shi hkrai dinghkrai machyi shim ai shara de sa n’na akyu hpyi ai hpe mu lu ai.

Luka a Laika 9:28 hta ahkyak ai lamik kumla kaba ni hpe garai n’galaw yang Shi hkrai dinghkrai akyu hpyi ai. Lika a Laika 6:12 hta Madu Yesu gaw Shi a Kasa marai 12 hpe lata la na shawng shana e, Shi hkrai shana tup akyu hpyi ai. Ndai zawn shi hkrai dinghkrai akyu hpyi ai hpe chyum laika hta anhte mu lu nga ai. Catholic Nawku Hpung a Ritkawp Tara Canon Law hta mung Canon Numbat 1205- 12 hta Hpung masha ni gaw Uhpung Uhpawng Nawku Daw Jau ai hta shang lawm ra ai hpe matsun da ai. Canon Numbat 208 kaw na 223 hta hpng masha shagu gaw shawa Nawku Hpawng ni hta n’hprai ai sha shang lawm na matu matsun da ai. Nawku Hpung a tara lam kru hta matsun da ai, hpung masha shagu gaw laning mi hta n law dik htum kalang Mara Raw Sacramentu hkam la ra ai.

Bai Chyoi Pra ai hkum Madu Yesu a hkum hpe mung n’law dik kalang hkam la ra ai hpe matsun da ai. Ndai gaw Hpung masha langai hpra shawa Uhpung Nawku daw jau ai hta lawm nan lawm ra ai hpe matsun ai rai nga ai. Madu yesu gaw Tinang hkrai dinghkrai akyu hpyi ra ai lam hpe Chyum Laika shara law law hta sharin ya ai. Mahte a Laika 6:5-8 hta “Nang mahtang akyu hpyi n’yang gaw, na a kata gawk de shang n’na, chyinghka hpe la da n’htawm n’dan n’leng ai shara e, na a Nwa hpe hpyi u; n’dan n’leng ai shara hpe mu lu ai, na a Nwa gaw, nang hpe bai htang na rin dai” ngu nna sharin ya ai. Dai majaw Uhpung Uhpawng hta shang lawm akyu hpyi ra ai hte maren tinang dinghkrai mung akyu hpyi nawku daw jau magam hpe galaw ra nga ai. Ndai hte hte Magdalena Lasang Hkawn Ra a Ga San hpe htai dat ya lu nngai. Yawng akyu shakut let Karai a chyeju hpe hkam la ga.