Chyum munggga Mt 6:7 hta tsun ai kyu hpyi yang ga bai kahtap htap re nga tsun ai gaw Rosari hti ai hpe tsun ai kun? Bai nna Mt 6:5 hta tsun ai tara jawng hkan lam hkan akyu hpyi ai nga ai mung anhte Kahtawlik Hpung ni hpe tsun ai kun?

San: Chyum munggga Mt 6:7 hta tsun ai kyu hpyi yang ga bai kahtap htap re nga tsun ai gaw Rosari hti ai hpe tsun ai kun? Bai nna Mt 6:5 hta tsun ai tara jawng hkan lam hkan akyu hpyi ai nga ai mung anhte Kahtawlik Hpung ni hpe tsun ai kun? Atsawm n chye na ai majaw RVA magam gun ni chyeju hte naw htai ya marit ngu hpyi shawn dat ai. Zau Bum Jau Asen, mahtek mare kaw nga nna, ya Dingsing Jau Ginwang lana zupja IDP Camp 2 lawk 2 kaw nga ai, Jan Agnes Hkang Je Hkawn Ja a ga san hpe htai ya na nngai.

Htai: “Nanhte akyu hpyi ai shaloi maigan masha ni zawn lachyum n pru ai ga ni tsun kahtap htap hkum rai myit, dai maigan masha ni gaw shanhte galu galang akyu hpyi ai majaw, shanhte a hpara ni madat ya na zawn nawn nga ma ai. Nanhte chyawm gaw shanhte hte hkum bung nga myit, nanhte a Kawa gaw nanhte garai n hpyi kaw nna pyi, nanhte hta hpa ra nga ai hpe chye ya nga chyalu rai nga ai. Dai rai nna nanhte ning ngu hpyi mu!

“Sumsing lamu na anhte a wa e, na a mying ningsang chyoi pra nga lit ga, Na mungdan du wa ru ga, lamu dang hta na myit dik nga ai hte maren, ga ntsa e mung dik wa u ga. Shani shanang anhte ra ai lusha daini anhte hpe jaw myit, masha ni anhte shut ai mara anhte raw kau ya ai zawn anhte a mara hpe mung raw kau ya mi. Agung alau nga ai de anhte hpe ndu du shangun ai sha, n kaja ai lam hta na shaw la mi law!” (Mt 6:7 - 13).

Mt 26:44 hta, “Bai shi shanhte hpe kau da nna sa mat wa nhtawm, shawng na ga hte maren masum lang ngu na akyu hpyi wu ai,” ngu rawng nga ai. Ndai gaw Yesu kasa ni hpe ngam kau da nna masum lang kahtap nna akyu hpyi ai lam Mahte tsun da ai rai nga ai.

Madu Yesu masum lang kahtap nna akyu hpyi ai akyu hpyi ga gaw hpa rai ta? Yesu hpe Roma hpyen la ni rim la na shawng e, Getsemane sun e akyu hpyi ai lam rai nga ai.

Shawng na lang hpyi ai gaw Mt 26:39 kaw rawng ai. “Shaloi dai yang na shi loi mi lai sa nhtawm, ga de myi man gum dagup let akyu hpyi wu ai gaw, Wa e, ndai nni nkri ngu ai gawm hpe ngai kaw na shalai kau lu yang gaw, shalai kau ya e! Rai ti mung nye a myit n rai, na a myit she rai u ga, ngu nna tsun wu ai.

Lahkwng lang ngu na lang gaw sape ni yup pyaw nga ma ai hpe mu nna shanhte hpe bai sadi jaw shadum ngut ai hpang bai hpyi ai rai nga ai.

“lang mi bai sa nna, Wa e, ndai nni nkri gawm hpe ngai n lu ai sha, ngai kaw na shalai kau lu yang gaw, na a myit ra ai hku rai u ga law, ngu nna akyu hpyi nga ai” (Mt 26:42).

Ndai lang bai htang yu yang mung kasa masummyi yup shamwi nga ai hpe bai mu ai rai nga ai.

“Bai shi shanhte hpe kau da nna sa mat wa nhtawm, shawng na ga hte maren masum lang ngu na akyu hpyi wu ai,” (26:44).

Yesu Madu tsun ai kahtap kahtap nna akyu hpyi ai gaw kaning re masa hpe tsun ai rai?

Kahtap htap nna tsun ai lachyum hpe anhte chye na ga ai. Aten langai kaw sha dai hpe sha bai kahtap kahtap nna matut manoi tsun ai rai nga ai.

Madu Yesu gaw kahtap kahtap nna akyu hpyi ai hpe mara shagun, jahpyak ai gaw n rai nga ai.

Matut manoi akyu hpyi nga na hpe 1Htesalonica 5:17 hta, “Tut nawng e kabu gara nga mu, N sim n sa akyu hpyi nga mu, Lam shagu hta chyeju dum shakawn kungdawn nga mu. Dai gaw Hkristu hta e nanhte a asak hkrung lam hte seng nna Karai Kasang a myit ra ai lam rai nga ai,” ngu San Pawlu sharin shaga da ai.

Tara maigan ni hpara a shawng kaw galu galang hpyi ai gaw kaning hku re ai hpe tsun ai rai?

Yesu tsun ai tara maigan ni a akyu hpyi ladat gaw shanhte hkap la da ai tara shang labau shang laika hta na n re ai sha tinang tinghkrai jaw ai myit la nna hpyi ai akyu hpyi ai ladat hpe tsun ai mung rai nga ai.

Anhte a chyum laika hpe Greek ga hku ka da ai hta na kaga myu hpan ga ni hte gale ka da ai majaw ga si lachyum sung ai lam shai wa ai mung nga chye nga ai. Jinghpaw hku kahtap kahtap nna ngu ai ga si hpe Greek ga si madung gaw lachyum n pru ai, akyu n rawng ai, kaman lila re ai ngu ai lachyum nga ai ga si re lam chye lu ai. English ga hte gaw “empty phrases” “vain repetitions or babbling” ngu tsun ma ai. Dai gaw lachyum n rawng ga yan, kaman lila re ai bai kahtap htap ai lam ni, nsen sha ngoi tim akyu n rawng lachyum n pru ai nsen ni hpe tsun ai rai nga ai.

Rosary hti akyu hpyi htinglu htinglai ai lam gaw chyum laika hta na Maria kaw lamu kasa shiga sa shana ai, Elizabeth e Maria hpe hkap shakram ai ga ni rai nga ai. Dai gaw Karai Kasang kaw na tsun ai ga hte Karai Kasang hpe shakawn shagrau ai ga rai nga ai.

Yesu tsun ai tara jawng hkan lam nmaw hkan ngu ai mung, Kahtawlik nawku hpung hpe tsun ai gaw n rai nga ai. Ga Shaka Dingsa prat na labau hta Karai Kasang a myu sha ni hpawng de akyu hpyi lai wa ai lam law law nga lai wa ai. Ga shaka ningnan prat na labau hta mung dai zawn rai Hkristan ni n garan shi ai kaw nna rau hpawng de akyu hpyi ai lam law law nga lai wa ai.

Chyum Laika labau lam ni hpe gaw aten lu ai shaloi bai sagawn nna htai ya na nngai.

“Marai lahkawng masum nye a mying hpe gang nna zuphpawng nga ma yang gaw, dai yang shanhte a ka-ang e ngai mung lawm nga nngai, ngu Madu Yesu tsun ai” (Mt 18:20).

By Fr. Patrick Gawmaw Hkawng Yae