Chyoipra Arung Arai Ni Hpe Layit Shatai Lang Ai Htuk Ai Kun?

San: Anhte hpung masha ni hta, Ramma shiyi shadang sha ni hte myitsu kanu kawa ni akyu hpyi hpawng shingra, akyu hpyi nga ai ten hta tinang a nawku nahkawn mangoi buk hta bang da ai Wa Jau, Wa Saradaw ni a sumla ni hpe layit shatai layit yit lang ai hpe shara shagu ngu na mu lu ai, dai zawn galaw yang mara n lu na kun? Chyum Laika hti ai shaloi, ga shadawn, chyum Mungga Daw 1 Ezehela 37:12-14 hpe ya hti na gaw myithtoi Ezekela a laika langai hta na rai nga ai nga hti ai. Masha nkau (shr) Sara nkau rai jang Chyum mungga daw (1) ya hti na gaw Myithtoi Ezekela laika langai hta na rai nga ai, Daw kaba 37; daw kaji 12-14 ngu hti ai. Gara hku mahtang chyum mungga daw ni hpe tsun nna hti ai rai yang grau htap htuk ai kun? Kachyi Htu Jau Ginwang, Ja htu yang Sara Gaiwang, Ja Htu Yang Mare kaw nga ai Slg. Stephen Lama Naw San a ga san hpe htai ya na nngai.

• Ga san daw langai gaw chyoi pra ai arung arai ni hpe hkungga manu shadan ra ai lam hte seng nga ai. Chyoi Pra ai arung arai ni yawng hpe hkungga lara di, manu shadan ra ai ngu nawku hpung gaw n-gun jaw shadum sharin shaga ai. Ntsa lam mu mada ai hku shada shaleng lailen ngu mung tsun mai nga ai. Dai ntsa lam mu mada ai hkan sa ra ai lailen tara ni gaw kata lam ahkyak ai makam masham hkrang shapraw ai hpe madi shadaw ya ai rai nga ai. Ahkyak dik htum ngu gaw tsun n lu ai. Ahyak dik htum makam masham tara gaw tsawra myit rai nga ai. Shanhte ni dai zawn galaw ai gaw da sang yaw shada nna galaw ai mai byin ai zawn, n dum na galaw ai mung mai byin ai, dum nga ning len kahtep ai hpe n hkam sharang lu ai majaw galaw ai mung mai byin ai, n chye ai majaw galaw ai mung mai byin ai. Dai majaw chyoi pra ai arung arai ni hpe n gawn n sawn galaw ai hpe mu hkrup ai wa mung, shanhte hpe shadum shang lang dan na gaw ahkyak na re ngu myit lu ai. Dai zawn shadum ai hta mung si mani tsawm htap ai mahkrun lam hte tsun shadum ra ga ai. Mara shagun ai hku tsun shadum sharin shaga ai rai yang hkap la ai ni a matu na n shang byin wa chye ai. Dai majaw chyoi pra arung arai ni hpe n htuk n htak galaw hkrup ai ni mung hpang de dai zawn n byin u ga sadi ra ga ai. Mu hkrup ai ni mung si mani tsawm htap ai ga si ni hte shadum jahprang la ga.

“Dai re majaw matsat shabat re ai sat lawat shagu hte n hkru n kaja ai arawn alai yawng hte hpe yeng seng kau mu. Karai Kasang kaw sumnung ai hte shawng kaw nna nanhte a kraw lawang ni hta e shi hkai da ya sai nanhte hpe hkye hkrang la lu ai mungga hpe hkap la mu,” ngu Yaku shadum da ai (Yk 1:21).

Tinang a myit masin hpe mara hta na shalawt la ai rai yang tengman makam masham hta hkawm sa ai nan rai nga ai (Yk 3:13-18).

Tsawra myit gaw makam masham hte seng ai tara yawng a akri madung rai nga ai.

“Shada da tsaw ra nga mu, ngu nna tara ningnan ngai nanhte hpe jaw made ai. Ngai nanhte hpe tsaw ra made ai zawn, nanhte mung shada da tsaw ra nga lu na rai myit dai. Shing rai nanhte shada tsaw ra myit rawng nga myit yang gaw, nanhte nye a sape ni rai nga myit dai gaw masha yawng mayawng chye lu na mara ai,” (Yh 13:34).

Sumla ni dep shakap da ai, masat masa galaw da ai dai arung arai gaw shaman da ai arung arai re kun, n shaman da ai arung arai re kun, kaning re ai masat masa hte galaw da ai ni re kun, ngu ai hpe tinang dai manu shadan shung lang chye ra ai rai nga ai.

Dai n htap n htuk ai hku jai lang ai hpe mu hkrup ai ni mung tsun shadum na lit nga ai gaw rai nga ai. Mara mu ai hku rai yang gaw masha kaga hpe je yang ai tai wa nna, tinang hkum na mung mara shajat la ai tai na nhten. Hpu nau wa a ga san hte seng nna Jau Saradaw ni a sumla hpe akyu hpyi hpawng ni hta layit yit jai lang ai gaw, mara lu kun, n lu ai kun ngu ai daw gaw Karai Kasang she daw dan u ga. N gawn n sawn di ai rai yang gaw mara lu na re. Mara lu ai ngu ai hta mung, chye nga ninglen shut ai mara gaw kaba ai. N dum n chye nna shut ai mung mara gaw rai nga ai. Raitim chye nga ninglen shut ai hta gaw grit ai rai nga ai, nga nna Nawku Hpung sharin shaga ai Moral Law hta sharin shaga da nga ai.

Ga san lahkawng ngu na hpe bai htai ga nga yang, Shawng de gaw, “Chyum Mungga Daw langai, hti yang Chyum Mungga daw langai ngu tsun hpang ai; dai hpang gaw, “Ya hti na gaw Myihtoi Ezahkela Laika, daw kaba sumshi shanit, daw kaji 12 kaw nna 14 hta na rai nga ai” ngu tsun ai. Chyum laika hti ngut ai hpang gaw, “Ya hti ai gaw Karai Kasang a mungga rai nga ai,” ngu tsun ai.

Misa Hkungga hte laban nawku daw jau lamang ni hta, Chyum Laika hti ai shaloi Ga Shaka Dingsa hte Ga Shaka Ningnan kaw na Kabu Gara Shiga (San Mahte, San Marku, San Luka, San Yawhan) ni hta lai nna kaga chyum laika ni hpe hti ai shaloi, chyum mungga daw langai hti ai shaloi raitim, daw lahkawng hpe hti ai shaloi raitim, Chyum Munga daw langai, lahkawng ngu tsun n ra sai. Ga shadawn, Myihtoi Ezahkela a laika hta na rai yang, “Ya hti na gaw Myihtoi Ezahkela laika hta na rai nga ai”, ngu sha tsun ai. English hku gaw, “A reading from Prohpet Ezahkiel,” ngu tsun ai. Nawku Hpung a Liturgical guide book ningnan hta gaw Chyum daw ni hpe n tsun ra sai nga matsun da ai rai nga ai. Chyum laika hpe hti ngut jang mung, “Karai Kasang a mungga rai nga ai,” ngu sha tsun na matu matsun da ai.

Kabu Gara Shiga hpe hti ai shaloi gaw, “Madu nanhte hte rau nga nga u ga”, ngu Jau gaw hpung shawa masha ni hpe shawng shachyan ai. Shaloi shawa masha ni gaw, “Nang wa hte mung nga nga u ga,” ngu bai htan ai. Dai hpang, ga shadawn San Mahte laika hta na hti na rai yang, “Ya hti na gaw, San Mahte a laika hta na rai nga ai,” ngu sha tsun ai. Dai shaloi mung, chyum daw ni hpe n tsun ra sai nga nna Liturgical guide book ningnan kaw matsun da nga ai.

Chyum laika hti ai shaloi, Chyum mungga daw langai, lahkawng ngu, n tsun mat ai, bai, chyum daw ni hpe n tsun shangun ai gaw, Misa Hkungga hte Laban Nawku daw jau lamang hta lawm ai ni gaw ndai hti ai gaw chyum mungga daw kade re ai, hpe chye da chyalu rai sai ngu hkam la da ai hte, chyum daw ni hta chyum mungga ni gaw ahkyak grau ai re lam chye na da ra ga ai majaw rai nga ai. Bai langai mi gaw nawku daw jau lamang hpe aten hpe hkrak hkrak akyu jashawn lu na matu, hpung masha ni myit n bra mat na matu mung rai nga ai.

Hpung masha nkau ni n chye na ai lam langai gaw, Ga Shaka Dingsa hta Samuela laika, Hkawhkam laika, bai Hkawhkam labau laika ni gaw laika buk lahkawng hpra rai nga ai. Dai majaw, ga shadawn, 1Samuela, ngu ka da rai yang, “Samuela laika langai ngu hti ai. 2Hkawhkam ngu ka da yang, Hkawhkam Laika lahkawng ngu hti ai. Dai zawn sha Ga shaka ningnan hta Laika Sara langai sha ka da ai laika buk hpe mung dai hku hti ai. Raitim, San Pawlu a shagun laika ni hpe gaw ndai hku bai hti ai. Ga shadawn, 1Kor, ngu ka da yang “San Pawlu, Korintu hpung masha ni hpag de shagun dat ai laika langai” ngu hti ai. Raitim, Timoti hpang de ka ai gaw hpung masha ni hpang ngu n shalawm ai. Ga shadawn, 2Tim, ngu ka da yang, “San Pawlu Timoti hpang de shagun dat ai laika,” ngu hti ai. Hpa majaw nga yang Timoti gaw mare mying n rai nga ai, masha mying she rai nga ai.

Ginchyum dat hku nna Hpung masha ni Misa hkungga hte laban nawku lamang ni hta chyum laika daw langai hte lahkawng hti ai shaloi, ga shadawn Ezahkela laika hpe hti yang, “Ya hti na gaw Myihtoi Ezahkela a laika hta na rai nga ai,” ngut jang gaw “Karai Kasang a mungga rai nga ai,” ngu hti ga.

Chyum Laika buk mying ni hte kadun ai hku ka hkrang ni

Matsing/ / Lahta na madun da ai gaw Catholic Nawku Hpung Ni Jai lang ai hpe madung sawk sagawn da ai rai nngai.

English hku gaw lawu na link kaw tam sagawn la mai ai.

Jinghpaw hte Myan ga hku nna gaw Chyum Laika bu mying ni gaw Hpunau Hkristan hpung ni ga gale da ai kaw nna la da ai. Dai kaw Hpunau Hkristan ni n hkap la ai, Kahtawlik Nawku Hpung ni sha hkap la ai chyum laika buk sanit (7) mung lawm ai. laika si achyang hte masat da ai ni rai nga ai.

Jinghpaw hte Myan ga hte gale da ai hpe gaw kadun ai hku ka ai chyum laika buk mying ni hpe Kahtawlik Nawku Hpung shata hti laika hta sawk sagawn da ai rai nngai.

Anhte Jinghpaw ga hte ga gale da ai hpe chyum laika mying hte ga kadun hkrang ni hpe tara shang hkrak masat da ai lam ni gaw n nga shi sam ai ngu kam ai.

http://catholic-resources.org/Bible/Abbreviations-Abreviaciones.htm

https://www.catholicnewsagency.com/resource/56036/biblical-book-names-abbreviations

By Fr. Patrick Gawmaw Hkawng Yae

#rvakachinservice