Radio Veritas Asia Buick St., Fairview Park, Queszon City, Metro Manila. 1106 Philippines | + 632 9390011-15 | +6329390011-15
Chyoi Pra Ai Masha Tai Lu Na Matu
CHYOIPRA MASHA TAI LU NA HKRUN LAM A LAHKAM
(NA A MATU MAWNG TAI AI LAM)
Chyoipra ai masha tai lu na matu, Saradaw, Jau, “laksan hpung magam gun hpung shang (religious)” n tai ra ai. Yu maya bungli galaw na malai, aten na na akyu hpyi shaja ai ni she chyoipra lu ai, ngu nna anhte law law lang shadu ga ai. Dai gaw teng sha n jaw ai. Anhte a sak hkrung ten hta hpu nau tsawra myit hpe shawng lam kaw tawn nhtawm , anhte gaw gara kaw mi nga ai rai rai, hpa galaw nga ai mi rai rai, Madu a sakse ni zawn sakhkrung nga na she ahkyak madung rai nga ai.
Nang laksan hpung magam gun hpung shang rai yang gaw, na a ap nawng prat hpe kabu gara rai ap nawng nga u- ga; nang dinghku de ai wa rai yang gaw, Nawku Hpung hpe Madu Yesu tsawra ai zawn, na a madu wa, madu jan hpe tsawra nna chyoipra rai nga u- ga. Nang bungli galaw sha ai wa rai yang, hpu nau wa a matu, lu ai atsam marai tup hte galaw daw nna chyoipra nga u-ga. Nang kaji kawoi, kanu kawa rai yang, na a kashu kasha ni hpe Madu Yesu a hpang gara hku hkan ra ai lam hpe, myit galu let sharin shaman ya u- ga. Nang ahkang aya lu ai wa rai yang gaw, tingkyeng myit hpe rap di tawn kau nhtawm, wuhpung a rawt jat lam hpe madung tawn galaw ya u-ga.
Nang kashin kamun sakramentu hkam la ai sharoi lu la ai sakramentu chyeju hte, sanpra lam a apu asi ni hte pu tsawm nga u-ga. Nang hte seng ai yawng mayawng, karai kasang a man kaw asan sha rai u-ga; kaning re ai mabyin kaw nga nga ai rai ti mung, karai kasang hpe mada yu nga u. Mabyin ni a majaw n mau mat, myit n ung ang mat u-ga. Chyoipra ai wenyi apu asi rai nga ai chyoipra ai chyeju hpe na a sakhkrung prat hta lu la na rai nga ai. (Gal. 5:22-23) Na a gawn kya ai lam hpe chyu myit nga chye ai agung alau hpe hkrum ai shaloi, wudang ntsa jen noi sat hkam ai Hkristu Madu hpe mada yu nhtawm, “Madu e, ngai gaw mara lu ai matsan masha rai nngai; rai ti mung nang gaw ngai hpe kachyi sha pyi kaja wa hkra galaw ya lu nga ndai,” ngu nna hpyi shawn u.
Nawku hpung gaw sanseng chyoipra ai; rai ti mung nawku hpung gaw mara lu ai ni rau jawm pawng nga ai shara rai nga ai. Ndai rau jawm nga ai kaw na nang hpe chyoipra wa hkra galaw ya lu ai baw shagu hpe lu la na rai nga ai. Karai kasang gaw nawku hpung hpe chyoipra ai chyum laika, sakramentu ni, chyoipra ai shara ni, rau jawm sak hkrung nga ai wuhpung wuhpawng ni, sanpra ai masha wunawng a sakse ni hte jahkum shatsup da ya ai. Karai Kasang a tsawra myit kaw na pru wa ai, “ja lungseng hte mawn sumli da ai num nnan zawn,” (lsa. 61:10) tsawm htap ai baw shagu nNawku Hpung hpe jaw da, shaman da ya nga ai.
Karai kasan nang hpe sanpra ai masha tai shangun mayu nna, shaga ai kaw du lu na matu, kaji sha re ai bungli ni hte hpang ra ai. Ga shadawn: Gat de sa wa ai num langai mi, manang jan langai hte hkrum ai. Shan gaw kaga jinghku jan a lam n kaja ai tsun maw ma ai shaloi, shi a myitkaw nna, “Ngai kade a lam mung n kaja ai n tsun na,” ngu dawdan ai. Ndai lahkam gaw chyoipra wa na lahkam langai rai sai. Num dai gat de nna nta de bai du wa ai shaloi, kasha ni gaw shan nau ni ra sharawng ai baw hkap tsun dan mayu nga ma ai. Shi gade pu ba timung, myit galu rai dung nna kasha ni tsun dan ai hpe kabu gara madat ya ai.
Ndai mung chyoipra lu ai lam a lahkam langai mi rai sai. Dai hpang mayak mahkak hte hkrum ai shaloi, Nu Maria hpe shi tsawra ai majaw Rosary hta la nna kamsham myit hte Rosary hti akyu hpyi ai. Ndai mung chyoipra masha tai na matu garum jaw ai lahkam langai mi rai nga ai. Dai hpang lam ningmaw de pru sa wa ai shaloi matsan masha langai hte hkrum ai. Shi hpe matsan dum tsawra myit hte hkrum ai. Shi hpe matsan dum tsawra myit hte ga shaga ai. Ndai mung chyoipra masha tai lu na hkrun lam a lahkam langai rai nga ai.
Anhte a prat hta kalang lang dingbai dingna jaw ai hpan law law hte hkrum katut ga ai. Ndai dingbai dingna jaw ai lam ni kaw nna Madu garum la, hkye la na shaman chyeju ni hpe dum jang, “shi Madu a chyoipra ai kaw galai du lu shangaun ai,” (Heb. 12: 10). Ga shadawn, yu maya amu ni hpe galoi mung galaw ai zawn, shawoi na myit hte sha galaw nga ai; raitimung, lahta na zawn Madu a garum atsam hpe myit dum dat nna, “shawoi galoi mung a galaw ai kaji kajaw bungli ni hpe “grau kaja hkra” ngu myit jasat galai shai nna galaw wa ai.” Vietnam mung na Saradaw kaba Cardinal Francois Xavier Nguyen van Thuan, htawng kaw sharawng da hkrum ai shaloi, shi galoi lu lawt na hpe myit chyai na malai, htawng kata kaw dai ten gara hku akyu rawng ai tsawra matsan dum bungli galaw na hpe sha, madung tawn nna galaw wu ai. “Shani shagu ngai lu ai aten hpe kaji kajaw bungli galaw nna, laklai akyu pru hkra she galaw na,” nga nna shi dawdan ai.
Karai kasang shi a garum chyeju hte anhte hpe galaw shangun mayu ai kaji kajaw bungli ni hpe, amying shaprai galaw ai amu gun zawn n rai; “Karai kasang a shaman chyeju law law hpe akyu jashawn ra ai. (1 Pet. 4: 10) “Anhte gawng kya ga ai; raitim bai hkrung rawt wa ai Madu Yesu a atsam kaba ai asak hte hkrung nga ga ai. Dai majaw anhte gaw tsawra ai bungli ni hpe ra n rawng hkra galaw lu ai,” nga nna New Zealand mung na Saradaw nit sun ai grai jaw nga ai.“Madu a tsawra myit gaw jarit masat ai lam n nga ai; bai dawm la ai ngu n nga ai. Hka bai hpyi ai lam n nga ai; sadi dung ai tsawra myhit rai nga ai.
N-gun kya ai ni rai ga ai majaw, anhte tsawra ai amu bungli hpe hkan galaw na n loi ai gaw teng nga ai. Hkristu zawn shakut nna tsawra ra ai; shi a bai hkrung rawt ai asak anhte hpe jaw da ya sai hpe dum ra ai. Dai zawn galaw nna shinggyim gawng kya ai lapran kaw shi a shingkang atsam hpe shapraw dan lu ai.
Wa Sarabyin a matsun laika (Gaudete Et Exsultate)
Add new comment