Cardinal Charles Bo A Synod Rapdaw Zuphpawng Hpaw Hpang Mungga

2021 - 2023 ning du hkra galaw sa wa na Kahtawlik nawku hpung a Synod rapdaw zuphpawng kaba hpe lai wa sai laban 2021 ning October shata 10 ya shani Vatican San Peter nawku htingnu kaba kaw Wa Sarabyin Francis hkum nan Cardinal ni, Saradaw kaba ni,hpung masha ni hte rau hpaw hpang dat sai rai nga ai.

Mungkan ting na saradaw ginwang shagu hta daini anhte Synod rapdaw zuphpawng kaba hpe hpaw hpang nga ga ai.Ndai synod galaw ai lam hta laklai ai lam masum nga ai.

No.1 ngu na laklai ai lam gaw shawoi gaw lahkawng ngu na Vatican zuphpawng kaba ngut ai hpang mali ning hta kalang Saradaw ni rapdaw zuphpawng kaba hpe Vatican hta galaw ai,bat masum daram aten la nna galaw ai, ya na synod gaw bat masum sha nrai, lahkawng ning tup hkyen lajang lam galaw na matu Wa Sarabyin matsun da nga ai.

No.2 ngu na laklai ai lam gaw shawoi na Synod rapdaw zuphpawng kaba gaw Wa Sarabyin hte Saradaw kaba ni hkrai galaw ai synod zuphpawng re.Ndai lang na gaw Wa sarabyin, Cardinal ni, Saradaw kaba ni, jau, mama ni, brother ni, hpung myitsu kanu kawa ni,hpung masha kaji kaba ni yawng ni shang lawm ran a synod rai nga ai.

Kahtawlik hpung masha ni chyu sha n rai, kaga hpu nau Christian ni, Christian nre ai hpu nau ni hpe mung synod hte seng ai ninggawn amu madu rung Vatican hta saw shaga da ai lam galaw da nga ai.

No. 3 ngu na ahkyak ai lam gaw ntsa kaw na lawu de tsang hte tsang, lawu kaw nna ntsa de masing jahkrat ai lam mung rai, lawu kaw nna ntsa de tang madun lung wa lam lai ladat san san masa mung rai nga ai.Yawng langai sha rai nga ai kun dinghku masha ni zawn myithkrum kahkyin gumdin shang lawm sa wa na lai ladat rai nga ga ai.

Ndai synod rapdaw zuphpawng kaba hpe woi awn ningshawng galaw nga ga ai lam gaw Sarabyin mung nrai, Cardinal langai ngai mung nrai, Saradaw kaba langai ngai mung nrai, Chyoipra Ai Wenyi she rai nga ai.