Anhte myanmar mungdan kaw na san pra ai masha tang da ai tai wa ai kade nga sai kun?

San: (1) Anhte myanmar mungdan kaw na san pra ai masha tang da ai tai wa ai kade nga sai kun? (2) san pra ai ni hta anhte Myanmar mungdan kata na tara hkaw sara langai mi lawm ai nga hpe gaw na yu ga ai raitim, dai san pra ai tara hkaw sara a labau hpe n chye nna san dat lu ai; chyeju hte htai ya rit. Laiza jau ginwang jeyang hpyen yen dabang kaw shanu nga ai,  Sara Peter N-chyawng Naw Mai a ga san hpe htai ya na nngai. (Saint in Myanmar)

• Ndai ga san hpe n htai shi yang, Saint (San Pra ai masha) hte Blessed (A Lu ai masha) a lam kadun ai hku shawng sang lang dan mayu nngai.

“Saint” San Pra ai masha tai na matu gaw “Blessed” A Lu ai masha shawng shatai ra ai. A Lu ai masha shatai ngut jang she San Pra ai masha shatai ai rai nga ai. A Lu ai masha shatai na matu Nawku Hpung kaw nna masat da ai sakse ni nga ra ai. Dai hte maren San Pra ai masha madang de bai shatai na matu mung Nawku Hpung kaw nna masat da ai sakse ni naw ra ai.

Ga san hpe matut htai ga nga yang, anhte Myanmar mungdan hta na San Pra ai masha shatai sai masha nga sai lam n na yu shi nngai. Mahtai hkrak jaw lu na matu naw san sagawn la nna she bai htai ya na nngai.

Raitim, “Blessed” A Lu ai Masha gaw shatai da sai lam chye lu ai. Shi gaw Blessed Mario Vergar (16 November 1910 – 24 May 1950) rai nna Italy Jau re lam chye lu ai. “Italian Roman Catholic priest of Institute for Foreign Missions” re ai lam chye lu ai. Shi gaw Burma (Myanmar) mungdan hta 1950 shaning hta sat hkrum ai wa rai nga ai. 24 May 2014 shaning hta A Lu ai masha tang hkrum ai rai nga ai.

Shan nau ni marai (9) kaw na kaji htum wa rai nna 20 November 1910 hta kashin kamun hkam la ai.

• na Jau Tai Jawng (seminary) kaji hta hpaji sharing hpang ai rai nna, 17 ning hta Naples na Jau Tai Jawng hta jawng matut lung ai. 1929 shaning hta Monza na Jau Tai Jawng hta matut lung nna 1932 shaning hta Aversa kaw tonsure hte minor orders hpe hkam la ai. 1933 shaning hta Pontifical Institute for Foreign Missions hta shang nna, 26 August 1934 hta Cardinal Archbishop of Milan Alfredo Ildefonso Schuster a lata hta htani htana Jau aya hkam la ai. Dai shaning na September shata hta Myanmar mungdan de sasana galaw hpang na matu du shang hpang ai.

Wa Jau Vergara gaw Myanmar mungdan na mare kaji langai hta tara laika ni hte Sakramentu a lam ni hpe sharin hpang ai. Chyahkrai Jawng ni hte Apnawng Jawng ni law law hpe mung hpaw hpang da ya ai.

(2) lang na Mungkan majan hpang wa ai shaloi Wa Jau Vergara 1940 shaning, India kaw na British concentration camp hta sharawng da hkrum ai. Shi hpe zing da ai kaw nna bai shalawt dat ya ai hpang 1946 shaning hta Delhi and later to Calcutta de sasana bai shang ai. Myanmar mungdan de bai shang mai ai hpang 1947 shaning hta Myanmar mungdan de sasana bai hpang ai rai nna dai ten hta Tarahkaw Sara Isidore Ngei Ko Lat hte hkrum ai. Shan lahkawng sasana magam rau galaw hpang ai. Myanmar mungdan shanglawt lu ai hpang kade n na ai 1948 shaning hta Wa Jau Vergara hte Tarahkaw Sara Isidore Ngei Ko Lat yan rim la hkrum ma ai. 24 May 1950 shaning hta lahkawng yang guerillas majan ladat hta sat zingri sat hkrum ma ai. Sat hkrum ai mungdaw gaw Kayar mungdaw hta rai nna Shadaw mare hta rai nga ai.

Dai majaw hpu nau wa san ai hte maren Tarahkaw Sara Isidore Ngei Ko Lat hpe mung Wa Sarabyin Francis kaw nna 9 December 2013 shaning hta A Lu ai masha tang na matu sawk sagawn na lit shatsam dat ai. Cardinal Angelo Amato kawn ndai lam hpe tang shawn da ya sai hte maren 24 May 2014 shaning hta Tarahkaw Sara Isidore Ngei Ko Lat gaw Wa Jau Vergara hte rau A Lu ai masha tang hkrum sai. Maigan mungdan na Myanmar mungdan de sasana shang ai Jau kaga ni mung A Lu ai masha tang hkrum ai ni nga ai lam chye lu ai (A man of huge longing, Fr Alfredo Cremonesi will be beatified on 19 October).

Dai majaw Myanmar masha ni hta na A Lu ai masha shawng tai ai labau shang A Lu ai Isidore Ngei Ko Lat gaw Tarahkaw Sara rai nga ai lam htai ya let ndai ga san hpe ndai kaw naw jahkring da na nngai.