(1) akyu hpyi ai ten myi hpe di da ra ai kun?(2) Nu Maria kaw Rosary kyu hpyi hkachyi ga hpe kaga hpu nau ni gaw hti na ahkang nga ai kun? (3) Yesu sharin ya ai kyuhpyi ga hpe hkalup hpung kaw bai bangjat na tsun da ai nga ai. Bai jat bang na kyu hpyi ga

San: (1) akyu hpyi ai ten myi hpe di da ra ai kun? kalang lang amu galaw ai ten hkrun lam hkawm ai ten hkan hte machyi masha hpe yu ai ten hkan myi hpaw na kyu hpyi ai. Ndai lam gaw mara lu na kun? (2) Nu Maria kaw Rosary kyu hpyi hkachyi ga hpe kaga hpu nau ni gaw hti na ahkang nga ai kun? (3) Yesu sharin ya ai kyuhpyi ga hpe hkalup hpung kaw bai bangjat na tsun da ai nga ai. Bai jat bang na kyu hpyi ga hpe tsun yang mara nga ai kun? Ya ten Miwa gumsan Henan kaw du nga ai Cecilia Dashi Mai Mai a ga san hpe htai ya na nngai. (gusture in prayer servic, saying rosary, Sacrament)

Htai: Akyu hpyi ai shaloi ahkyak madung gaw myi hpe gara hku tawn da ra ai ngu ai n rai nga ai.

Myi di na akyu hpyi ai ngu ai gaw Karai Kasang hpe myit jung ai hte grau mu lu na matu she rai nga ai. Anhte hpa galaw ai raitim, anhte galaw ai hta myit shang myit jung let galaw yang she grau nna awng dang lu ai. Anhte ni lama ma hpe sumru ai shaloi myi hpaw da nna sumru ai rai yang mung mu lu ga ai. Raitim, Myi ngu ai gaw yawng yawng hpe mu lu ai re majaw myi hte mu lu ai de anhte a sumru ai lam ni mung hkang mat chye nga ai.

Dai shaloi anhte madung da sumru ai lam ni mat mat chye nga ai; wam dam mat chye nga ai. Dai majaw akyu hpyi ai shaloi myi di da nna hpyi ai gaw Karai kasang hpe grau dan dawng ai hku mu lu ai hte na lu ai zawn rai nga ai majaw mahkrum madup nga ai ni e woi galaw ai kaja lam langai mi gaw rai nga ai.

Anhte ni magam bungli galaw let mung akyu hpyi mai nga ai.

Myi di na akyu hpyi ai, myi n di ai sha akyu hpyi ai gaw anhte a matu ahkyak dik ai lam n rai nga ai.

Ahkyak dik langai gaw akyu hpyi ai shaloi anhte a kam sham myit rai nga ai.

Mt 6:5-8, “Nanhte akyu hpyi myit yang, sawt ai masha ni zawn hkum rai myit! Shanhte gaw masha shagu shanhte hpe mu lu mu ga, tara jawng ni hta, mare lam mashe ni hta tsap nga nna akyu hpyi nga na tsaw nga ma ai. Nanhte hpe ngai teng teng tsun made ai gaw, shanhte tinang a shabrai lu la manu ai. Rai ti mung, nanhte mahtang akyu hpyi ai shaloi, nta kata gawk de shang nna, chyinghka hpe la da nhtawm, myi hte n mu lu ai nanhte a Kawa kaw hpyi mu; n dan n leng ai hku galaw ai amu hpe mu lu ai nanhte a Kawa gaw, nanhte hpe bai htang jaw na marin dai.”

“Nanhte akyu hpyi ai shaloi maigan masha ni zawn lachyum n pru ai ga ni tsun kahtap htap hkum rai myit, dai maigan masha ni gaw shanhte galu galang akyu hpyi ai majaw, shanhte a hpara ni madat ya na zawn nawn nga ma ai. Nanhte chyawm gaw shanhte hte hkum bung nga myit, nanhte a Kawa gaw nanhte garai n hpyi kaw nna pyi, nanhte hta hpa ra nga ai hpe chye ya nga chyalu rai nga ai. Dai rai nna nanhte ning ngu hpyi mu: “Sumsing lamu na anhte a Wa e, ...”

Anhte a kanu Nu Maria gaw Mungkan masha yawng a kanu mung rai nga ai. Shi kaw kadai mung akyu hpyi mai nga ai. Anhte nawku hpung a akyu hpyi ga ni gaw kadai mung tsun mai ai akyu hpyi ga ni rai nga ai. Jahka da ai lam kadai hpe mung n nga ai. Nu Maria kaw Rosary hti akyu hpyi ai lam hte seng nna mung dai zawn sha yawng tsun mai ai rai nga ai.

Madu a akyu hpyi ga gaw akyu hpyi ga ni yawng hta hkum tsup dik ai akyu hpyi ga re ngu anhte Hkristan Hpung masha ni yawng hkap la ga ai re. Hpa majaw nga yang Madu Yesu shi hkum nan sharin ya ai akyu hpyi ga nan rai nga ai majaw re. Anhte kaja dik ngu ai hpe myit la yin la nna hkan galaw na mai nga ai. Dai hpe Karai Kasang shaman ya ai re.

By Fr. Patrick Gawmaw Hkawng Yae

#question&answer

#rvakachinservice