Mangai Ta Ga Shagawp ( 24 October 2018 )

“Mangai Ta Ga Shagawp”

          Hkungga tsawra ai shiga madat nu wa hpu nau ni,  MKA, Edin kaw shanu nga ai Sara Kaba Paul Lahpai Zau Htang ka lajang shagun dat ai, “Mangai Ta Ga Shagawp”  hte rau, shagawng bumga shara shagu hkran nga ai nu wa ni yawng hpe, ngwi pyaw ai, mangai ta rai u ga ngu, shakram dat lu n ngai.

Hkungga tsawra Nu wa ni, hkai nmai amyu (18) a lam, gam garan dat n ngai. Ndai gaw mam re – mam hpe htu yang n gu pru, ashat byin kra naw shadu. Shat gaw hkum hkrang a lu sha madung, mungga hta wenyi a sak hkrung. Mam hpe Karai wa hpan da ya, anhte yawng hkru hkat let hkamja, Karai a chyeju hpe shakawn nga na.

2)    Ndai gaw hkai nu re – Ahpun gaw ding ding tsap, kasha gaw shingma e kap. N gun rawng ai dat kaja, hkai nu hpun hpe bang dat ya, hpan madu hpe shakawn nga na. 3)    Ndai gaw nai re – Alap gaw ntsa de kabyen, apawt gaw kata de maden. Nai nlawm yang shat sha nshang, chyeju shakawn let hkrai sha, shagrau sha-a nga ga law. 4)    Ndai gaw yungpadi si re – Yung padding si a ahpun, galu tsap let, lamu hpe madun. Yung padi tum she kaji ai, asi ni gaw grai kaba ai. Shi hpe nai simai hta bang, hkahkum si, naw kyu si ni manang. Nshung sai wan npu hta, Yupadi si mai ntsi hpe lu ga. Mu la dik ai re majaw, Karai wa hpe chyeju shakawn ga law. 5)    Ndai gaw, Majap re – majap ngu ai zau lau zau ban, lak lai ai lam yawng hta lak san. Ma ni sha yang kadau kadap, sha chye yang gaw majoi n’jap, chyeju dum ai kahtap galap.

6)    Ndai gaw, Chying hkrang re – Shawa hpawt ai shat mai re. Chying hkrang hpun hpe law law hkai, Atum kaw na sau hpe shaw, Chying hkrang lap mung akyu jaw, chyeju dum let, sak jaw gaw.

7)    Ndai gaw naw kyu si re – Nmut mangai hte kapyawn, nawkyu shapre hte gumhpawn. Mangai ten na shat mai mu hpa, Madu karai hpan tawn da ya. Kararai wa chyeju hpe dum ra.

8)    Ndai gaw, Kum-gyin si re – kum-gyin si gaw ga hkrawn, prat dep hkai sha pinra htawn. Shadu n’ra katsing grawp, Maw mawn ana yawng hpe nyawp. Shadu sha tim nam chyim mu, Lak lai hkam ja akyu pru. Chyeju dum na hkum malap, num htet ai bai kahtap.

9)    Ndai gaw, Hkahkum si re – Kahkum si hpe anhte hkai, mahkrung hte asi hpe shat mai mai. Tsi hkrung tsi nan shi gum hkawng, Ja hte bung ai nsam rawng. Kahkum si hpe sha lu yang, Karai Wa a chyeju hpe dum hprang.

10) Ndai gaw shaba si re – Shaba hpun hta aju tu, asi hpe sha yang gaw grai mu. Nai hte mung she mai shadu, ju la nna mung jap htu mai htu. Mu la dik ai shi a namchyim, mangai ta na, shaba ba yin.

11) Ndai gaw chyinglap re – Chyinglap hpun hta aju tu, Lap hte mahkrung gaw grai she mu. Nai si mai hta nlawm nmai ai, Chyinglap mung madung hpa she rai. Chyinglap hpun ni shara shagu nmu, bumga de she mu.

12) Ndai gaw Shanam re – Shanam a pawt gaw ga de hkrawn, alap rai jang, ntsa de brawn. Sihtu si mai yawng hte hta, shaman shi nan shara la sa. Lu sha sha shut na hkum tsang, Shaman bang sha yang, ana ahkya yawng hpe dang.

13) Ndai gaw shingtawn pan re – Shingtawn hpun a sama wa, yin wa ting she manam hawm nga. Shingtawn pan hpe jap htu htu, naw hpun shaman ni hte lu. Nga shan, Dumsu shan sihtu yawng hta bang, Simai shagu hta mai sung lang. Ndai ram manam hawm ai shingtawn pan, mangai ta de she woi dun bang.

14) Ndai gaw bumsap si re – Bumsap si hpun gaw grau hkrawn ai, Ning hkrun, hpun kaba ndung de lu du ai. Bum sap si hpe nai hte shadu, chyinglap nawkyu, yungbadi si ni hte lu. Yawng hte hkut jang shanam dawt, hpang jahtum hta  gaw, shingtawn pan da. Mu la dik ai si mai ntsin hte, dum nta masha ni yawng hte hpe, mu mai nam chyim jaw ya ai, Karai Wa a chyeju nan rai sai.

15) Ndai gaw saga hka si re – Saga hpun gaw, alap hkrawn ai, apu ngut jang asi si ai. Shi a nam chyim grai hka tim, atsi langai zawn mai shazim. Machyi hkum kahtet rai wa yang.. saga lap hpe kayup let arut ya, loi hkring rai jang, hkum ting katsi kawp mat shangun ya. Alap, asi yawng mai sha, si mai mung tai, tsi mung tai.

16) Ndai gaw hka-tan si re – Hka tan si a ahpun, hkrawn let she apu pu shangun. Shi hpe si ntsi hta mung mai bang sha, ju let jap htu mung mai htu sha. Galasi hte Hkata jap htu, shat sha grai shang ai si-htu.

17) Ndai gaw kumshu re – Kumshu a hpun gaw grai galu, chyup lu yang gaw grai she gwi mu. Mangai ta ten hta shi mung kabu, bumyi na nsi naisi hte lu. Chyeju dum ai poi shani na magun lit hta, Kumshu mung shara la ai da.

18) Ndai gaw jang wam si re – Jang wawm si a lap hta, aju hte mung makawp da a. Jang wawm si hpe mung nmai malap, mangai ta hta shi hpe mung hkap. Ndai ram hkum ai nsai nai si, hpan madu a tsaw myit ningli, Anhte ningsha ni shakawn ai, Ndai mangai ten hta nan rai sai. Nshung sama hte hpawn, mangai yin wa hpe hkap tau, Karai Wa a chyeju hpe mung shakawn rai nna, daining na mangai ta de sit shang wa ga law.  

Yawng hpe grai chyeju kaba sai,

Ka Shagawp ai -  Sara Kaba Paul Lahpai Zau Htang, Myitkyina, Edin Mare.