Tinang A Kashu Kasha Ni Hpe Kaga Ma Ni Hte Shingdaw Tsun Sharin Shaga Ai Lam hpe Koi Gam Ga!

online photo

Tsawra hkungga nu wa ni e anhte Kanu Kawa ngu ai ni gaw kashu kasha ni a matu lam madun ya ai shagan langai rai nga ai.Tinang nhpri nem ai raitim tinang kashu kasha ni hpe gaw grai hpri nem ai hte myit ngwi myit pyaw ai hte nga shangun mayu ai gaw anhte Kanu Kawa ni a ra sharawng ai lam rai nga ai .Anhte Kashu kasha Ma ni Kanu a hkri tung hta rawng ai ten kaw nna shangai chyinghkai dat ai ten, kaba wa ai ten du hkra yu lanu lahku bau maka wa ai ten du hkra gaw anhte a kashu kasha ni hpe tsun sharin shaga na ahkaw ahkang hpring hkra nga ai re.Raitim prat a galai shai ai hka leng a majaw tsun sharin shaga ya ai kashu kasha ni law wa ai hpe mung mu lu nga ga ai re.Kanu kawa ni hpe ningdang kalang galaw ai,shanhte gaw kanu kawa hta grau chye dum ai ngu lam ni gaw prat a hka leng a majaw kun kanu kawa ni sharin shaga ai lam shut ai majaw kun ngu myit sawn ra ai lam ni  rai wa nga ai.

Anhte Kanu Kawa re majaw sharin shaga ai lam shut na nre ngu yang sharin shaga ai lam hta mung lai ladat jaw kaja ra nga ai re.Sharin shaga ai ladat jaw yang she Ma ni mung lam kaja hta hkawm sa na rai nga ia.Dai re majaw anhte kanu kawa  ni malap mali ndum kau ai mi rai rai anhte a kashu kasha ni hpe jaw kaja ai hku sharin shaga lam ni hpe bai shalum shadum tsun garan ya na nngai.Tsawra hkungga ai nu wa ni shawng nnan gaw anhte kashu kasha ni hpe kaga Ma ni hte shinggaw tsun ai lam hpe koi gam ra ai.Tsawra Kanu Kawa ni kaw nna Anhte kashu kasha Ma ni hpe kaga ni hta grau nna byin shangun ningtawn shangun mayu ai myit a majaw shut ai tsawra shawang ngu mai tsun mai nga ai.Anhte Kanu Kawa ni gaw kaga masha ni a kashu kasha ni tinang a kasha ni hta grau ningtawn ai hpe mu jang mu ai i? shanhte kade ningtawn ai nang gaw dai pyi nlu galaw ai ngu tsun shingdaw ai lam ni gaw anhte a Kashu Kasha ni prat hpe sat taw nga ai hte bung nga ai hpe anhte Kanu Kawa ni dum chye ra nga ga ai.

Dai majaw anhte a kashu kasha ni hpe kaja wa nan ningtawn myitsu zet let ai Ma ni byin shangun mayu yang galoi mung shingdaw tsun sharin shaga ai lam hpe anhte koi gam ra ga ai.Dai zawn rai anhte a kashu kasha Ma ni hpe kaga Ma ni hte shingdaw tsun sharin ai lam gaw shanhte a myit kraw lawang hta manawn masham mayu ai myit hpe grau rawt shangun ai hte bung nga ai re.Shanhte hpe shingdaw shingjawng mayu ai rai yang tinang hkum tinang shingjawng chye ai lam hpe sharin ya ra nga ai.Dai ni hta na hpawt ni grau kaja ningtawn ai kashu kasha ma ni byin na matu, tinang hkum tinang nan shingdaw shingjawng chye na matu anhte kanu kawa ni kaw nna anhte a kashu kasha ma ni hpe sharin ya ra ai.Dai rai yang she anhte a kashu kasha Ma ni gaw kaga Ma ni hta grau nna ningtawn zet let myitsu ai kashu kasha ni byin tai wa lu na rai nga ai.

 

By : John Mung Hkrang

Add new comment

14 + 1 =