Sumla Hkrung Yungwi Hte Dai Ni Na Ramma ( 5 Feb 2019 )

Image of youth

Sumla Hkrung Yungwi Hte Dai Ni Na Ramma

 

           Sumla Hkrung Hte Yungwi ngu ai gaw, Shingni hpaji a pung ding gat lawk lahkawng rai nga ai. Sawn Hpan Hpaji Du Plato ngu ai wa tsun ai, Yungwi ngu ai gaw, Wenyi hpe N-gun Ta Wa de du shangun chye ai nga nna mung, tsun da nga ai hpe mu lu nga ai, bai sumru ai lam hpe singkaw shatu ya ai, Myit npyaw lam ni hpe shanyem ya ai, lam shagu hpe asak hkrung shangun ya lu ai nga nna tsun da nga ai.

           Sumla hkrung gaw shinggyim masha ni a masin salum, myit sawn sumru lam ni a n’tsa ga-up lu ai, sumla hkrung gaw yu ai masha wa hpe laga mungkan, prat langai ngai de du lu shangun nga ai. Tatut hta hkrum nga ai ru yak jam jau, jamhkaw lam ni hpe jahkring mi malap shangun ya lu nga ai. Mani ai lam, Hkrap ai lam ni hpe lu jaw nga ai. Sumla hkrung nlu yu ai prat hta, shinggyim masha ni gara hku sak hkrung nga na hpe tsawra ai Ramma kanau sha ni mung myit yu mai nga ai. An-hte nang ngai madat ai yu ngwi hte yu ai, sumla hkrung gaw tinang a prat hpe kaja ai hku mi rai rai, nkaja ai hku mi rai rai, lam madun ya lu ai atsam ni nga ai. Bai Myit masin n-gun, akyang lai len  ni hpe mung hten shangun nga ai re. Yungwi, Sumla hkrung ni hpe sadi maja na koi gam yu chye na hpe mung n-gun jaw shadum mayu ai, bai nna bawnu hte masin salum hpe  Gung byim shangun chye ai Yungwi sumla hkrung ni gaw, na asak wenyi ni hpe hkrat sum hkra galaw  ya lu nga ai re, grau nna nse nsa re ai sumla hkrung, yungwi ni hpe ya prat hta internet lam yan hta loi loi hte mai yu madat nga sai re majaw ndai lam hpe mung aja wa sha shadum mayu ai law.

           Tsawra ai Ramma kanau kasha ni nang yu taw ai yungwi, sumla hkrung ni gaw na a matu kaja ai n-kaja ai daw dan lu ai atsam nang hta nga ai kun? Masha law malawng madat shagu, yu shagu, san seng ai masin salum hpe  n-maza hkra, mai gan na du shang wa ai yungwi, sumla hkrung ni hpe sadi maja lata n-na she yu madat n-gun jaw na hpe mung shadum mayu ai, nang madat ai, yungwi, sumla hkrung ni gaw nang hpe tsaw ra myit, pyaw ai myit, sim sa ai lam, garum shingtau, tau chye ya ai myit, sadi dung ai myit, san seng ai lam ni hpe jaw ya lu ai yungwi, sumla hkrung ni sha shingni lam yan ngu na mai tsun nga ai re. Dai nre ai sha, pawt sindawng shangun ai, Num La Hkum shan hpyi ai lam, tinang hkum tinang matsan dum ai lam, tsa chyaru ni lu sha shangun mayu ai myit ni byim wa yang gaw, sadi maja na koi gam ra na re. Lahta na myit masa ni hte, nang nan sak hkrung ai rai yang Karai Kasang hpan tawn da ai tsawm htap ai na a hkum gawng shingyan masin salum ni gaw, maza ni hte hpring let hten za mat chye nga ai re, bai nna dai hta e prat dep wa ai gaw kaja ai lam langai re. Bai prat hpe lai ai mung shi chyu shi gaw kaja nga ai, masha hte nbung hkra, jan jan re mayu ai myit hpe gaw, kanau ramma ni hpe shadum n-gun jaw mayu ai, dai hta; Bu hpun mawn sumli ai lam ni mung shi prat hte shi rai nga ai majaw ramma ni prat hta hkan n-na hkan hpun ai mung hkap la nga ai raitim bu hpun sum raw ai lam gaw, n-htap htuk ai rai yang, sadi maja na bu hpun shangun mayu nga ai re. Bai kara ni mung, akawng kanu zawn marawng ai ni, tattoo ni, na kan ni, ta laraw, ta chyawp, amyu myu hte style hpe gaw, tsawra kanau ni hpe bu hpun sum raw ai lam hta yu nhtuk hkra galaw ai lam ni koi gam na matu shadum mayu ai. Mai gan mungdan ni hta, labu ni hpe dang kang dap hkra, kata na labu kasha dawng hkra, bu hpun nna, lata langai gaw ya sha bai shalung, ya sha bai shalung ra ai Jean labu ni hte mung bu hpun na n-gun njaw mayu ai. Tinang a style ngu ai hkrang gaw, masha shagu yu mau mahka ai gaw kaja dik nga ai raitim, masha shagu tsun jahpoi ai byim hkra gaw nrai shangun mayu nngai, Kara nsam amyu my chya ai, kara hkrang lata ai, bu hpun palawng sumraw ai, lam ni tinang hte htuk ai hpe lata hpun yang grau nna kaja nga ai re.

           Masha wa galaw shagu hkan galaw nra nga ai, tinang a hkrang hte tinang star byim ai gaw kaja dik re, dai majaw tsawra ai ramma ni myit sawn lam nshai na matu, myit sawn laika hpan ni tam hti hka ja na mung n-gun jaw mayu ai. Bungli dam ai lam gaw myit sawn dam ai lam kaw na sa ai rai nga ai. Myit sawn lam jaw yang gaw magam bungli mung jaw na re  ngu n-gun jaw dat let

 

 

Ka Lajang Ai – John Nnye Seng Tu

Add new comment

6 + 7 =