Shi (10) Jan ning Ma ni hte Gara hku nna kanawn mazum sharin shaga na

Shi (10) jan ning Ma ni hpe Gara hku sharin shaga kanawn mazum na

             Tsawra ai Nu Wa ni shi (10) jan ning Ma ngu ai gaw Ma gaw nrai masha kaba gaw nrai re ai aten re majaw yu reng na matu yak ai asak aprat ten nan rai nga ai.Anhte kanu kawa ni kaw nna ma ni hpe hten na tsang ai,nbyin grin ai ni byin wa na tsang ai majaw pat hkum ai lapran kaw nna tsun sharin reng hkang nlu ai shi jan ning Ma ni hpe ndai prat hta grai mu mada nga ai re. Gara kashu Kasha ni mung Ngai gaw Na Kawa re Na Kanu re nga nna shara shagu tsun ganawn mazum ai lam hpe nra sharawng ma ai.N lale lu ai shaloi sha ga madat masu nna shanhte byin mai wa ai shaloi gaw hkin dit le mat na rai nga ai.Shanhte hpe byin shangun mayu ai lam ni shanhte byin mayu ai lam ni hpe bawngban lu na matu bat mi hta kalang daram nrau ai raitim rau hkra di la nna simsa ai shara hta dum nta masha ni hkrum zup mung jahta bawngban ai lam ni galaw ging nga ai re.Dai hku galaw ya ai majaw shanhte hpe ahkyak la tsawra ai ngu ai hpe shadan shadawng ya nga ai.Bawngban ai shaloi mung Kanu Kawa hte kashu kasha ni bawngban ai re lam jahkring hkring tsun shalawm ra ai.Tsun Matsun ai lam lawm yang dai gaw bawngban ai lam nrai wa ai re majaw sadi ra ai.Bai nna tinang mung shi mung myit lawm ai hpan lama ma hpe rau jawm pawng galaw ra ai.Ga shadawn Nga rau hkwi hkawm ai zawn re lam ni galaw ra ai.Dai zawn rau jawm galaw ai majaw shi kanu yan kawa gaw dai hku rai nga ai nga nna ma gaw chye wa ai hte Tinang a kasha myit lawm ai lam ni myit masa lam ni hpe grau chye na wa na rai nga ai.Tinang shangai shaprat dat ai kasha raitim shanhte a myit masa hpe yawng gaw nlu chye nga ai re.Ya na zawn rau galaw ai majaw nang hte Ma nna lapran Kanu Kawa hte kashu kasha ngu ai madin ni nnga mat nna na a ntsa grau nna brang lang tsun dan chye wa na  rai nga ai. Anhte Kanu kawa ni hku nna shanhte nlu daw dan shi ai shut wa  na ra ai ngu pat hkum ai raitim shanhte maga hku nga yang shanhte hpe shagrit ai shanem ai ngu sawn la chye nga ai re.Dai shaloi shanhte myit hta myit htum myitru myit kaji ai lam ni byin wa nna hkrup mara rai nga chye wa ai re .Dai majaw shut yang shut u ga shanhte hpe dawdan shangun ra ai.Kaga ahkyak ai lam ni rai yang bawngban la ra ai. Ndai zawn bawngban dawdan garum la ai gaw shanhte hpe ahkyak la ai ngu ai hpe dan dawng shangun ai zawn shanhte myit sawn shut ai shaloi bai gram ya mai nga ai re.Shi jan (10) ning Ma ni gaw mungkan hta myit galai shai lawan dik ni rai nga ai.

                  Shanhte myit hte shanhte galai shai taw nga ai pyi shanhte ndum na re.Raitim shanhte ra sharawng ai n galai shai ai lam langai gaw shanhte hpe chye na ya nna shanhte tsun ai ni yawng hpe madat ya na matu rai nga ai.Tsun dan mayu ai lam ni mung Kanu kawa ni hpe sha rai nga ai.Kanu kawa ni nmadat ya jang gaw manaw manang ni hpe tsun dan chye ma ai.Shanhte a matu Kanu Kawa ni galaw ya na loi dik gaw shanhte tsun ai hpe madat ya na ahkyak dik rai nga ai. Shanhte hpe kaja nkaja hpe daw dan chye hkra mahtang shawng sharin ra ai.Kanu Kawa ni daw dan ya yang shanhte hkrai daw dan la nchye wa na ra ai.Shara shagu Kanu Kawa ni hpe sha kamhpa wa na rai nga ai.Kanu kawa ni hte Kashu Kasha ni gaw galoi mung rau nnga lu na re.Dai re majaw Tinang a prat a matu tinang hkum nan pyi nlu daw dan ai rai yang shi gaw shi a prat a matu kaja dik ai masing lamang ni hpe nlu daw dan wa jang mungkan hta nga sa  na yak wa na rai nga ai.Tinang a kasha ni gara de sa mayu ai ni,hpa galaw mayu ai lam ni hpe galoi mung chye da ra ai.Shi jan (10) ning Ma ni gaw grai lawan ai re majaw kaji mi myi grip laman tam shamat kau chye nga ai.Ndai prat, a ten ni hta yu reng la lu ai rai yang she shi prat shawng lam a matu tsawm htap na rai nga ai.Shanhte galaw mayu ai lam ni  ginsup mayu ai hpan ni hta rau jawm pawng galaw ai rai yang Kashu Kasha ni hte Kanu Kawa ni gaw langai ngu na sha byin wa nna shanhte ra ai hpe tsun dan wa  nna,Kanu Kawa ni hku nna mung tinang byin mayu ai lam ni hpe tsun dan lu wa  na rai nga ai.Shanhte hpe rit kawp hte nga sa lu na matu mung sharin ya ra ai.Dai zawn rai yang she shinggyim wuhpung wuhpawng hta nga sa na matu loi na rai nga ai. Ga shadawn Mungkan pyaw hpa lam langai ngai de manang ni hte rau sa na nga yang kalang ta pat da ai n galaw ai sha dai de sa ai majaw akyu rawng nrawng kaja nkaja ai ni hpe tsun sang lang dan ra ai.Ya prat gaw maigan htunghking ni hpe nre ai hku chye na shut nna Kanu Kawa hte Kashu Kasha,Sara/num hte jawngma asak kaba salang ni hte ramma ni shada hkungga chye ai lam, kanawn mazum chye ai lam ni mat wa na hpe tsang ra ai.Ndai zawn mabyin ni hpe tinang a Kashu Kasha ni koi yen koi gam lu hkra sharin ya ra ai.Bai nna Manghkang hpe tinang hkum nan hparan chye hkra sharin ya ra ai. Tinang shut ai hpe tinang nan lit la chye hparan lu hkra sharin ya ra ai.Dai gaw tinang a kasha kaja na matu rai nga ai. Shara shagu Kanu Kawa shanglawm yang shi jan (10) ning Ma ni tinang hkum tinang kamhpa nchye wa na rai nga ai. Anhte gaw anhte a Kashu Kasha ni hpe kam ra ai.Nkau Kanu Kawa ni hta nga  chye ai tinang a kashu kasha ni hta shinggan ga hpe grau kam chye nga ai re.Tinang a Ma ni gaw jawng kaw hpa baw byin ai lam hpe tsun dan ai raitim kaga ni na kanu kawa ni dai hku nre nga jang tinang a kasha ni a ga hpe nkam ya ai hta sha n ga nkau mi gaw kayet ai zawn re ni hpe galaw chye nga ai.Dai hku galaw ai lam gaw Ma ni hpe myit hkam sha lam grai jaw shangun chye ai re.Kanu Kawa ni shi hpe nkam ai ngu  myit gaw shi hkum sha n ga makau grup yin hpe du hkra nkam mat sana sha rai nga ai.Ma ni a tinang hkum nan daw dan ai lam tinang hkum nan a myit sawn myit jasat ni mat wa chye nga ai re.Anhte Kanu kawa ni kaw nna gaw yu maya sha myit la ai raitim Shi (10) jan ning Ma ni kaw nna gaw kaja kaba ai lam ni rai mat chye nna myit htum mat wa chye ai re majaw Tsawra ai kanu kawa ni Ma ni hpe kam ya ai gaw Kanu Kawa ni  hkum na kam ai hte bung nga ai re.Tsawra hkungga Kanu Kawa ni yawng tinang Kashu kasha ni hte grau ni htep kanawn mazum wa lu na dinghku dum nta masha ni byin tai wa uga.

By: John Mung Hkrang