Tsawra ai hkungga ai kun dinghku kanu kawa ni a anhte kun dinghku madu wa madu jan lapran langai hte langai jin mat ai ngu lam ni gaw nga na re.Raitim ndai nihpe myit galu hte lai di lu na matu gaw ahkyak nga ai.Anhte gaw tinang ai myit hte kadai mung hpring tup bung na ngu ai gaw nmai byin nga ai zawn hpring zup ai masha mung nnga nga ai.Dai majaw langai hte langai myit bung hkum bung rai lu na ngu ai gaw nloi la nga ai.Lahkawng raitim langai sha re ai prat gawgap sai nga jang gaw hkum lahkawng  myit langai sha rai na matu ni dik hku nna nga sa na matu gaw ra wa sai rai nga ai.Dai rai yang she ginrun hkrum ai kun dinghku byin tai lu na sha rai nga ai.Madu jan madu wa shada Langai hte langai ni dik hku nna nnga ai sha lam kaga ga rai mat na sha rai nna sadi dung shim lum ai kun dinghku byin tai na matu gaw yak hkak mat wa na sha rai nga ai.Anhte madu jan madu wa ni shada da asan brang lang nga ai lam gaw kaja ai raitim nkau masa lam hta gaw tinang a ningrum wa hpe grai hkra machyi shangun na zawn rai jang gaw ntsun ai lam mung kaja ai masa lam rai nga ai.

Anhte kun dinghku hta madu wa madu jan lapran langai hte langai jin mat ai ngu lam ni gaw nga wa na re raitim ndai masa lam ni hta tinang tsawra myit ni bai hkrung kaja wa na matu anhte madu jan madu wa lahkawng yan galaw la ra na re.Ga shadawn hkungran ladu hkrum ai ten sum tsaw sumra ten rau sha hkawm chyai ai shara hkan bai hkawm chyai ai,mani hpa pyaw hpa lam ni hpe bai tsun chyai ai lam ni bai nna madu jan madu wa rau sha kanawn mazum ai ten ni hta grau nna simsa pyaw lu hkra galaw la chye ra ai.Tsawra hkungga ai kun dinghku kanu kawa ni e dinghku hta sadi dung ngang kang ai dinghku byin na matu gaw shada garan lit la chye na matu mung ahkyak ai.Langai bungli hpe langai gaw garan galaw ya ra ai.Dai rai yang she tsawra myit ni grau nna law htam wa na rai nga ai.Anhte Kun dinghku langai hta hkam sharang ya ai,pu ba ai nga yang aten na wa jang gaw ahtik ahtawk jahkring hkring byin wa chye nga ai dai majaw rap ra ai hku nna garan galaw ya chye ra nga  ai.Bai tinang tsawra nna prat a ningrum ningtau hku nna lata la sa re majaw kaga langai ngai hpe tsawra yu na ngu ai lam hpe anhte a myit hta nmai sumru nmai myit sai.Tinang myit hta npri nem ai lam ni nga wa yang tinang a ningrum hpe sha tsun dan ga bawngban ga kaga jasam ni hpe hpaw tsun dan ai lam n galaw ga.

Kaga jasam wa hpe jahkring hkring tsun hpaw dan ai rai yang anhte a dinghku hta hkra machyi wa shangun chye ai re. Kun dinghku ngu ai gaw nmu lu ai sundun sumri tsawra shawang myit ngu ai tara ni hte gawgap da ai re majaw ndai tsawra myit sundun sumri hpe ngang kang hkra galaw la ra ai.Anhte Madu jan madu wa ngu ai gaw Wa hte Shinglet nga ai zawn kalang marang gaw n hkrum ai ten ni mung nga na sha rai nga ai.Ndai zawn nhkrum ai lam hpe kaji ai kaw na grau kaji hkra galaw la lu ai rai yang she hka garan ai lam nnga ai shim lum simsa ai dinghku byin tai wa lu na sha rai nga ai.Dai hku nrai yang langai hte langai myit masa nhkrum hkat ai lam ni gaw grau law wa nna hparan la na yak wa na sha rai nga ai.Anhte a kun dinghku ga hkang ai lam kachyi pyi n nga hkra gaw anhte madu jan madu wa lahkawng yan a lit kaba nan mung rai nga ai.

By : John Mung Hkrang