Ramma Hte Tsawra Myit, 28 August 2018

          Tsaw ra myit ngu ai ga hpe na dat ai hte Ramma ni gaw hprang maja nga ga ai, Myit gum htawn ai, tsaw ra myit gaw masha hpe rim sha lu ai atsam nga ai lam langai re , bai tsaw ra myit ngu ai ga hkaw hpe na dat ai hte  an-hte a kanu kawa ni gaw salum gahpra byim n-na Myi ni shagan wa nga ai…Wa Karai Kasang nye kasha kadai wa hte sum tsaw byim taw ai kun nga let Myit tsang ra ai lam gaw grau nga ai, bai n-na tsaw ra myit ngu ai ga hpe na ai hte Nawku hpung gaw Ja Chyum ga hta lawm ai tsaw ra myit a lachyum hpe madi madun na shajin nga ai dai hta grau ai gaw shinggyim masha ni shada da teng teng man man hte tsaw ra chye na madung ahkrak nga ai.

          Nawku hpung kaw na gaw tsaw ra myit a lam hta sara ngu na mai tsun nga ai tsaw ra myit ngu gaw karai kasang rai nga ai.GOD IS LOVE dai majaw  LOVE IS GOD ngu jang mung maren rai nga ai .Karai Kasang ngu ai  amying shing teng gaw nawku hpung a madung ga hkum rai taw nga ai majaw n’dai tsawra myit ngu ai mung karai hte matut manoi n-na Madung ga hkum ngu na sha mai tsun nga ai, lai wa sai ten ni hta tsaw ra myit hpe lachyum hpaw ai shingyim masha ni gaw nawku hpung hpe madat mara nga ai ,  dai ni na ten gaw moi moi na ga dingsa ni shalai nga ai ngu na sha shadu nga ai, tsaw ra myit a lam ndai hta grau myit shang sha hkra tsun lu madun lu ai lam ni hpe hkan shachyut lu ai prat rai wa sai majaw nawku hpung gaw hkan ndep mat wa ai zawn byim nga ai. Bai tsaw ra myit ngu ai gaw nat langai zawn sha rai nga ai shingyim masha ni tsun gajai nga tim kadai mung  n-mu lu nga ai bai n n-na Mungkan hta tsawra myit a lam sara kaba zawn tsun taw nga ai ni mung kaja wa nga yang tsaw ra myit mat n-na, hkan tam nga ai myit sawn sara ni  byim wa ai ni law nga ai re.

          Tsaw ra myit hte hkam sha taw ai ni gaw, gara shingnip, tara shingnip ni hpe sha jahtum tam nga ai hpe mung mu lu ai ,dai re majaw ndai lam hta  ramma ni hku n-na tsaw ra  myita a matu salum duk htak ai lam hta naw ku hpung gaw lawm n-ra ai ngu n-mai shadu kau nga ai ngu madi madun mayu nngai. Ma Kaji ai ten hta kanu gaw ma langai a matu ahkrak nga ai ,malu masha nsha lu tim nra nga ai kanu hpe mu na gaw dai ma hta madung rai nga ai re , sak prat ram wa ai ten gaw tsawm htap mayu wa ai sha n-ga salum ni ginsup chye wa nga ai, dai ten kanu hpe koi gam chye wa n-na, kanu makau kaw nga ai pi shuk ai zawn hkam sha wa nga ai. Salum gum htawn chye wa ai hte  kanawn mazum lam ni mung dam lada wa nga ai, Jawng, Makau grupyin, htingbu grupyin, nawku hpung grupyin, ni a lapran myi hpaw , na jawng rai chye wa nga ai, ndai zawn si mani ai mayak mahkak hpe hpran lu na gaw langai sha nga ai. Ramm ni ntsaw rau na matu akyu grai hpyi sha-ngun ai lam rai nga ai, Madu karai kasang a tsaw ra myit hpe teng sha chye na hkam sha, chye na matu sharin  ya ra ai, Nu Maria hte sanpra ai ni a kabai kau da ai lam, bai  shagrit shanyen ai hte  tsaw ra chye ai lam ni hpe katsi chye la hkra sharin jaw sharin hkam la ra nga ai. Langai hte langai manu shadan chye na matu sharin ya ra ai, langai a n’tsa langai amyet n-htuk na matu sharin ya ra ai, akyu hpyi ai lam hta myit shang sha wa hkra sharin jaw ra ai , chyoi pra hkum hkam ai lam hte mara raw ai lam ni a manu hpe chye na hkra shakut ra ai, ya prat na ramma ni gaw myi hte  ga shaga ai lam ni n-galaw nga masai, Massage zawn re ni bai Phone ni hte shaga ai lam ni galaw ga sai re majaw nan-hte a myi hpe yu n-na nan-hte myit hta hpa rawng ai ngai chye ai ngu n-mai tsun nga sai prat rai wa nga ai re, dai re majaw tsaw ra ai nu wa ni mung  ramma ni hpe tsaw ra myit a lam n-myit shi yang karai a lam hpe chye na hkra sharin jaw na lam hta  n-gun dat ra nga ai.

          Ramma ni hku n-na mung tsaw ra myit hpe lata ai lam hta myit n-lawm na matu shadum n-gun jaw mayu ai, tsaw ra myit ngu ai lam gaw Bus Car zawn sha rai nga ai, Bus Car langai shalai kau n-na yawn ka-un hkum rai taw matut n-na la taw u hpang Bus Car langai gaw ten du yang du wa na sha rai nga ai, ramma ni hku n-na tsaw ra myit hpe ginsup  hpa langai zawn  ahpa atang zawn n-mai myit sawn da nga ai, ndai tsaw ra myit ngu ai lam nang n-shangai shi ai shaning law law ten kaw na sak hkrung nga sai lam langai rai nga ai tinang hta grau kaba nga ai re majaw hkungga manu shadan ra na gaw teng sha re ngu tsun shadum n-gun jaw mayu ai tinang gaw shi hpe ginsup hpa langai zawn galaw tim shi gaw hpa n-byim nga ai dai tsaw ra myit gaw nang hpe mana hkra galaw ai ten she sum tsaw mana langai zawn, aw ra n-du, ndai n-du, prat de du mat chye shangun nga ai re. tsaw ra myit a majaw prat hten mat ai ni ndai mungkan hta law nga ai hpe mung mu lu nga ai.

          Tsaw ra myit a majaw ngwi pyaw simsa mat wa nu ai ngu ai gaw mau mwi kaw sha nga nga ai re tsaw ra myit a majaw, myit tsang, hkam sha , ra marit nga  ai lam ni gaw teng sha rai nga ai ngu tsaw ra ai ramma ni, tsawra myit hte seng n-na ngwi pyaw sim sa ai lam hpe hkam la lu u ga ngu yaw shada dat let

ka lajang ai wa;        John Nnye Seng Tu

                              RVC Gin jaw rung

                              Aung Nan , Myitkyina