Masha Madang Dep Ai Masha ( 7 March,2019 )

Masha Madang Dep Ai Masha

           An-hte masha shagu kaji ai ten ni hta ma kasha ni rai nga ai. Kaba wa tim Ma kasha naw rai taw yang gaw, masa lam nrai wa nga ai. Masha ni hpe ndai wa gaw  Masha Kaba Myit Myit Ai, Ma Myit Myit Ai, ngu ai hte tsun chye nga ga ai re. An-hte shinggyim masha ni a shingra tara atsam ningja hta e, tinang a gyep ai mungkan kaji kaw na grau grau dam lada kaba wa ai mungkan de, Rap lu ai atsam ni, grai law nga nga ga ai re. Raitim masa amyu myu a majaw nkau ni gaw, asak sha kaba mat wa nga ai. Ma kaji ni a prat kaw na dinghkyeng nle wa nga ai hpe mu lu n-ngai.  Ma Myit Myit  ai akyang hpe hkrang amyu myu hte mu lu nga ai hta; pawt sindawng ai, mara matsing ai lam, manang wa hpe kam shamyet lai ai, masha ni nye a lam hpa ni tsun taw na kun? Ngu ai myit hte nchyi nmu byim ai lam, manang wa hpe nkaw ai lam, masha wa hpe mara shagun tsun jahpoi ai lam, shakawng ai lam, manang wa a n’tsa dang sha ai lam, manang wa nhkam hkra shala ai lam ni ngu ai tingkyeng masa, myit masa ni gaw, Ma Myit nhkoi ai ni hta nga chye ai lam ni rai nga ai. Bai masha langai hpe Masha Kaba Myit rawng ai ngu ai hta gaw; manaw manang ni hte rap ra hkra ganawn mazum chye ai, tinang hkum tinang kam ai myit grau rawng lu nga ai, tatut hkrang shapraw ai prat pan dung nga ai lam, daw dan chye ai lam, prat magam a matu; ahkrak ai lam hte, n- ahkrak ai lam ni hpe gin hka chye ai lam ni, mabyim masa ahkying aten hpe, ra kadawn ai lam ni hta hkan n-na, galaw ya lu ai lam ni, ndai zawn re ai atsam ningja rawng ai ni hpe mai tsun nga ga ai re. Shinggyim masha shagu Kaba Wa Ai Masa lam hpe hkam jan bawng ring wa ai hkrai rai nga ai. Asak kaba wa sai hpe myit dik n-nga ai sha kaja tatut masha kaba byim wa hkra, ahkak tawn gring ai lam yen ( 4 ) hpe tsawra ai Ramma ni hpe shadum n-gun jaw mayu ai.

( 1 ) Ngyan Marai Kung Hpan Ai Lam

           Ngyan Marai ngu ai gaw; shangai wa ai kaw na lawm wa ai atsam ngu tsun ga ai raitim, shakut nna lu la mai ai lam langai mung re ai hpe kam nga n-ngai, Ngyan marai kung hpan ai wa hta, madu myit, sawn ningmu ni nga ai, manang wa a ningmu hpe mung hkungga ai, loi loi hte sha tinang a ningmu kaw na kashawt na yak nga ai, lam yan langai ngai hte man-ap hkrum wa ten hta mung sung sung hka ja nna na she galaw chye nga ai. Laga wa a ningmu ni hpe mung madat hkam la ai, ngut nna, daw dan ai lam langai hpe asan brang daw dan jahkrat chye ai, dai zawn daw dan ai a majaw byim wa na mang-hkang`ni hpe mung lit la gwi ai, shi daw dan ai lam shut sai nga yang mung galai shai na matu bai gram na matu myit ni n-ung ang nga ai, shi a matu yak wa na lam byim wa tim, jaw ai masa lam yan hpe hkungga ai, machye machyang hpaji hparat ngu ai gaw kaba la ai atsam langai rai nga ai. Ngyan marai kung hpan ai na matu tsawra hkungga ai ramma ni hku nna, kaning re ai hpaji ni hpe mung hkaja matsing na hpe nmai lagawn ai, laika law law hti ai ra ai, Myi, Na , galoi mung hpaw da ra ai. Tinang a makau grupyin ni hta hpa byim taw ai hpe sha gaw chye ra nga ga ai. Mabyim ni hpe myit sawn, maram tsun shaga lu na matu aten hpe jaw ra ga ai.

( 2 ) Myit Masin Kunghpan Ai Lam

           Ma kaji ten hta myit kraw kata byim wa ai lam shagu hpe jaw ai / shut ai n-sumru ai sha galaw dat ga ai re. Tinang myit hta myu mi nga yang hkrap dat na, pawt na, rai nga ai, masha kaba ni gaw myit ngalu wa yang adup gayet dat na, kalang lang myit ra ai hpe hkan galaw ya dat ga ai. Ma langai gaw shi myit hta e, byim wa ai yawn ai lam, kabu ai lam, pawt ai lam, pyaw ai ngu ai lam ni hpe sharang na nrai nga ai, bai masha kaba byim wa ai shaloi dai zawn byim lu na nloi nga sai re. Myit masin a hkam sha lam ni hpe sharang chye wa ai, Myit masin kung kyang ai ni gaw mabyim masa langai ngai a majaw shan hte a prat nhten za mat nga ai, ndai lam yen ni hpe sari shadang hte tatut mahkrum madup hku nna hkam jan hparan chye nga ai. Myit ndawt ai lam ni hpe n-gup shabawng taw na malai, kraw hta hkam sha ai hku tsun shapraw chye nga ai. Tsun jahpoi ai lam ni hpe mung, myit a-na lu na madang nhkam sha taw n-na hkam la / yin la chye nga ai.Myitru lam ni, myit shuk ai lam ni hpe mung, nhprawng mat ai sha, hpran lu ai atsam ni rawng nga ai. Pawt sin dawng ai ngu ai gaw, shinggyim masha shagu hta nga nga ai. Raitimung kadai hpe pawt na, hpa a matu pawt na, galoi du hkra pawtt na, ngu ai ndai lamyen ni hta hkan nna jaw ai / shut ai hpe gin hka ra na rai nga ai, ndai hta ramma ni myit hkam sha lam hku nna, kapaw chey ai akyang hpe gaw koi gam ra na re. Myit hta byim taw ai hkam sha lam gaw hpa ta? Ndai lam hte seng ai masha wa chye hkra masa jaw jaw gara hku galaw na ngu ai hpe lata chye ra ga ai ngu tsun mayu nnngai.

( 3 ) Shyinggyim Wuhpung Hte Seng Ai Kung Hpan Lam

           Shyinggyim masha langai hku mungkan ga de shangai pra sa wa sai ngu ai hte shyinggyim wuhpung wuhpawng ngu ai shingwang kata de nkam tim du shang wa sai rai nga ai. Tinang a n’ta masha, makin jinghku, n’ta htin bu, jawng rau lung manang, lawk kata na ramma ni hpe koi nmai tsun shaga kanawn ra na rai nga ai.Shinggyim wuhpung kunghpan ai wa gaw, masha ni hte tsun shaga lu ai atsam nga ai, bai kanawn mazum tsun shaga ai ni hte mung hku hku hkau hkau chye nga ai, tinang nga taw ai wuhpung a tara masa ni hte bung pre hka nga chye ai atsam ni rawng ai, raitim n’ta masha hte wuhpung hpe kam hpa lai ai hku nrai nga ai. Shawa a matu ra kadawn sai nga yang tingkyeng akyi pi ntawn kabai na jin jin nga taw ai wa rai nga ai, masha wa hpe tau chye ya ai bai tsawra ai ramma ni hku nna shinggyim wuhpung hta kung hpan wa lu na matu ‘ Ngai ‘ ngu ai tingkyeng myit hpe dang kau nna manang wa a matu myit ya chye ai rai ra nga ai. Ma kaji ten hta yawng gaw ngai hpe madung da nna tsawra ma ai ngai ra kadawn ai yawng  galaw ya ai raitim kaba wa ai ten hta gaw ngai gaw laga masha wa hpe daw jau ra na ngu ai machye machyang rawng na ahkrak kaba rai nga ai hpe mung matut shadum n-gun jaw mayu ai

( 4 ) Arawn  Alai Kung Hpan Ai Lam

            Sharin shaga ai lam yan hta kaja dik ai masa lam yan gaw kaumhpa jaw/ dam jaw ai lam ngu tsun ma ai, kaja ai galaw yang kumhpa jaw na,n-kaja ai lam galaw yang dam jaw na ngu ai gaw du sat ni hpe sharin ya ai lam hta tang du ai akyu langai rai nga ai, lawan wan mung chye loi nga ai, bai ma kaji ni hpe sharin ya ai lam ni hta mung ya na zawn jai lang ma ai re. Ma kaji ai ten hta myit su kung hpan na lam hta sharin ya ai ten malawng maga gaw, arawn alai ni hpe dip sharin chye ma ai, ma ni mung, kaja ai / n-kaja ai n-myit yu nga ai, kanu kawa ni n-kaja yang n-kaja ai kaja yang kaja dat ai sha rai nga ai. Asak ( 10 ) jan wa ai ten hta gaw tinang myit sawn sumru ai lam ni nga wa ai, tinang hkamla ai lam ni hpe gara hku galaw nga sa na ngu ai lam yen ni hte sak hkrung ai , grau nna mung hkrak tup rai wa ai, pan dung nga wa ai, bai arawn alai kung  hpan ai ni gaw arawn alai ni hpe manu shadan let hkan shatup lu ai atsam ni nga ai. Ramma langai hku nna hpung magam lam hta hkan nang shatup ai hta rai rai, arawn alai hpe makawp maka ai hta  rai rai, tinang hkum nan hkam la ai lam hte tinang kam na galaw nga ai ngu ai madang du na ahkrak nga ai, dai rai yang she, tinang kam ai arawn alai hte sak hkrung lu na rai nga ai bai tsawra ai ramma ni yawng mung hpring tsup ai shinggyim sak hkrung lam hta bawng ring rawt jat kalu kaba wa mu ga ….yaw shada let

Tang Madun Ai – John N-nye Seng Tu

Myitkyina Gin Jaw Rung