Kade A Lata Hta Kun? ( Youth Program )

 

Tsawra ai ramma kanau kasha ni.... Awng Dang Na Lam gaw, kade a lata hta kun?..... Mying Gumhkawng Lam Mung kade a lata hta kun?.. Sut Su Ngamu Ngamai Lam Mung kade a lata hta kun? ngu, tsawra ai ramma ni hpe tsawm sha myit yu let mahtai tam htai shangun mayu nngai.Anhte a makau grup yin ni hpe yu yu dat ga nga yang, awng dang taw nga ai ni, mying gum hkawng taw nga ai ni, sut du lau ban nga ai ni hpe, layung madun yang nshut mu lu na rai nga ai, yawng gaw lam yan masa hte akyu ara matut manoi nga ai lam hpe tsawm sha myit yu sawn yu yang grau chye wa lu nga rai nga ai.

Naku mi bai rai yang gaw, nmu lu ai kam maka hpe ga baw shatai chye nga ga ai. bai layung madi chye nga ga ai. “ Shi gaw kam kaja nga ai gaw “ ngu ai ga chye tsun nga ga ai, kaja wa nga yang, kam kaja ai ngu ai gaw, shakut shaja ai lam hte, ahkaw ahkang ngu ai lam yan lahkawng hkrum mat ai lam sha rai nga ai. Kam ngu ai gaw, Magam bungli rai nga ai. Kam kaja mayu yang, magam bungli hpe atsawm sha galaw na ra ahkyak nga ai.  ya tatut prat magam lam hta e, myit sawn sum ru, dang dep ai nyan hte magam bungli langai shakut shaja lu nga ai lam gaw, myit dik nga shara langai rai nga ai hpe mung n-gun jaw mayu ai. ya tatut sak hkrung nga ai ten hta, kam kaja na matu, madu galaw ra na magam bungli, galaw gring ai magam bungli ni hpe, shakut shaja sa na lam sha rai nga ai. dai rai yang she, kam kaja ai lam ngu ai lam, dai ni hpawt ni nrai yang pyi, lani mi hta, nang kaw du wa lu na rai nga ai law. dai zawn shakut galaw nga ninglen, kam kaja ai ngu ai  lam ( Sh ) awng dang ai lam, nang kaw ndu shi ai rai yang, ten ndu shi nga ai majaw rai nga ai, jaw gring ai aten ladaw langai jaw na hpe, lat taw na ra nga ai ngu ndai shara kaw mu mada lu ai. Bai mungkan hta, myen mung hta, jinghpaw mung hta, sut du law law ni a lam ni hpe na yu mu ga na ni, chye ai ni law na hpe kam ai, dai hta nchye na gaw, shan hte ni a, shakut shaja ai lam hte mayak lam ni hpe gara hku man ap hkrum katut tawt lai, lai wa masai lam ni rai nga ai.  Chye na mu mada lu na lam gaw, shan hte ni yawng, lani mi hte sha, sut du tai wa lu ai lam nrai nga ai hte lahpwt mi hte sha awng dang myig gum hkawng wa ai ni nrai nga ma ai lam re. Lani mi, lahpawt mi hte awng dang rawt wa ai ni gaw, lani mi, lahpawt mi hte sha, hkrat sum mat mat wa chye na loi nga ai, dai majaw hkungga gring ai lam ngu ai gaw, dum bret lam ngu ai nnga ai ngu ga malai ni paw pru wa ai rai nga ai.

Anhte ni  mu mada lu ai makau grupyin ni hpe yu dat ga nga yang mung, tinang lagaw tinang tsap  prat hte, lung wa ai sut du ni gaw, kanu kawa jaw da ai hte lung wa ai sut du ni hta, grau law htam nga ai hpe mu lu na rai nga ai. Prat  a majaw, lai ladat a majaw, awra wa a majaw, ndai wa a majaw ngu zawn re ni hte mara kapa let, aten jahtum taw ai ni nrai nga ma ai Bai anhte ni galai shai ra nga ai, kumpa nawng hta chyat taw nga ai myit ni hpe, bai gang baw na ra nga ai. Nga leng langai kumpuk kumpa nawng hta chyat rawng mat yang, masha law law a n-gun hte bai lu shaw la mai nga ai. raitim anhte a myit ni hpe gaw madu hkum galai shai shakut shaja yang she lawt lam lu na rai nga ai. Awng dang na matu, sut su wa lu na matu ngu ai gaw shi ning, shi manga ning, shning hkun ning ngu ai ten ladaw gaw, rawt jat mayu ai wa a matu, aten alaw alam langai mi mung rai nga ai. Anhte nang ngai hte sak bung, jawng bung ai ni, jawng rau ngut ai ni hpe yu yu yang mung, mu mada mai nga ai. nkau ni a lu sut lu su lam ni gaw, mau hpa zawn, nkau mi rai yang, nang ngai zawn sha, bai nkau mi rai yang, matsan jam jau hkrum let sha, bai yaw shada lam pan dung hte shakut ai wa hte, yaw shada lam n-nga dai hku sha, shalai kau ai ni a shai hkat ai lam ni rai nga ai. ya ten du hkra, yu maya masha zawn sha sak prat hpe shalai nga ai nang ngai ni yang, galoi ten hta she sut su na, rawt jat kalu kaba na  ngu zawn re ai hte yaw shada pan dung jahkrat lam nnga let, n-shakut ai lam gaw hkrak rai na re, dai majaw tinang hpa lu mayu ai, hpa byim mayu ai ngu ai hpe, hkrak tup yaw shada lam pan dung jahkrat let, aten ladaw matsat nhtawm shakut na nga yang  du wa na shaning hkun ning laman hta, singapore mungdan hpe ndep ai mi raitim, nang a kun dinghku nta masha, makin jinghku ni, ya na mabyim masa hta grau ai, nga sa tsaw ai lam, sut su nga mu nga mai lam yan masa de du wa lu na gaw, teng sha rai nga ai, dai majaw mi shawng i san da ai awng dang ai lam gaw kade a lata hta rai.... mying gum hkawng na lam ni mung, kade a lata hta rai ... bai lu sut lu su nga mu nga mai lam ni mung kade a lat ahta rai ngu ai ga san ni yang a mahtai hpe htai ga nga yang, Anhte nang ngai ni yawng a lata hta sha rai nga ai ngu mahtai jaw let, awng dang ai sak prat hpe lu madu lu wa mu ga ngu yaw shada let,

 

#youth

#rvakachinservice

 

Add new comment

5 + 10 =