Hka Gawm Kata Na Myiman ( Youth Program )

Dai ni na ramma Dai ni na ningbaw ningla ngu ai ga malai hte maren, dai zawn re ai ningbaw ningla ni gaw, tinang a kan bau magam lam hpe sak prat hte maren manu shadan chye ra nga ga ai, kan bau magam lam gaw, tinang kung kyang ai hpaji hte, ten galu galaw shakut sa wa na lam hpe tsun mayu ai mung rai nga ai. dai majaw, kan bau magam lata ai lam hta, tinang a myit lawm ai lam hte bung pre na mung ra kadawn lam lagnai rai nga ai. dai kan bau magam lam hpe lata ngut sai hte rau, dai magam bungli hpe, laga lam yan ni yawng hta, manu shadan chye ra nga ga ai ngu shawng nnan e tsun mayu ai law.   

Magam dap nnan hpang galaw na ramma ni hkum tsun, masha kaba ni mung, shanhte a, magam bungli hta, sut du wa, manager ni hpe grau nna, ahkyak la chye nga ma ai. Kalang marang, Store gawk na magam gun rai yang mung, arai htuk na matu, madi madun laika ni hpring tsup yang she htuk ya chye nga taw tim, sa htuk ai masha wa, nang hta, grau aya tsaw taw yang, ahpa atang hte sha htuk ya chye nga ga ai. dai zawn kalang sha galaw hkrup tim, nang gaw, nang a kan bau magam bungli hpe, nhkungga ai wa hte bung nga ai. Dai majaw tinang a bungli hpe tsaw ra u. Tinang a company hpe gaw hkum tsaw ngu ai ga hte maren, nang gaw, jahpan lang magam gun prat hte prat tup kan bau na matu rai nga tim, tatut company  hta gaw, prat tup galaw na n-galaw na kadai nchye nga ai. Dai majaw, nang gara kaw mi du du, mying kaja hte ngam taw na ahkyak la nga ai. Na a magam bungli hte seng nna, rip kawp ni hpe, aya tsaw ai, nem ai hpe yu nna, hkum galai shai kau dat u, sut du mi rai rai, nang a bungli hte seng wa yang, hkrak tup chye galaw na ra ahkrak nga ai. nkau magam gun ni gaw, lahta na ni a masat ya ai lam ni hpe ra sharawng nga ma ai. Shanhte a shawng hta sha grai shakut dan nga ma ai.Raitim magam gun shadada rai yang gaw, lahta na masha ni hpe tsun shaga ai zawn, ganawn mazum ai lam taw nga ai hpe mu lu nga ai.kaja nga yang, magam gun shadada grau nna pyi zing lum hku hkau kanawn mazum ra nga ai. Bai na a magam bungli hte seng nna, rip kawp hte seng nna nhkan sa ai wa gaw, sut du mi rai rai, na lahta na aya tsaw ai wa mi rai rai, myi pat let, ahpa atang nmai galaw ai. lam yan masa hpe chye na hkra si mani ai hte tsun shaga let, na magam bungli hpe rip kawp hte hkrak makap maka ra nga ai, bungli hta hkungga ai wa gaw, bungli hta mung hkungga hkrung ai lam ni lu la wa na sha rai nga ai.

Moi shawng de Uhku Du langai gaw, mahkon hkon grai myit lawm nga ai da, raitimumg shi a nsen gaw ngoi npyaw nga ai majaw, nang maling kata na du sat ni gaw nkam madat nga ma ai. dai majaw, dai uhku du gaw, hpang langai maling de htawt na matu myit nga ai, dai zawn, nam maling langai hpang langai htawt sit wa tim, kadai mung shi nsen hpe nkam madat nga ma ai. dai ten, dai  uhku du wa mung myit daw mat nna, nam maling htawt sit na mung nmyit mat ai sha, nga mat nu ai, dai zawn sha, tsawra ai ramma kanau kasha ni magam dap hta npri nem shagu bungli htawt na nmyit ai sha, bungli langai hta, yawm htum laning mi ram sha gaw nga let, tinang a ra rawng ai lam ni hpe jahpring shatsup da ra nga ai ngu, n-gun jaw mayu ai. Ya na anhte a prat hta, kung kyang ai magam gun ni taw wa nga ai majaw, company ni law malawng mung, moi na zawn shi rip kawp nye rip kawp nga ai nnga ai sha, magam gun kaja ni tam nga ma sai rai nga ai. Lama na nang hpe dai zawn sha, bungli shang na matu, shaga hkrum ai ten, nang a tatut magam bungli hta le na matu tau hkrau tsun u, bai lit la ya na wa hpe masa hkrak lit galai ya ngut ai hpang she bungli pru u, tinang a majaw magam bungli ni hpe nmai hprai kau shangun nga ai.
Dai zawn lai masa hte pru ai rai yang nang hpe bungli a ntsa manu shadan nga ai lam masat jaw na gaw teng sha rai nga ai. Pu kan magam bungli gai wang hta tinang a mying gaw ahkrak la nga ai, mying kaja lu na matu hkrang shapraw nga ai ten, yak hkak jam jau ai daram, mying hten na gaw aloi sha rai nga ai re, dai majaw kan bau magam lam hta, bungli hte seng nna, nang a ngam nga ai sak prat ting hta, mai kaja lam lu na , nlu na ngu ai gaw, dai hka gawm kata na myi man zawn sha, bungli hpe kade ram hkungga lu ai rai ngu ai lam yan hte matut manoi seng nga ai ngu gam garan ya let....

#youth

#rvakachinservice