Anhte Tsawra Ai Ni A N gun Jaw Ga gaw Tinang A Matu N Gun Tsi Kaba Rai Nga Ai

Online Photo

Tsawra hkungga kun dinghku kanu kawa ni e tinang tsawra ai ningrum ningtau,kashu kasha kanu kawa kaw nna n gun jaw ga ngu ai gaw n gun tsi kaba langai rai nga ai.Ndai hpe chye na myit dum let tinang tsawra ai wa langai ngai shut lam galaw hkrup ai,mara galaw hkrup ai ten shawng mara tam mara jaw ga ntsun yang grau kaja ai.Hpa majaw nga yang shi hkum shi shut dum nna myit npyaw myit htum nga ai ten mara jaw mara shagun dat ai rai yawng grau nna myit htum myit npyaw mat na sha rai nga ai.Dai majaw tinang a n gup kaw nna mara shagun ga tsun sa na nga jang atsawm sha myit yu ga,n gun jaw ga tsun na rai jang gaw hpa nmyit yu ai sha n gun jaw ga tsun ga,dai n gun jaw ga gaw shi a matu gashawt galau taw ai kaw nna bai rawt lu na n gun atsam mung rai nga ai.

Mayak mahkak lam gaw galoi ten gara shara kaw na gara hku nna pru na nga ai lam gaw lak lai ai lam  n raitim, lak lai ai lam gaw dai mayak ni hpe gara hku hpran lu na ngu ai n gun gaw gara kaw na lu na ngu ai lam rai nga ai.Ndai n gun gaw anhte law malaw hta gaw tinang a ningrum ningtau hte dum nta masha ni jinghku jingyu manaw manang ni kaw na sha rai nga ai.Anhte tinang tsawra ai ni,tinang hpe tsawra ai ni hpe n gun jaw ga tsun ga.Ndai zawn n gun jaw ga tsun ai shaloi tsun ai wa hkum nan mung n gun lu la mai nga ai.Dai majaw tinang tsawra ningrum ningtau hpe jahkring hkring atsawm chye hkra yu ya ra ai.myit kaji taw nga ai kun? myit kaji garen nga rai yang  n gun jaw ra ai hpa majaw nga yang shi a matu n gun tsi gaw tinang kaw nga nga ai re.Tsawra hkungga ai nu wa hpu nau ni anhte a kun dinghku ngwi pyaw na matu gaw langai hte langai ra rawng ai lam hpe chyena jahpring shazup  ya ai hte shada da n gunjaw hkat let anhte kun dinghku hpe gaw gap sa wa ga.

 

By : John Mung Hkrang

Add new comment

15 + 2 =