"Mai kaja ai kang ka ai dinghku kawa langai byin hkra gara hku shakut ra ai lam ( Daw 2 )” ( 23 Sep 2018 )

How to do a good Husband?     ( daw 2 )

          Hkungga tsawra ai Nuwa hpu nau ni, “mai kaja ai kang ka ai dinghku kawa langai byin hkra gara hku shakut ra ai” ngu ai gin lam a ngam nga ai daw hpe yawng a matu akyu tai u ga, yaw shada let, matut gam garan ya mayu n’ngai.

          Nu wa ni, mai kaja ai dinghku la langai mi byin tai wa lu hkra gara hku shakut na ngu ai a No 4. ngu na hta, ga shadawn, tsa chyaru lu nna,  hpai da da ai dinghku la ni bai rai jang tinang a ting kyeng myit a majaw, ngwi pyaw ai dinghku hpe jahten sharun chye ai rai nga ai. Dum n’ta kata hta ra rawng ai hpe gaw n’mu, tsa chyaru, hpaida da na hpe sha baw bang ai majaw, dai dinghku gaw galoi mung pyaw na n’rai sai. Jengmawng jenghkang rai, htingbu htingbyen hpe du hkra dingbai dingna jaw chye nga ai re. Dinghku kawa ngu na ni, myit n’rawng jang, awng dang lam gaw htaw, hkrat sum na de she rai mat na re.

          Kalang mi na tsa, chyaru hpe manang shatai nna, sak hkrung nga ai dinghku kawa langai mi gaw, shi a yup mang hpe dum n’ta masha ni yawng shat sha nga ai ten tsun dan ai. shi a yup mang hta, yu kasha 4 hpe mu ai da. langai mi gaw grai hpum kaba ai, bai , bai lahkawng ngu na yu gaw, myi kyaw ai, 3 hte 4 ngu na yu bai rai jang, lasi kri kri re ai sha n’ga, n’gun n’rawng ai, hpa lachyum wa rai kun nga nna, kawa gaw tsun dan ai. Shaloi , makau kaw shat sha nga ai kasha gaw, wa a yup mang hpe ngai htai ya na, a’loi sha re. Hpum sau ai yu gaw, Wa nang mari lu ai tsa palin kaba hte bung ai. Lasi nna, n’gun n’rawng ai yu yen gaw Nu hte ngai kasha re. Hpa majaw nga jang Nu hte ngai kasha, myit pyaw let shat hpe mu mu mai mai lu sha ten ni n’nga ai daram re. Bai, myi kyaw ai yu gaw Wa nang hkum nan rai nga ai. Wa nang mi mu taw ai rai jang gaw, an nu wa ni a nga mu nga mai lam, ra kadawn ai lam ni hpe, wa nang mu ya na rai nga ai. Ya na zawn, tsa, chyaru lu nna, ja gum hpraw ni hpe jasum kau na nre ngu nna, kawa a yup mang hpe htai ya nu ai. Dai majaw, tsa, chyaru lu, hpaida da ai lam gaw mai kaja ai dinghku la langai a magam bungli n’rai nga ai. Ndai zawn, n’kaja ai lai, hkyang ni hpe koi gam lu jang she mai kaja ai kawa la langai lu tai na rai nga ai.

          Bai No 5. ngu na hta, dinghku ting hpe madi shadaw ya ai dinghku la….Nu wa ni, myit kup ai dinghku la gaw, shi a n’rum n’tau jan hte ma ni hpe madi shadaw na lit kaba nga ai hpe galoi mung myit dum nga ai. bai, Lagawn lamawn rai, a’mu bungli hpe mung n’tam, bungli lu hkra mung n’chye galaw ai, dinghku lit hpe n’chye la ai, daizawn re ai dinghku la hpe gaw,  dinghku la kaja ngu lu tsun na n’rai nga ai. Kaja wa dinghku hpe myit kap nna, shakut ai Wa la ni gaw, gara de hkawm sa tim, n’ta madu jan hpe tsun da ai. hpa sha galaw tim, tsun dan ai. Lu tam ai ja, gumhpraw ni hpe ningrum ningtau jan hpe a’tsawm sha wa ap ai, shada da bawng ban jahkrup ai, daizawn re ai dinghku gaw galoi mung nga pyaw na sha re. Lani hte lani grau nna galu kaba , nga mu ngamai, lu sut lu su wa na gaw teng sha rai nga ai. Mai kaja ai myit su ai dinghku la gaw, tinang a ningrum ningtau jan hpe galoi n’masu ai. Ga sadi dung ai rai nga ai.

          No 6. Makam masham jung ai dinghku kawa…..dinghku a ningbaw gaw kawa a lit re majaw, nawku makam masham hte seng nna mung myit lawm ai hte dum n’ta masha yawng hpe woi awn chye ra ai. Dinghku kyu hpyi ai lam hta mung lit la let chyeju kum hpa ni hpe hkam lu hkra shakut ya ra ai. Moses a prat hpe bai n’htang yu ai shaloi, shi a masha ni hpe ga sadi da ai mungdan de woi shang wa ai zawn, tinang a dum n’ta masha ni hpe, ngwi pyaw ai mungdan de shang lu na matu woi awn ai Kawa mung rai ra nga ai. Dai gaw kaja wa nan myit kup ai, mai kaja ai dinghku a kawa majing rai nga ai.

          No 7. shada manu shadan hkat ra ai….Dinghku Kanu yen Kawa ngu sai hte gaw, Madu karai kasang a chyeju hte langai sha rai nga ai. Dai majaw, shada da grai manu shadan hkrat ra ai re. Dik shale, lagaw, lata n’hkum tim, Madu karai nan, rau de da ya sai re majaw, karai kasang jaw ai chyeju kum hpa re ngu myit la let, manu shadan ra sai rai nga ai. No 8. Hkam sharang ai myit….. Myit kup ai dinghku la gaw, shada n’bung hkrat ai lam, masin pawt na zawn re ai lam ni hpe hkam sharang let tinang a n’rum n’tau jan hpe a’tsawm sha woi zin lum chye nga ai. Ra rawng ai lam shagu hta mung sharai ya ai. dai she dinghku a mai kaja ai kawa majing rai nga ai. Nkau Wa la ni gaw, hpa sha n’rai tim, myit pawt nna, dinghku kata na a’rung a’rai ni jahten shara kau, n’rum n’tau jan hpe gayet rai chye nga ai. Ndai lam gaw, grai nan n’htuk ai lai len rai nga ai. No 9. Tut nawng maja ya ai lam….tinang a n’rum n’tau jan hpe myit shang sha ai lam gaw, dinghku la kaja a mai kaja ai lam langai mi rai nga ai. Ga shadawn, shangai n’htoi poi, chyoi pra mying poi n’htoi hta n’law htum hpa kumhpa mi raitim, shagrau ai rai jang, tsawra myit gam garan ya ai hte bung nga ai re. tinang a ningrum ningtau jan gaw yawng hta no.1 rai ra ai hpe myit dum ra ai.

          No10. Ban sa la ai ten ni hta rau nga ra ai. Mahkawn shabrang prat hta shada da mu hkrum ai hte myit pyaw ai zawn, ya dinghku a kanu kawa tai sai shani mung dai hta n’ga grau myit pyaw ra nga ai re. Hkring sa ten ni hta rau sha hkring sa la ra ai. Dinghku hpe myit maju jung ai kawa ni gaw, shinggan de na na galoi n’nga ai. Lu ai ten hpe dum n’ta masha ni hte nga pyaw hkra shakut nga ai rai nga ai. Dai re ai majaw, tinang a n’rum n’tau jan ni hpe shangun ma zawn n’re ai sha, ma kaji langai mi zawn, hkungga tsawra , manu shadan let ganawn mazum ra ai hpe myit dum ra ai.Myit kup ai dinghku la kaja gaw, tara ja ai wa n’re ai sha tsawra matsan dum chye ai wa rai ra ai ngu n’gun jaw dat lu n’ngai law.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.