Ma kaji ni hpe gara hku shalat shapan la na lam, Daw (4) - Nov 11, 2018

         Dinghku lamang hpe hkap madat la na ten du sai the rau daini na lamang hta, Ma ni hpe gara hku shapan la ra ai lam tsawra hkungga ai shiga madat Nu Wa ni hpe gam garan ya mayu n’ngai.

        Nu wa ni, English  hku gaw jelly ngu shamying ai, Shat naw zawn re, Pa Dung Muk n’tsin hpe hkrang amyu myu galaw da ai kawk ni hta bang nna, shagye da ai shaloi, tinang bang da ai hkrang kawk nsam ni sha pru wa na rai nga ai. bai, muk ni hpe mung dai the maren sha galaw yu u. dai hkrang  sum sa ni sha pru wa na rai nga ai. Bai nna, bi lat ga hpe gayau nna, ra sharawng ai hkrang the hkrak galaw da yang, dai hkrang sha hkrak ja mat wa na rai nga ai. Ya sha tsun mat wa ai hpan masum hpe yu yu ga. shi hkrang the hkrang hkrak rai mat jang , laga hkrang bai galaw la na n’mai sai rai nga ai. Laja hkrang sum la she ra ai law nga nna, bai gram jang mi na n’sam hten mat na gaw teng sha rai nga ai.

        Namsi man saw ni hpe yu ga ! lwi dwi hpun hpe hkai jang lwi dwi si sha lu na, sang hpaw hpun hkai jang sang hpaw si lu sha na, majap hpun hkai jang majap si lu sha na rai nga ai. Nu ni wa ni , tinang gaw kaning re ai hpun hpe hkai dat ai kun? kaning re ai nam si lu sha na rai kun? ngu  myit mada nga ai kun? kashu kasha ni hpe sharin shaga lam madun matsun ai shaloi anhte kanu kawa ni gara hku tsun sharin shaga nga ai kun? ading sha rai kun? shing n’rai, magyi magaw the sharin shaga ai kun, bai myit sum ru yu ga.! Ma ni hpe sharin shaga ai ngu ai hta , kaji ten hta sharin shaga ai the, kaba wa jang sharin shaga ai mung grai shai nga ai re. Um….kaba jang she sharin la jang gaw hpa mung grai yak na rai nga ai. Dai majaw , tinang a kashu kasha ni hpe kaji ai ten kaw nna, a’tsawm sha sharin shaga ai gaw, manu mana akyu rawng ai rai nga ai. Daizawn sharin shaga ai hta, madung ahkyak dik gaw, kanu yen kawa a tsawra myit madung lu la na grai ahkyak nga ai. Anhte jinghpaw ni chye tsun ai ga langai, Ma ni tsun shaga ga n’madat sai the gaw, “ jahkai ma a myit ja “ Ma n’dai gaw kanu kawa n’sharin shaga ai kasha rai sam ai  nga nna, n’myit yu ai tsun chye nga ai. Dai lam gaw grai n’hkrak ai ga si rai nga ai. Ma ni hpe grau nna, she myit shazai kau ya chye ai re. Dai majaw Ma ni hpe sharin shaga ai lam hta, anhte kanu kawa ni grai si mani ai ga si, ga yen ni the tsun shaga, sharin la na grai mai kaja nga ai re.

         Japan myu sha ni law malawng hkai ai, Bonzai hpun zawn re ai, Sak kaba tim, a’nyem sha rai tsawm ai hpun ( myen myu shag a hku, tet gyi pin pu ) ngu shamying ai hpun hpe, di bu kasha ni hta hkai nna, namhpun the jan shingkang dat ni hpe ra ai daram jaw nna, aten la, masawp masin, hkai lajang la ai hpe mu lu nga ai. shingning law law wa aten la nna, hkai lajang la ai majaw , grai tsawm ai hpun langai mi byin pru wa nna, manu law htum lu ai hpum rai nga ai.

        Dai zawn sha, Nu wa ni e… anhte a kashu kasha ni hpe ma ni naw kaji ai ten kaw nna, a’tsawm sha sharin shaga la ra nga ai. nang kanu , nang kawa a tsawra myit lahkawng hpe pawng nna, sharin shaga ai rai jang ma dai a prat gaw , lani hpe kung hpan wa na , myit su myit rawng ai kasha tai wa na, myu the mungdan a matu, nawku hpung a matu akyu rawng ai shayi shadang sha ni tai wa na gaw teng sha rai nga ai. Reng jang she anhte a mung dan gaw lani the lani rawt jat galu kaba wa, ta lahtum n’shut rai na re. Ndai zawn byin wa na matu mung a’ten law law , shaning law law la ra nga ai. Daizawn ngu tsun ai the nye kasha ni gaw hpang hkrat mat sai law, kaning n’chye di sai, ra mi hten mat manu ga nga ai, a’sum jaw ai myit ni n’mai rawng ai re.  

        Nang dinghku kanu kawa hkum nan n’sharin shaga la yang ,makau grup yin the hkrang mu sen na sum la hkrung ni, midia , TV, internet ni gaw  kanu kawa tai nna, sharin la kau na ra ai. Um…dai shaloi gaw, kanu yen kawa sha n’re, ma ni a matu mung hkrit tsang hpa ni tai wa na rai nga ai. Kanu kaw ngu ai gaw grai nan ahkyak ai rai nga ai. Tinang a kashu kasha ni hpe sharin shaga na n’mai lagawn nga ai re. Daini , anhte a ma ni hpe yu yu ga. Jawng laika hpe lagawn wa nna, TV game ngu ai jak the ginsup ai hpan hpe madung da wa nna, hpang jahtum Ma kasha ni grai naw kaji ai ten kaw nna, mi set set ra ai madang de du mat ai ni law wa rai nga masai. Shan grai naw hkalung ai Ma ni ya na zawn, gabrim ai jak ni hpe na na lang ai majaw, hkum hkrang hta na myi lasa ni hten mat ai sha n’ga, shamu shamawt bungli galaw mung lagawn mat wa nga ai re. Nu Wa ni , anhte a kashu kasha ni hpe dai hku sha yu shalai kau sana kun? grai myit yu ra nga sai.

        Daini na prat madang hta gun rai manu hpu wa ai the shingra maka galai shai lawan wa ai majaw, dinghku kanu yen kawa hkawng yen shinggan de bungli galaw hkawm ra ai. Daiten, Ma ni hpe ma rem masha the tawn da ai, Mashalet jawng sa n’ram shi ai ten jawng de sa da ai. Kanu Kawa the ma ni rau nga na ten n’law mat ai lam ni law law rai nga ai. Lahta de tsun lai wa sai, TV, hkrang mu sen na sum la hkrung ni, internet prat ni hta grau sawng wa sai. Ma ni mung dai hpe grai ra sharawng ai re majaw, dai the ten jahtum rai, kanu yen kawa hpe pi malap mali byin mat wa nna, hpang jahtum kanu kawa hpe tsawra myit hkyet rai, kanu kawa tsun ai ga hpe ahkyak n’la byin wa ai. Nu wa ni, n’dai TV, internet ni hpe a’kyu jashawn jai lang chye ai rai jang gaw, hpaji grai jat ai lam mung rai nga ai. Ratim, an kanu yen kawa bungli ngut na, gum hpraw lu na she grau ahkyak ai, nga nna, ma ni hpe dai hku sha kabai da jang gaw,hpang jahtum nan kanu yen kawa sha myit ru ra na rai nga ai. Ja gum hpraw gade mung lu su u, myit hkamja lam n’nga jang gaw nang lu da ai yawng gaw gaman sha rai mat na rai nga ai.

        Nu Wa ni, anhte a makau grupyin tha daini internet seng ni law law nga ai. Jawng sa jawng wa ten Ma ni dai seng kaw sha aten jahtum rai, nga nga ai hpe mu mada lu na re. Jawng gaw sa ai mare, n’sa ai mare, kanu kawa ni gaw hpa mung n’chye, ten dung jang jawng sa wa sai, jawng kaw nna, bai wa ra ai ngu sha mu mada nga na rai nga ai. Shani tup internet seng kaw sha ten jahtum kau ai anhte a kashu kasha ni law law rai wa nga sai re. Anhte kanu kawa ni hkum nan, Ma ni htan na grau zen ra nga sai. myit yup nga n’mai sai.

          Nkau kanu kawa ni bai rai jang, Ma ni hpe dai hku sha gabai da nna, ma ni myit n’kap wa jang gaw, ma ni ra sharawng ai rai ni hpe mari ya nna, akyang jahten kau ya chye nga ai. Daizawn , ma ni a myit ra galaw ya jang gaw kanu kawa ni hpe mahtang Ma ni bai dang kau na rai nga ai. Hpang jahtum kanau kawa hpe n’hkrit ai Ma tai wa na rai nga ai. Manaw manang ni a lapran hta mung kanawn mazum yak wa na re. Hpa majaw nga jang , kanu yen kawa Ma dai a myit ra, nau galaw ya ai  majaw, rai nga ai. Tingkyeng myit sha rawng mat na rai nga ai.

        Nu Wa ni, anhte a kashu kasha ni a matu, kanu kawa hta nga ra ai lit magam ni hpe myit dum la nga saga. Ma ni a matu malu masha hkrak, nga shara hkak, hpaji mung madang du hkra sharin ya sai nga nna sha mung n’ngut nga ai. Ra ahkyak dik gaw, kanu yen kawa a tsawra myit , Ma ni a hkam sha lam hpe chye madat ya na, Ma ni hpe mani sum sai the tsun shaga ya na, machyi makaw hkrum ai ten, grai nyi htep ai  hku nga ya na, n’nan shangai wa ai kaw nna, Ma ni chye myit , chye matsing wa ai ten du hkra tsawra myit jaw ya na, Ma ni hpe garum shingtau la na, n’dai lam ni gaw ahkyak madung nan rai nga ai.

        Dai majaw hkungga ai nu wa ni, lahta de na la lu sai the maren, daini daina kaw nna, anhte a kashu kasha Ma ni hpe a’tsawm sha shapan la ga. Nnan shangai chyinghkai wa ai ten kaw nna, kaba kunghpan wa ai ten du hkra, lam matsun madun, garum shingtau, pawn ba la ga ngu, n’gun jaw dat n’ngai law.

 

Ka Lajang ai; Mama Rose Angeline Maran Nang Doi

                      RVC Ginjaw Rung, Aung Nan

                      Myitkyina

Add new comment

7 + 11 =

Please wait while the page is loading

Ma kaji ni hpe gara hku shalat shapan la na lam, Daw (4) - Nov 11, 2018 | Radio Veritas Asia

Error

The website encountered an unexpected error. Please try again later.