Dinghku hta ahkyak ai lam. ( 08 October 2018 )

Dinghku hta ahkyak ai lam.

 

Tsawra hkungga ai Nu wa hpu nau ni, DINGHKU hta ahkyak ai lam langai hpe sum ru yu ga.

          Nu wa ni Dinghku hta No. langai ahkyak ai gaw makam masham rai nga ai. Amyu masha ni bawng ring ganga law htam wa na matu shakut ai lam hta, dinghku masha uhpung uhpawng kaji kaw madung n’pawt sharawt la shara kaja re, dai dinghku gaw mai kaja ai lam hte, kasi kaja madun lu ai, kun dinghku rai nga ai, dai dum nta hta shanu nga ai dinghku masha ni hpe makam masham myit rawng ai ni ngu nna, tsun lu na rai nga ai.

          Dum nta a jan mau n hten n za grin nga u ga matu gaw, nta madu kanu yan kawa kaw nan makam masham tara lam hpe hkan sa nna kashu kasha ni hpe lam madun sharin achyin ya ra nga ai, dum nta masha ni nat tsadan a agung alau hta nshang lawm u ga, wenyi hkrunlam hta atsam dat shakut ra ai.

           Kashu kasha ni hpe wenyi makam masham hta N’kam ai lagawn ai lam n nga hkra shadut kanawng ya ra ai, myit daw myit hten ai lam nnga hkra akyu hpyi let woi lakawn chye ra ai,  Karai Kasang, hta kam shamyet sa wa hkra, kashu kasha ni hpe sharin shaga lam madun ai lam gaw, kaga ahkyak ai magam bungli galaw chye hkra sharin ya ai hta, grau mai kaja nga ai.

           Bungli matsun ai shaloi mung n’gup hte sha galaw mu nmai ngu ai, rau akyu hpyi ai, rau nawku jawng sa ai, ram ma hpawng de woi sa ai, shakut sharang woi sa ai, kaga makam masham poi shingra ni de woi sa ai lam ni galaw ya ra ai, Nnan e Ma ni hkansa hkannang ai lam loi yak na re, rai tim anhte kanu kawa ni miyt kalu ra ai, atsawm agawm tsawra let woi madun ra ai.

           Kun dinghku a jan mau n hten n run mat hkra dinghku masha ni yawng myit hkrum let rau shanu nga chye ra ai, Karai Kasang hpe kam sham ai X’tan masha ni, akyu hpyi chye ai nta masha ni rai ra nga ai, hpa majaw shakut ra ai kun? nga yang anhte dinghta ga na dum nta hta kaning rai nga lai wa ai a manu shabrai gaw, sum sing lamu hta hkam la lu na lachyum rai nga ai.

          Makam masham lam gaw kun dinghku hte seng ai hpaji hta langai shang lawm nga ai, makam masham shakut ai dum nta hta Karai Kasang a chyeju law htam nga na re, dum nta bungli hpe kang ka galaw ai a marang e mung k,k, dum nta masha ni hpe kaja jet ai hkristan masha ni byin shangun na re, kashu kasha ni hpe mung k,k, a chyeju the bau maka la lu na rai nga ga ai.

          Daini na ten hta law la ai kashu kasha ramma ni makam masham lam hta mara mat re lam a n’pawt gaw, ya yang, shanhte gaw hpaji hparat ning ra ai  majaw re nga ai, shanhte ra sharawng miyt marin ai lam ni de chyu sha myit mananwg ai, makam masham hta n;gun yawm ai, kanu kawa sharin shaga ai hpe nkam madat ai, shingre kum la ni a majaw kanu kawa sara ni mung myit daw mat ai, shanhte a matu tsawra miyt ni hkyet mat wa sai zawn byin nna makam masham lam hta ningra wa ma ai.

          Makam masham gaw shinggyim uhpung uhpawng hpe lam madun ya  ai wan shanan lak nak kaba langai rai nga ai, dai majaw anhte kun dinghku masha ni yawng mung dai makam masham the sha, myit hkrum galung nga  sa lu na rai nga ai, kanu yan kawa chye da, lu da ai makam masham hpaji hpe Tinang a kasha ni hpe hti jaw sharin jaw na nmai lagawn ai, shanhte a prat hta tengman sadi dung kang ka ai arawn alai ni the hkawm sa chye na gaw makam masham hpaji lu da yang sha mai byin na rai nga ai, ndai makam masham tara lam ngu ai gaw dum nta kata hta chye da ra ai hpaji langai re hpe mung chye na hkra , tsun dan shaleng dan ya ga.

          Dum nta masha ni bungli kade kyin tim, makam masham ngang kang ai kum la nga ra ai, Ga shadawn, nawku hpung hta hkan sa ra ai makam masham tara lam ni hpe hkungga manu shadan ai, nawku jawng sa ai, akyu hpyi hpawng shingra hkan sa lawm ai, ram ma hpawng de sa ai, makam masham poi shingra ni hte, makam masham bungli ni hta shang lawm chye hkra shakut ga.

                     Anhte kanu kawa ni hku nna, Ma ni hpe tsun sharin  ai hte maren ta tut galaw madun lu na grai ahkyak ai. dum nta kaw Karai Kasang hpe No. 1 da nna kam sham lam hta shakut ra ai, mai byin ai shaloi Misa sa lawm ra ai, laban nawku nhprai ai sa chye ra ai, alu bang chye ra ai, Karai Kasang, a magam gun ni hpe garum chye ra ai ngu nna kashu kasha ni hpe ta tut galaw madun sharin ya ga.

          Shani shagu na sak hkrung lam a matu bungli shakut ra ai teng ai, rai tim jan jan rawt nna Karai Kasang  hpang de akyu hpyi la , myit sim  sa let magam bung li sa chye ra ai.

           Machyi makaw hkum jang tsi tsi lajang yang sha mai tsai lu na re teng ai, raitim, Jau sara ni hpe shaga nna akyu hpyi ai lam galaw la nhtawm tsi tsi lajang ai gaw makam masham hta myit kri dung ai kum la re. bai nna anhte a prat hta matsing da mai ai lam langai gaw, Hkristian masha ni a myit pyaw lu na lam/ myit sum nung shingdi let, shagrit shanem chye na lam, shada da tsawra garum shingtau chye na lam ni gaw wenyi makam masham hpaji chye chyang hkra shakut yang sha Awng dang ai, kalu kaba ai lam ni nga wa na re lam hpaji jaw n’gun jaw dat nngai law.

 

 

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.

 

 

Add new comment

1 + 0 =

Please wait while the page is loading

Dinghku hta ahkyak ai lam. ( 08 October 2018 ) | Radio Veritas Asia

Error

The website encountered an unexpected error. Please try again later.