Saradaw Ni A Synod Hkumra Hpawng Kaba Kaw Nna, Mungkan Shara Magup Shanu Nga Ai Ramma Ni Yawng Hpang De Shagun Jaw Shana Dat Ai Laik

Hkumra hpawng shang lawm ai Saradaw ni hte dat kasa ni yawng kaw nna, kam hpa myit mada, shalan shabran n gun jaw ai lam ni rawng ai ndai laika hte ramma ni yawng hpang de shana dat lu ga ai. Galoi mung zet let nga ai madu yesu a n-sen hta nanhte Ramma ni a kabu gara ai lam ni, nanhte tsun shaga mayu ai lam ni, tsun madai nga ai lam ni law law hpe madat na matu, anhte  hpang de lai wa ga ai. 

Nanhte a myit masin kata ra sharawng nga ai nanhte a myit mada lam, kabu gara ai lam ni, nji nmu hkam sha nga ai lam ni, yawn madai ai lam ni hpe anhte na chye lu saga ai. Nanhte ra sharawng myit mada nga ai lam ni nanhte a prat hta mu mada wa lu mu ga anhte ra sharawng ga ai. Nanhte ra sharawng myit katu nga ma hte maren, nanhte a labau hpe ka jahtuk la lu na, nanhte a ra sharawng ai lam ni kaja wa ta tut byin pru wa lu hkra, shang lawm gun hpai ai lam ni galaw na matu nanhte jin jin rai nga na masai ngu nna anhte kam nga ga ai. 

Anhte a nhkum n tsup ai, ra rawng gawng kya ai lam ni a majaw myit n kataw ga, kam hpa lam hten run mat ai masa nbyin ga. Nawku Ppung gaw nanhte a kanu rai nga ai, shi nanhte hpe nkau da na nga ai, nkaw nlaw di ai, ntsa lam prau shalau re ai, myit daw myit hten ai ngu ai mahkup sai wan ni hpe gawut shapoi kau ya na grai ja ai Chyoi pra ai wenyi nbung adawt nga ai ndai hkun lam nnan hta nanhte hte rau hkawm sa na matu Nawku Hpung jin jin rai nga ai. 

Shi a kasha shingtai Madu Yesu hpe jaw kau ai du hkra Karai Kasang grai tsawra ai ndai mungkan, sut gan arung arai ni hpe sha madung tawn, aten kadun masa awng dang lam ni, pyaw daw kadaw lam ni hpe sha yu mada nna, ntai nmai kaji kadun dik ai ni hpe dip gamyet agrawp bun ai lam ni galaw wa ai aten, ndai Mungkan ga bai rawt tsap nna, tsawra ai, tsawm htap ai, tara rap ra ai, teng man ai, ngu ai lam ni de bai gayin wa lu hkra Mungkan hpe nanhte ramma ni garum ya ra na rai nga ai. 

Nanhte kaw na dat kasa nkau mi, bai akyu hpyi garum ya ai hku nna jawm jahkyin myit hpawm lawm nga ai masha law law hte rau anhte shata mi tup jawm bawng ban ai lam ni galaw lai wa saga ai. Ya anhte tinang nang shanu nga ai shara hta madu yesu ap jaw da ai sasana magam bungli ni hpe galaw gun hpai nna ndai hkrun lam hpe anhte matut rau jawm hkawm sa nga na hpe myit mada ga ai.

Nanhte a myit katu ai, sharawng awng ai lam ni hpe Nawku hpung hte ndai Mungkan hkyak hkyak ra nga ai. Prat a majaw ru yak jam jau hkrum nga ai ni, matsan mayan hkrum nga ai ni, masha ni a lata hta shaza kau na hkrum lu mai dik ai ntai nmai kaji kadun re ai masha ni hpe ta gin dun makawp maga la na teng sha nhprai kau nga ga law.

 

Ga gale ai : Wajau Bernard Dashi Tang Ji

REF:http://Vatican News

 

Add new comment

6 + 4 =

Please wait while the page is loading