Dinghku La Kaja

Dinghku La Kaja

Anhte Kawa La ni Tinang a ningrum ningtau jan hpe gara hku manu shadan ra ai ngu ai lam hpe loi li sum ru yu ga. Kun Dinghku a Kawa la ni , Anhte Tsawra nna mi rai rai kanu kawa Salang ni hpyi jahkrum ya nna mi rai rai tinang la da ai ningrum ningtau jan hpe manu shadan ga.Tinang a ningrum ningtau jan gaw hpring zup ai wa nre  majaw shi hpe chye na manu shadan mara raw ya na grai nan ahkyak nga ai re.Ningrum ningtau wa a tsawra, chye na ya ai lam gaw shi a matu kaga yawng hta grau ra kadawn ahkyak nga ai hpe Kawa La ni dum chye ya ra ai re.Tinang a ningrum ningtau jan gaw ningrum ningtau wa a n ra hta na nra rai nga ai majaw shi hpe galoi mung nmai kayet adup zingri ai re .Shi gaw ningrum ningtau wa a matu manu dan reng dik ai kumhpa kaba nan re ai majaw manu shadan  nga ra ga ai.Bai nna hpring zup ai wa mung nre majaw shi hta manawn masham lam ni nga yang mung shading sharai ya ra ai.Shi gaw na matu kabu hpa re majaw shi hpe myit masin hkum hkrang n gun hpring zup hkra ningrum ningtau wa kaw nna galaw ya ra nga ai.Tinang Madu jan gaw tinang a gawn laja tsawra ging ai wa re majaw shi matu myit dik kabu ra ai re.Bai nna na madu jan gaw nat tsa dan nre majaw shi hpe nmai kabai da ai.Anhte nkau kawa la ni hta byin chye nga ai ningrum ningtau jan hte kasha ni hpe kabai da tsa jaru nanghpam hta chyu baw bang ningrum ningtau jan hpe zingri kayet ai Kawa la ni mung nga ai re.Tinang a ningrum ningtau jan gaw tinang a hpyen nrai nga ai majaw shi hpe n gun jaw garum shingtau ra ai zawn shi gaw dum nta masha ni jai lang na arung arai  mung nrai nga ai.Bai nna tinang hte shingjawng manang nre, shi hte  shingjawng ai lam ni nmai galaw nga ai zawn shi gaw amyu shayi langai re majaw shi hpe tsawra hkungga manu shadan ra nga ga ai.Dai zawn sha na madu jan gaw masha law law hte seng ai mung nre majaw kaga masha ni hte nmai shingdaw ai.Bai nna na ningrum ningtau jan gaw na tsawra myit yawng zup ai shara re majaw shi hpe shakawn shagrau ra ai.Tinang a madu jan hpe ahkyak la manu shadan ra ai zawn masha ni a shawng hta gaya jahkrum ai lam hpe anhte kawa la ni koi gam ra nga ai.Bai nna shi gaw myit nhpring ai wa nre majaw shi jaw ai hpaji jaw ai lam ni hpe madat ya ga.Tinang a ningrum ningtau jan hte kashu kasha ni jaw ai lam ni hta tinang nmyit mada da ai hpaji ni lu la mai nga ga ai.Na a ningrum ningtau jan gaw tinang a kaja dik ai manang re majaw shi hte atsawm asan sha branglang tsun shaga kanawn mazum ga.Ningrum ningtau jan gaw shangun ma nre ai majaw mai byin yang Ma rem ai lam ni,shat gawk hta si shat shadu ai ni hta shanglawm ai zawn re hpe mung Kawa la ni galaw ra nga ga ai.Ma rem,Shat shadu,rai hkrut ai zawn re ai nta bungli ni gaw dinghku kanu,ningrum ningtau jan ni hkrai galaw ra ai bungli re ngu nmai hkap myit la ai.Hpa majaw nga yang Ma ni mung na kashu kasha nan re hte Nang nan mung Kun dinhku Kawa re majaw nta bungli mahkra gaw nang hte mung seng nga ai re.Ningrum ningtau jan gaw na a garum la ai lam hpe ra taw nga ai re.Bai nna na madu jan a matu Karai kasang a shawng hta nang kaw lit nga ai re majaw atsawm sha makawp maga tsawra la ra ai.

Anhte a kashu kasha ni a man e tinang a ningrum ningtau jan, ma ni a kanu hpe matsa mawa tsun adup kayet ai lam, grai dan daw hkra lale ai lam ni hpe kachyi pyi n galaw ga.Hpa majaw nga yang kashu kasha ni a myit masin myit masa gaw shanhte a kanu hta madung shamyet nga ai re majaw shanhte kamhpa shamyet ai kanu hpe roi rip ai lam gaw ma ni a myit hpe ningma kap wa shangun chye nga ai re.Anhte Dinghku Kawa la ngu ai ni gaw dinghku kata hta Madu jan,kashu kasha ni a shamyet shanat kamhpa na shara langai rai nga ai. Pawt sing dawng ai ten,tinang tsun mayu ai ga hpe Kasha ni hpe madat shangun mayu ai ten ni hta tinang a kashu kasha ni hpe pawt marawn chye nga ai.Ndai zawn marawn ai hpe ma ni hkap madat la na re ngu kam ai lam mung shut nga ai.Tinang marawn taw nga ten ma ni a myit hta nga ai gaw hkrit ai myit sha rawng nga na re.Dai majaw Ma ni hpe tsun sharin na ten ni hte dum nta masha ni hpe tsun mayu ai rai yang marawn pawt ai lam gaw Manghkang hpe grau nna jat wa shangun ai lam sha nga ai re.Bai nna Anhte Kun Dinghku Kawa ni gaw Kashu kasha ni a ningpawt ninghpang ra ai lam hpe jahpring ya na lit mung grai nan ahkyak nga ai.Asan sha tsun ga nga yang Ma ni a ra ai lam hpe jahpring shazup ya ga nga yang gaw ja gumhpraw ra ai re.Hpring zup hkra nlu jahpring ya ai rai yang dum nta hta tinang a lit hpe nkang ka ai lam rai nga ai.Bai nna nta masha ni tinang a ntsa hkrit ai lam sha nga nna hkungga tsawra ai lam yawm wa chye nga ai.Kashu kasha ma ni hpe yu lakawn na nga yang tinang hkum tinang mung lakawn la chye ra ai.Tinang hkam ja yang she dum nta masha ni hpe mung atsawm sha yu lakawn lu na rai nga ai.Tinang hkum tinang rawt jat galu kaba wa hkra,kamhpa wa lu hkra galoi mung shakut ra ai.Tinang a kashu kasha ni hpe marawn jahtau kayet sharin shaga na malai shanhte hkungga kasi la mai hkra nga sa ai lam gaw grau nna tang du akyu pru na rai nga ai.Kun dinghku a Kawa,Ma ni a Kawa ngu ai gaw dum nta masha ni hte Ma ni yawng a Myit hta kam hpa ai Kawa ngu ai hpe Ma ni a myit hta ntsun tim rawng ra ai ni re.Shanhte hte seng nna ya amyu mi loi hkring rai yang amyu mi nmai tsun ai .Shanhte a matu nang gaw tak sawn nlu ai wa,dingman ai wa nre ngu ai hpe mu wa chye ai dai majaw Ma ni hpe kalang sadi jaw da sai hpe sadi dung dan chye ra ai. Shanhte ra hkan ya ai lam hta, shanhte ra ai nga jang kalang ta jaw ya galaw ya ai lam hpe gaw  koi gam ra ai.Ma ngu ai ni gaw lak lai ai hpan rai yang lu mayu ra mayu ai ni hkrai re dai majaw lama mi ra ai nga yang shanhte kaja wa ra ai kun majoi jahkring mi sharawng ai kun atsawm yu nna chye ra ai.Mari ya ai ten hta mari gring ai hpe jaw ya ra ai.Bai nna Ma ni a myit gaw kya ai majaw shanhte hpe shagrit ai lam n kaja ai lam ni tsun galaw ai lam ni hpe mung koi gam ra ai.Ma langai gaw tinang hkum tinang manu shadan hkunga ai lam ni yawm wa chye nga ai.Ngai gaw shanhte tsun ai hku rai nga ai ngu ai hpe myit hta hkam sha wa chye nga ai re.Hpa hpe myit tim dai hpe dum myit wa chye ai.Bai nna tinang a madu jan hpe manu shadan madi shadaw ga,Tinang na madu jan gaw tinang hkum nan re majaw shi hpe yup shara n mai gin hka ai.Tinang a madu jan gaw yawng hta Numbat (1) re majaw dai shara hpe tinang a chying hkai kanu hte malai nmai bang ai.Dai majaw  anhte Kun dinghku Kawa  la,Ma ni a Kawa ngu ai ni gaw tinang a madu jan hpe manu shadan tsawra makawp maga chye ra ai zawn Ma ni a kamhpa gring ai Kawa Kasi la gring ai kawa tai hkra shakut ra ai.Grau nna gaw anhte dinghku kawa la,Ma ni a Kawa hkum nan makam masham lam hta ngang kang akyu hpyi  shakut let dum nta kun dinghku hpe kaja ai kasi la mai ai hku woi awn lu hkra shakut ga,Tinang a ningrum ningtau jan hpe tsawra hkungga manu shadan let Ma ni dum nta masha ni hte lahkawng maga na jinghku ni yawng hpe kaja ai kasi madun let arawng la mai hkra kun dinghku hpe woi awn sa wa ga ngu ai Kun Dinghku Kawa ni yawng hpe n gun jaw mayu nngai.

By: John Mung Hkrang