Kanam a ntsa tsawra shawang myit tawn da ai lam gaw kasha a dinghku hpe kaja dik ai hku makawp maga ya ai lam rai nga ai daw - I

Awng Htoi and his wife

  ✅  Tsawra hkungga ai Kun dinghku kanu kawa ni e Kanam hte Kamoi amyu shayi lahkawng a kanawn mazum lam gaw kun dinghku hta ahkyak kaba dik rai nga ai.Ndai amyu shayi yan ra rai nga ai Kamoi hte Kanam hprinem yang hpri nem ai daram kun ding hku gaw ngwi pyaw na sha rai nga ga ai.Anhte Kamoi hte Kanam nram ai dum nta hta dinghku gaw myitru tsam pu ai lam,dinghku hta garu kachyi nga ai lam sha n ga sut masa lam shinggyim lam ni hta mung hkra machyi wa nna dinghku gaw ngwi pyaw sana nrai nga ai.Dai majaw ngwi pyaw kun dinghku lu mayu yang anhte yawng shakut la ra nga ai.Anhte Kanam shagu ngu na daram gaw ningrum ningtau a kanu, Kamoi shi hpe gaw tsawra ai kun ra sharawng nga ai kun chye mayu ai hkrai nga nga ai.Kamoi gaw nra ai,myit nhkrum ai ngu chye na hkam la ai Kanam gaw myit hta hkra machyi mat nna shi hkum shi kun dinghku hta kam hpa lam ni yawm mat wa chye nga ai.Ndai zawn kam sham lam yawm wa magang dinghku hta myit tsam pu lam grau law wa magang sha rai nga ai.Kun dinghku a matu ahkyak dik ai, kashu kasha ban a matu ahkyak dik ai kun dinghku kanu langai hta ndai kun dinhku dum nta awng dang nna ningtawn zet let ai kashu kasha  ban nnan ni hpe asak hkrung lu ra ai ngu ai myit masa mung bang da ra nga ai.Dai majaw tsawra kun dinhku kanu kawa ni anhte Kanam garai ntai shi ai kaw nna atsawm nyu ai,nchye ai sha Nye kasha hte myit nhkrum ai ngu ai ga hpe mung loi loi hte nmai tsun nga ai.

✅✅ Bai nna Kamoi a matu ngu nna Kanam kaw nna kumhpa langai ngai la sa wa ai shing nrai tsawra shawang ga rai rai Kanam kaw nna la sa wa ai rai yang anhte Kamoi ni hku nna mung masat masa galaw chyeju dum la galaw ya ai rai yang Kanam ni a myit hta pyaw taw nga na sha rai nga ai.Dai hku nre ai sha nchye masu su ai,nra ai zawn galaw ai galaw ai rai yang gaw Kanam a myit hta nra ai kun hpabaw byin ai kun nga myit npyaw myit tsam pu ai lam ni byin wa na sha rai nga ai.Anhte a Kamoi hku na kanam a ntsa tsawra shawang myit tawn tsun shaga ai rai yang kasha hpe myit pyaw lam mung jaw ya lam langai rai nga ai.Anhte kamoi ni mung kasha a kanu ngu ai myit masa lam ni gaw nga na re.Raitim anhte Kasha a ningrum ningtau jan Kanam hpe  myit npyaw myit nkaji hkra mung tawn da ra ai zawn Kamoi hpe hkrit mat shagri brem hkra hpaji madun ai lam mung koi gam na matu ahkyak nga ai.Anhte nkau kamoi ni gaw dum nta hta kanam nga sai majaw dum nta bungli ni hpe kanam hpe hkrai galaw shangun chye ma ai,raitim nkoi kamoi ni gaw kaji kajaw tinang galaw lu ai  dum nta bungli ni hta gaw kanam hte rau rai nna jawm galaw chye ma ai.Ndai zawn rau rai bungli galaw ai majaw kamoi hte kanam grau nna myit ni ai hku kanawn mazup tsun shaga lu wa ai hte kasha a kun dinghku hpe grau nna tsawra shawang myit hpe jaw lu ai zawn simsa shim lum lam hpe mung jaw ya lu nga ai.Ndai zawn Kamoi a tsawra shawang myit hpe chyena hkam la lu ai Kanam ni hku nna mung Kamoi hpe ga htan ningdang kalang galaw ai lam ni nnga wa nna Kanu langai zawn makawp maga gawn lajang wa na rai nga ai.Bai nna anhte Kanam ngu na ni mung Kamoi a ntsa tinang a ningrum ningtau a Chyinghkai kanu ngu ai hpe myit dum let Kanu langai zawn hkungga tsawra manu shadan ai rai yang Kamoi gaw  kasha num kasha ni hta grau nna shing nrai maren mara tsawra makawp maga manu shadan wa na sha rai nga ai.Dai majaw Kanam hpe makawp maga tsawra shawang myit tawn da ai lam gaw tinang kasha a kun dinghku hpe kaja dik ai hku makawp maga ya ai rai nna kasha a prat gaw kanam a lata hta re hpe myit dum ai lam mung rai nga ai.

 

 

By; John Mung Hkrang

Add new comment

5 + 4 =