Karai Kasang A Mungga ( Homily For 15 Jan 2022 )

Pranwan ladaw (2), C, 2022

Is 62:1-5;   1Kor 12:4-11;     Yh 2:1-12

Hkristu A Shawng Ningnan Na Hpung Dagu

          Hkristu hta tsaw ra ai nu wa hpu nau ni e, ndai laban gaw Pranwan ladaw hta (2) ngu na laban rai nga ai.

Chyum Laika Shang Lang Dan Ai Lam

Nawku daw jau shaning a “C” shaning hta gaw Kabu Gara Shiga Chyum Laika hpe San Yawhan Chyum Laika hpe la ai. Cannon Mare num hkungran poi hta, tsabyi ma mat ai majaw, Kanu Nu Maria hpyi shawn ya ai a marang e, Yesu Madu hka hpe tsabyi shatai ai mabyin rai nga ai.

Moi shawng de na Hkristan ni gaw Yesu hpe Hkyela Madu hku hkap la ai lam mali nga wa ma ai. (1) Bethelehem mare hta Yesu Madu shangai wa ai shaloi, Maria, Yawsep, sagum rem ai ni hte kaga masha ni gaw Yesu Madu hpe Hkyela Madu hku hkap la nna chyeju dum let nawku lai wa ma ai. (2) Sin praw mungdan na hpaji rawng hkawhkam masum gaw Yesu Madu hpe Messiah Hkyela Madu hku hkap la masat masa galaw lai wa ma ai. (3) Yawdan hka hta Yawhan Baptista a lata kaw Yesu Madu kashin kamun hkam la ai shaloi, Kawa Karai Kasang gaw Yesu Madu hpe Shi a kasha re ai lam, hpawng de nga ai masha ni hpe ndau shana ya ai. (4) Cannon mare hta Yesu Madu a shawng ningnan na lamik kumla rai nga ai, hka hpe tsabyi shatai ai hpe mu lu ai sape ni Madu hpe kam sham wa ma ai.

Moi shawng na Hkristan masha ni gaw ndai Yesu Madu shadan shadawn ai lam mali hpe “Epihpany” hkawhkam masum poi hta sha kaprawn nna galaw lai wa ma ai. Lachyum gaw “shadan dan ai poi” rai nga ai.

Yesu Madu kadai re ai ngu ai hpe shanhte kaw shadan dan ai Yesu hpe Hkyela Madu hku hkap la ma ai. Kaga masha ni kaw Yesu shadan dan nna Shi hta kam sham shangun ai majaw kabu gara ma ai.

Dai majaw, moi shawng na Hkristan ni gaw “Hkristu hpe kam sham shangun ai poi” ngu shaga shamying ma ai.

Hpang daw de gawng ngwi ngwi rai nna, laksan poi nhtoi ni masat nna galaw hkrat wa ma ai. (1) Yesu Madu shangai ai Hkristmas Poi hpe December 25 ya shani galaw ai, (2) Epiphany, hkawhkam masum poi hpe Hkristmas hte shaning ningnan lapran na laban hta galaw ai, (3) De a hpang laban hta gaw Yesu Hkristu kashin kamun hkam ai poi galaw ai. Dai laban gaw Pranwan Ladaw hpang ai laban mung rai nga ai. (4) Daini galaw ai gaw Yesu Madu a shawng ningnan lamik kumla rai nga ai, hka hpe tsabyi shatai ai poi laban rai nga ai.

Ndai laban na Kabu Gara Shiga jaw ai lam ni

Anhte a mare buga hta anhte a htung hking hte num hkungran ai poi hpe galaw ga ai zawn Cannon mare hta mung shanhte a htung lai hte hkungran poi galaw lai wa ma ai.

Yesu Madu hte rau shi a sape ni dai hkungran poi hta saw shaga hkrum ma ai zawn Shi a kanu Nu Maria mung saw shaga hkrum ai. Shi gaw hkungran num, shing n rai, hkungran la maga hte jinghku daw na masa hta nga ai. Cannon mare gaw Nazareth mare hte Kilometer sanit (7) daram sha tsan ai.

Anhte a buga htung lai masa hte maren, kanu nu num hpung ni hpe saw shaga ai gaw, poi lamang kaw shang lawm na matu sha n rai nga ai. Dai poi hta ra mara garum lawm na matu mung rai nga ai. Nu Maria hpe saw shaga ai gaw poi madu ni a matu gade daram akyu rawng na hpe nta masha ni sumru lai wa na gaw n rai ma ai.

Yesu Madu gaw tara mungga ningnan sha hkaw hpang ai aten rai nna, saw shaga da ai dai hkungran poi de Shi a sape nkau ni hte sa lawm ai. Hkungran poi hta tsabyi hparai n law mat ai gaw anhte kata lam hkrak n chye lu ga ai. Anhte a htung hking hta mung hkungran poi hte kaga poi ni galaw yang tsa hku, tsa poi ni hpe daw ga ai rai nna n law n la rai yang sa du ai poi manam ni hpe agam chye ga ai. Jiwoi Jiwa ni a prat hta gaw gaya kahpa mung tai nga ai. Poi sa manam ni hpe shan n lawm ai sha, shat hte jum, majap shi htu hte sha jaw sha ai zawn tai ai ngu hkam la ma ai rai nga ai.

Kanu Nu Maria gaw, tsabyi htum ma mat sai majaw poi madu ni hte hkungran num, hkungran la yan gaya hkrum na hpe mu chye ya nga ai. kasha Yesu Madu hpe shim ai hku tsun dan ya na hta kaga mahkrun lam tam ya n mai byin nu ai.

Ndai mabyin hpe Kabu Gara Shiga Chyum laika sara mali hta na San Yawhan langai chyu sha ka da ai. Dai majaw San Yawhan gaw dai hpe “Kumla” (sign) ngu shaga shamying da ai. Kawa Karai Kasang gaw shinggyim masha ni hpe hkyela na matu Yesu hpe hkyela madu Messiah hku shangun dat ai “kumla masat sakse” rai nga ai.

Yesu Madu gaw shinggyim masha ni hpe hkyela ai hta asharawng ashara rai, myit masin kaba ai lam madun ai. Yesu Madu gaw masha langai hpe hkyela ai hta htum ngu n nga ai shawang tsaw ra myit hpe madun ai. Shinggyim masha shagu hpe hkyela ai hta Kanu Nu Maria mung ahkyak ai hta shang lawm nga ai.

Yesu Madu mungkan masha ni hpe hkyela ai hta laklai myit masin kaba ai lam hpe madun dan ai.

Anhte bum ga de poi galaw ai hta poi jau jau ai ni hte poi hparan ai salang ni gaw tsa hku, tsa pyi hpe rau lu let kabu gara mung jahta, poi jau, poi hparan ma ai hpe mu lu na ga ai. Dai zawn re ai poi ni hta lu lai sha lai ai ni hpe n mu lu ai daram rai nga ai.

Chyum Laika hta tsabyi ntsing hpe shinggyim masha ni a kabu pyaw ai lam hte singdaw da ai hpe mu lu ga ai. Tsabyi ntsing gaw masha hpe myit lum hkum lum shangun ai; alum ala byin shangun ai; myit hpe kabu pyaw shangun ai; wenyi hpe hkam la ai ni a myit hta teng man kabu pyaw lam hpe lu la ai.

Tsabyi ntsing gaw masha hpe n-gun atsam ban ya ai zawn sha, wenyi gaw shinggyim masha ni hpe n-gun atsam jat bang ya nna Karai Kasang ap jaw da ai lit magam ni hpe kabu gara gun hpai shangun ai.

Chyoi Pra Ai Wenyi yu hkrat wa ai Pentecost poi shani, n ra sharawng ai Yuda myusha nkau ni gaw kasa ni ga hpan amyu myu shaga ai hpe tsabyi chyaru nang ma ai ngu asawng asang di ma ai. San Petru gaw shanhte ni tsabyi chyaru nang ai n re ai lam, Chyoi Pra Ai Wenyi hpe hkam la ai she re ai lam, hpung dagu madun let shanhte hpe shadum jahprang ya ai.

Ndai laban hta na lu ai Chyum daw lahkawng, San Pawlu Korintu Hpung Masha ni hpang de shngun dat ai laika hta, wenyi a hpring tsup ai chyeju ni hpe marai langai hpra a matu ru jaw ya ai gaw tingkyen a matu n re ai sha, Nawku Hpung hta ginlum kahkying gumdin lam hpe gaw gap na matu she rai nga ai, ngu San Pawlu shadum sharin shaga da nga ai (1Kor 12:13).

Hkristu anhte hpe hkyela ai hta mau hpa tsaw ra matsan dum lam hpe madun dan ya ai.

Karai Kasang a shawang myit kaba hte jaw ya ai lam hpe ndai laban na chyum daw langai, Myihtoi Isaiah laika hta mu lu ga ai. Ndai chyum daw hpe Myihtoi Isaiah hkum nan ka ai gaw n rai nga ai. Shi si ai hpang shaning na jang she wenyi a chyeju hte masha langai ngai ka da ai rai nga ai. Raitim, Myihtoi Isaiah hkum nan sak naw hkrung taw ai shaloi ka da ai zawn rai nga ai.

Israel myusha ni tara maigan mungdan hta mayam prat kaw nna tinang a mungdan de bai nhtang wa ai n na shi ai rai nga ai. Tinang a mungdan de bai du wa lu tim, shanhte manu shadan ai mare hten run taw ai majaw mung, dum nta, htingra, hkauhting hkauna, lamu ga wang ni shaning law law n zing hkang da lu ai majaw hten run taw nga ai majaw mung, dai hpe mu ai shaloi, myit htum myit kaji nga ma ai.

Dai zawn myit htum myit kaji nga ai Israel myusha ni hpe Karai Kasang n-gun jaw ga, kabu pyaw na lam tsun shana ya ai. Yerusalem ntsa tawn da ai Shi a tsaw ra myit gaw shawoi na hta grau htoi tu shangun na lam tsun da ai. Mungdan kaga ni yawng a matu kasi kamang tai na hte shanhte a mara ni hpe kashin kau ya nna Yerusalem mare hpe san seng chyoi pra ai mare shatai na ngu ga sadi jaw ai.

Israel myusha ni shaning law law mayan yam hkawm ra mat ai majaw, Yerusalem hpe kau da ra ma ai rai nna Yerusalem gaw “madu wa kabai da hkrum ai madu jan” ngu shagrit nna shaga shamying hkrum lai wa ai rai nga ai.

Karai Kasang gaw dai Yerusalem hpe “dinghku hte re ai wa” “ngai a sharawng awng ai wa” “ngai a kabu hpa” ngu shaga shamying lai ya ai. “Manu dan nlung” ngu shaga shamying hkrum na ra ai, ngu Karai Kasang tsun ai rai nga ai.

Karai Kasang gaw sumsing mungdan e hkungran poi hta shang lawm shangun nna anhte a hkye hkrang la lam hpe jahkum shatsup ya na ra ai (Mt 26:29).

Masha shagu hpe hkyela ai hta ahkyak ai lami laman hta Kanu Nu Maria shang lawm na hpe Karai Kasang ra sharawng ai.

San Yawhan a Kabu Gara Shiga Laika hta Nu Maria hpe Yesu hte hkrum ai mabyin shara lahkawng hta sha mu lu ga ai. Cannon mare num hkungran poi hta kalang, bai, Kalawari kawng ntsa hta Yesu Madu hpe jan noi sat kau ai wudang nhpang e kalang rai nga ai.

San Yawhan gaw dai lahkawng lang yan hta bung ai lachyum nga ai ga si hpe jai lang da ai. “Yesu Madu a Kanu gaw dai hkungran poi hta lawm nga ai” (Yh 2:1). “Yesu a wudang makau e Shi a kanu mung tsap nga ai” (Yh 19:25).

“Num sha e, ningsha hpe yu u, dai hpang sape hpe mung, ning nu hpe yu u!” ngu Yesu Madu numhtet ga tsun da ai (Yh 19:26).

“Maria mung dai lam ni hpe shi a myit masin salum hta bang da let myit aru yu nga ai” (Lk 1:29).

Cannon mare hkungran poi hta hkungran num yan la gaya n hkrum hkra Nu Maria shakut lai wa ai. Kasha Yesu a hpung dagu hte mai kaja ai hpe kam sham let garum hpyi htinglu htinglai ya ai. Kasha Yesu hkap la na n hkap la na shi hkrak n chye ai. Raitim shi a tang shawng sawk shawn ai hpe kasha ninghkap ai lam n nga ai, hkap la ya ai. Ningnan daw hta garum ya na hpe n hkap la na zawn re ai majaw Nu Maria myit tsang na gaw teng sha rai na re. Raitim, daw jau ai ni hpe shi a kasha Yesu matsun wa jang hkan galaw na matu htet da ai.

Nu Maria gaw Cannon mare na hkungran la hte num yan rau anhte yawng a matu mung garum ya nga ai.

Hkristan masha ni a matu wenyi chyeju hpe hpring tup hkam la nna tinang hte hpu nau ni a hkye hkrang la lam hta kaja grau dik rai nga na matu gaw Yesu Madu a Kanu hte anhte a Kanu Nu Maria nga nga ra ai, shang lawm nga ra ai. Anhte a masin salum hta, anhte a dum nta hta, anhte a wuhpung wuhpawng hta Yesu Madu hte rau Kanu Nu Maria hpe hkap la shara jaw ga.

Akyu hpyi saga

Wa Karai Kasang e, Chyoi Pra ai wenyi a hpring tsup ai chyeju hpe hkam la let Kanu Nu Maria a akyu hpyi htinglu hting lai ya ai hte Madu Yesu a mau hpa hkye hkrang la ai hta anhte hpe shang lawm lu shangun ya rit.Anhte a Madu Hkristu a marang e hpyi nem nga ga ai.  Amen.

Hkristu hta tsaw ra ai hkung ga ai Tara hkaw sara/num ni hte nu wa hpu nau ni e, ndai laban gaw Pranwan ladaw hta (2) ngu na laban rai nga ai.

Hti ang ai Ja Chyum Mungga ni gaw

Chyum Mungga Daw (1) Is 62:1-5

Chyum Mungga Daw (2) 1Kor 12:4-11

Kabu Gara Shiga  Yh 2:1-12

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.

By Fr. Patrick Gawmaw Hkawng Yae

Add new comment

8 + 0 =