Simsa Lam Hte Lamu Ga

Simsa Lam Hte Lamu Ga

Tsawra ai Nu Wa Hpu nau ni, ndai bat hta gaw ‘ Simsa Lam hte Lamu Ga’ ngu ai lam hte seng nna hka ja la yu ga ngu ga saw lajin ga saw  dat nngai.

Lamu ga ngu ai gaw Karai Kasang nan hpan da ai lamu ga re ngu ai hpe anhte hkap la kam sham nga ga ai.Karai Kasang shinggyim masha hpe hpan ai shaloi mung, ga yun kaw nna ga hte hpan ai ngu hpe anhte Chyum laika hku nna mung anhte sawn la, hkap la chye la lu ai lam rai nga ai.

Raiyang lamu ga gaw Karai Kasang hpan da ai, shinggyim masha ni hpe mung ‘ga’ hku nna hpan da hkrum ai asak hkrung ai ni rai nga ga ai. Garai hpan da ya ai tu matu hkrung mahkrung ma hkra mung lamu ga kaw tu nna asak hkrung ai lam hpe anhte mu mada chye lu na re.

Lamu ga hku nna anhte hpe manu dan ai nhprang sut rai ni, ja lung seng ni hpe jaw ai ngu hpe mung ahte chye na mai nga ai.Lamu ga ngu ai hte Asak ngu ai gaw galoi mung matut mahkai nga ai lam rai nga ai.Shinggyim masha ni a asak sha nrai nga ai.Tu matu hkrung mahkrung nhprang sut rai ni mahkra mung lamu ga hte matut taw nga ai hpe anhte sawn la mai nga ai.

Dai re majaw lamu ga ngu ai gaw, anhte a Kanu zawn re ai anhte a chyeju madu zawn rai nga ai lam re.Asak hte matut taw nga ai lam re.Lamu ga gaw, anhte shinggyim masha ni hpe mung, tu matu hkrung mahkrung ma hkra hpe mung, dusat dumyeng ni hpe mung malu masha hpe jaw ya ai ngu ai lam hpe anhte sawn la mai ai lam rai nga ai. Dai majaw lamu ga hpe anhte galoi mung makawp maga ra ai manu shadan ra ai lam hpe anhte sawn la mai nga ai.Lamu ga ngu ai nnga yang, anhte shinggyim masha ni sha n-ga, dusat dumyeng nhprang sut rai ni hkrung na mung n loi nga ai lam hpe anhte sawn la mai nga ai.

Lamu ga hte asak hkrung ai arung arai ni galoi mung matut mahkai taw nga ai.Galoi mung shingbyi hkat taw nga ai.Shinggyim masha ni ngwi pyaw simsa ai hte hkrung nga lu na matu, lamu ga mung ngwi pyaw simsa ai hte nga ra ai, tsit lali tsawm nga ra ai ngu hpe anhte sawn la  mai ai lam rai nga ai.

Lamu ga hte hkan nna anhte shinggyim masha ni shaga ai ga ni shai mat ai, amyu, htunghking ni shai hkat ai. Lamu ga hta hkan nna du hkra ladaw ni shai ai hpun kawa ni, dusat dumyeng ni shai ai lam hpe anhte mu mada lu na re.Lamu ga a Madu majing gaw kadai i nga jang, Lamu ga a Madu majing gaw Karai Kasang sha re, shinggyim masha ni nre ai hpe anhte chye na mai nga ai.Anhte Myanmar mungdan hta Lamu ga ni a madu gaw Asuya re nga nna tsun ai lam nga ai.Nkau Mungdan hta, Lamu ga a Madu gaw mung shawa ni re nga nna hkap la ai lam mung nga ai.

Raitim anhte kam sham ai kashu kasha ni a matu gaw, Lamu ga Madu majing gaw Karai Kasang sha rai nga ai.Anhte shinggyim masha ni gaw dai lamu ga hpe yu reng na matu ahkaw ahkang lit jaw da ai yu  reng ai Madu ni sha re ngu ai hpe anhte sawn la mai nga ai.Anhte lamu ga ni hpe akyu nga ai hku jai lang na matu Karai Kasang a hpung shingkang hpe shakawn na matu, shadan shaleng  na matu, masha ni akyu nga ai hku anhte jai lang na matu Karai Kasang anhte hpe rim sin na Madu tai na matu san da ai re ngu sawn la mai nga ai.

Dai re majaw,

Lamu ga hpe anhte n-gawn nsawn di ai, namak law hpa ai myit hte Lamu ga hpe jahten ai nga jang dai lamu ga gaw nsim nsa ai re majaw anhte shinggyim masha ni hte dusat dumyeng ni hpang de nsim sa shangun ai akyu ni anhte hkam la chye nga ai.Hpa majaw nga jang, lamu ga gaw Karai Kasang hpan da ya ai zawn, anhte shinggyim masha ni mung ga kaw na hpan da ya ai asak hte matut ai lam nga ai re majaw shinggyim masha ni hte du sat du myeng ni, simsa ai hte hkrung nga ra ai zawn, lamu ga mung galoi mung simsa ai hte tsit lali tsawm nga ra ai re

hpe anhte sawn la mai nga ai.

Lamu ga hpe anhte n-gawn nsawn di ai a marang e anhte asak sum chye ai lam nga ai ngu hpe anhte sawn la mai nga ai.Shinggyim masha ni gaw lamu ga hpe n gawn n sawn di na ahkaw ahkang nnga ai ngu ai hpe anhte chye na mai nga ai re.Ja, Lung Seng Htu ai, Shinggyim masha ni a namak law hpa ai a marang e, hpun kawa ni n hprang sut rai ni hpe jahten ai, amyu myu galaw ai a marang e, lamu ga hpe n sim n sa shangun ai lam re.

Dai re majaw lamu ga kashun ai ten ni, Lamu ga kashun ai a marang e, majan ni byin ai, kun dinghku dum nta htingbu htingbyen ni hte lamu ga kashun ai a marang e ga li ga law nga ai n sim n sa ai lam ni law law anhte wuhpung wuhpawng hta shinggyim masha ni a asak aprat hta nga chye ai. Lamu ga a manu dan ai a marang e, namak law hpa ai shinggyim masha ni a myit a marang e, n sim n sa shangun ai lam ni mung law law anhte makau grup yin hta anhte nga na re.

Karai Kasang anhte a matu Lamu ga hpan da ya ai lam a yaw sing ai lam gaw, anhte a asak hte seng nna ahte shinggyim masha ni akyu nga ai hku jai lang na matu, dusat dumyeng hpun kawa ni mung akyu nga ai hku lamu ga hta jai lang lu na matu asak hkrung lu na matu Karai Kasang a hpung shingkang shadan shaleng lu na matu, shinggyim masha ni a matu, yawng a akyu nga ai hku anhte jai lang lu na matu, Karai Kasang ahte hpe lamu ga hpan da ya ai hta sha n-ga, asak hkrung lu na matu mung anhte hpe lamu ga hpan da ya ai ngu ai lam hpe anhte sawn la mai nga ai.

Ndai Mungkan ga kaw, lamu ga hta anhte simsa ai hku nga ai, lamu ga hpe anhte simsa ai hte makawp maga ai marang e hpang na prat hta dai lamu ga akyu chye ju Karai Kasang a Mungdan hpe pyi gaw anhte Madu lu ai ahkaw hkang ni anhte hpe Karai Kasang jaw da ai lam nga ai ngu ai lam rai nga ai.

Anhte Wunpawng myusha ni kata hta mung, lamu ga hpe makawp maga ai masha ni nga ai zawn, lamu ga hpe manu n shadan ai, namak law hpa nna jai lang ai lam mung law law nga nga ai.Ga shadawn tsun ga nga jang, anhte Jinghpaw mung nkau shara hkan yu dat ga nga jang, manu dan ai hpun ni n tu ai, lamu ga ni matsan mayan rai nna n tsawm taw nga ai hkun hkraw taw nga ai.Lamu ga hta anhte shinggyim masha hpe jahten ai Karai Kasang a Hpung shingkang hpe shadan shaleng ai lam nnga ai nang hpam malu masha ni hkai lu hkai sha nna lamu ga hpe awu asin galaw ai lam ni law law nga nga ai.

Nhprang sutrai htu ai, ja lung seng htu ai marang e nammak law hpa nna anhte lamu ga lam amyu myu hku jahten ai lam law law nga ai.Dai zawn galaw ai majaw n kaja ai akyu hpe anhte ni bai hkam sha chye ai.Dai gaw Simsa ai lam hte anhte lamu ga ngu ai gaw galoi mung, matut mahkai nga ai lam re hpe anhte sawn la mai ai lam re.Anhte hpe Karai Kasang jaw ai lit gaw, ahte lu da ai lamu ga ni hpe anhte hpe Karai Kasang madu shangun ai, yu reng shangun ai lamu ga ni hpe anhte atsawm agawm tsaw ra myit hte anhte  jai lang na yu reng na manu shadan na matu re.

Hpa majaw anhte a nga sat nga sa lam hte anhte a sak hkrung lam ni hte lamu ga gaw galoi mung shada da shingbyi ai matut mahkai hkat ai lam a majaw re.Akyu nrawng ai lamu ga hpe awu asin galaw ai nammak law hpa ai a marang e anhte lamu ga hpe jahten ai ndai lam ni ma hkra gaw Karai Kasang yaw sing ai Simsa lam hpe jahten ai sha n-ga, anhte shinggyim masha ni a myit masin sim sa lam nga sat nga sa lam a simsa lam hpe jahten ai lam mung byin ai.

Dai re majaw anhte gaw, Karai Kasang a yaw sing ai Karai Kasang hpan da ya ai ndai lamu ga ni hpe anhte asak madu zawn anhte a Kanu zawn, anhte a kashu kasha zawn, anhte a chye ju madu zawn rai nna ngwi pyaw ai simsa ai hte tsaw ra myit hte galoi mung  yu reng makawp maga ra ga ai re.

Fr.John Hpungshang Awng Htoi

 

Add new comment

2 + 0 =

Please wait while the page is loading

Simsa Lam Hte Lamu Ga | Radio Veritas Asia

Error

The website encountered an unexpected error. Please try again later.