Putau Muklum Hta (70) Ning Hpring Rawang Amyu Sha Masat Nhtoi Galaw Na Hkyen Nga

Jinghpaw Mung, Putau Muklum hta Myanmar Mungdan Rawang Laiki Laika hte Htunghking Hpung Ginjaw kawn woi awn let December praw 9 ya shani ang ai (70) ninghpring Rawang Amyu Sha Masat Nhtoi hte Pyaw Poi Mawn Poi hpe Putao Duktan Lawk Rawang Amyu sha Htunghking Hpung Wang hta hkik hkam ai hku galaw mat na re lam chye lu ai.

Poi nhtoi shani Rawang Amyu sha Masat Nhtoi Lamang hte Manau Nau ai lam, December 9 ya shani man hkrum shana lu sha sha poi, December 8 ya shani gawp (Golf) gayat ginsup shingjawng ai lamang ni hte kaga pyaw hpa ka hkrang yu ngwi pinra lamang ni mung galaw mat na re lam chye lu ai.

Ndai zawn re Rawang Amyu sha masat nhtoi galaw ai lam gaw, Rawang amyu sha ni Hpan madu Karai Kasang hpe rau jawm Nawku dawjau lu na matu, Myutsaw myit grau rawng ngang kang grin nga lu na matu, Rawang Amyu sha ni shada da kakyin gumdin wa lu na matu, Rawang Amyu sha ni prat dingsa nga pra sa wa lu na matu hte Rawang Amyu sha ni lam shagu rawt jat galu kaba wa lu na lam ni hpe bawngban jahkrup na matu

yaw shada let galaw ai re lam chye lu ga ai.

1949 ning December shata praw 9 ya shani HkawngLang Hpu Ninghtawn, Wunin Mare hta Rawang Laili Laika Hpung hpaw na matu dawdan ai shani hpe Rawang Amyu sha masat Nhtoi ngu shamying ai rai nna, lai wa sai ten ni hta Rawang amyu sha masat nhtoi hpe shamying shama hku sha galaw lu ai raitim 2017 ning kaw nna grau madang tsaw hkik hkam ai poi kaba hku galaw ai gaw dai ning hte rai yang masum lang du sai lam chye lu ai.

Ndai poi lamang de Putao, Mashang Baw hkan nga ai Rawang Amyu sha ni sa du shanglawm na rai nna, Rawang Amyu sha masat nhtoi hpe kaga Mare kaba ni rai nga ai Nawng Mun, Hkawng Lang Hpu, Myitkyina, Hpakant, Yangon, Madalay hte Ta Shi Lik Mare ni hta mung masat nhtoi hpe galaw mat na re ai lam Myanmar Mungdan Rawang Laili Laika hte Htunghking Hpung Ginjaw Ningbaw Salang Mayit Yawshu tsun ai hte maren chye lu ai nga nna Myitkyina News Journal facebook laika man hta ka da ai hte maren chye lu ga ai.

Thomas / Source: MNJ