N Lung Nnan Sha Poi Byin Wa Ai Labau

Hkungga tsawra ai shiga madat Nu Wa Hpu nau ni, Nshung mangai, nmut ta ten bai du wa sai hte maren, n dai lang na htunghkring lamang hta gaw,  N lung Nnan sha Chyeju Dum Poi poi byin wa ai labau lam  hpe chye na lu ai daram tang madun shapoi mayu nngai.

Shingdu Labau

N dai n lung nnan sha poi byin wa ai lam hpe shawng de na ga, hti ga ai shi ga madat ni mung nga na re. Raitim kalang bai kahtap madat la ga ngu ga saw dat mayu  nngai.

Wunpawng myusha ni a poi kaba lamang langai rai nga ai “N-lung N-nan Sha Poi” gaw, lai wa sai shaning 10000 BC(8000) lahta kaw nna ya daini du hkra galaw nga ai re. Dai shaloi, Madu Yesu npaw pru shi a BC 10000 ram ten hta Mungkan masha jahpan gaw wan mi hte wan 15 lahpran (1 Million hte 15 Millions)sha nga ai ten rai nga ai.Ya dai ni gaw mungkan masha jahpan wan 7000 du nga sai re.

Hpa majaw poi ndai byin pru wa ai i nga yang, anhte myusha ni gaw " Yagyi-Mam" hpe shawng nnan sha ga ai re da. Raitim dai ya gyi mam hte n hkru sha ai sha n-ga, shaning shagu "hku hku" lai wa sai.

Hpa majaw hku hku i nga yang ‘Yagyi’ mam  hpe law law sharun tim gaji kajaw sha lu ai majaw nhkru sha ai re nga ma ai.

Dai hpang N-gu si ngu ai (htu nra ai n-gu si hpun)hpe bai hkai sha lai wa sai; dai shaloi mung matut nna naw "hku hku" ai.

Hpa majaw hku hku i nga yang, dai ‘N-gu Si’ gaw Man Nli la nmai ai hpun re sha n-ga, shara htawt hkai mung nmai; shi tu ai shara kaw sha nga ai majaw rai nga ai.

Dai zawn Yagyi mam hte N-gu Si ni hkai sha tim galoi mung hku hku ai majaw, Myu sha ni hkru hkru lu sha nga mu nga mai wa lu na matu hpa galaw sha na re nchye ai sha namlaw nam lap nam si, ulai ni tam sha let Yuli hku prat kaw na n lawt ai sha nga mat wa sai da.

Lani mi na aten hta, Jan Hkawhkam wa gaw nam de na ‘Ura u’ langai lu gap la wu ai. Dai Ura hpe Nta du na hpya ai shaloi, Ura a ma-u hpe tsan nna nta shawng kaw kabai da mu ai.Dai Ura gaw Mam Si hpe sha da ai re majaw Ura ma-u kaw Mam Si rawng taw nna, ma-u kabai da ai shara hta, dai Mam Si ni kawn Mam hpun tu wa ai.Shi asi ni mayat maya gumja gumhpra kaba wa ai; de hpang dai mam asi hpe sha yu yang, sha mai ai kaw nna daini anhte sha nga ai Mam n-gu hpun hpe lu la wa ai re nga nna mau mwi labau laika hta lu hti la nga ai.

Dai Mam hpun kawn pru ai Mam N-gu gaw hkru hkru kat kat sha lu ai rai nna, Dai mam hpun gaw nli la mai ai hpan re ai hte maren shaning shagu aten du ai hte yi hkau na galaw nna bai hkai hkai rai mayat maya shangun lu nga ai. De hpang e Mam tu n law ai majaw hku hku ai lam n byin mat sai gaw ya dai ni na ten du hkra rai nga ai.

Shawng daw na ten ni hta hku nau hku ai majaw hkru kat wa lu na matu, shu la lu ai ndai nsi naisi man hpe gaw shawng nnan Karai Kasang kaw ap nawng chyeju dum chyeju shakawn let sha hpang ma ai.

Karai kasang shamam ya ai Nsi, Naisi, Nai Mam hpe chyeju shakawn let,  kabu gara rau jawmlu/sha ai lamang hpe "NLung Nnan Sha" ngu tsun shamying ai kaw nna "Nlung Nnan sha poi" byin wa ai rai nga ai.

Ndai Nlung nnan sha poi hpe, Moi shawng de gaw ni nawn ai gahtawng shi (10) ram shara mi kaw mahkawng rai, gahti galai Mare hpe masat rai shaning shagu "Nlung Nnan Sha Poi" hpe grai hkikhkam ai hku galaw  lai wa ma ai re.

Ya dai ni na anhte a prat hta ndai "Nlung Nnan Sha Poi" hpe Bum ga Mare kahtawng n-kau shara hkan matut  galaw ga ai raitim, moi de na zawn htunghking poi kaba langai hku nna grai wa ahkyak shatai let madang tsaw ai hku n galaw saga ai.

Dai majaw, Htunghking hpe manu shadan tsawra ai Kaji Kawa n kau ni ndai anhte a madang tsaw ai htunghking langai hpe  shamat kau ai de du wa nga sai nga nna tsun shajang nga ma ai.

Chyeju Dum Poi Galaw Hpang Ai Lam

Ya anhte Wunpawng ginra  law law  hta galaw nga ai chye ju dum poi gaw England hkawhkam Henry VIII wa Catholic Hpung kawn  garan mat wa  nna Anglican Nawku hpung gaw de hpang ai 1534 ning a hpang daw kaw nna galaw ai poi rai nga ai.Dai ten hta,  Anglican Nawku htung hpe ninghkap ai hpung masha ni America dan de  hprawng mat wa ai shaloi, shan hte nga ai shara hta shaning law law yuli hku hkrum lai wa ma ai. Dai hpang Squanto ngu ai American shan hkyeng Red Indian la wa gaw, dai htawt wa ai manam ni hpe hkai lu hkai sha ladat ni sharin ya wu ai.Dai shaning gaw hkai nmai nsi naisi ni grai tu kaba mayat maya wa nna grai lu su wa ma ai hte shan hte Hkristan rai nga ma ai hte maren, Karai Kasang hpe chye ju shakawn ai poi, hkikhkam ai lu sha poi  kaba galaw ma ai.Dai ten gaw nshung ta, November shata mung re ai hte maren, dai hpe lakap nna ya ten du hkra November shata hta chye ju dum poi galaw nga ga ai re.

Thomas

Mahta la ai laika ni

- Nlung Nnan Sha Poi Byin Wa Ai Labau ( WP Htunghking Hpung Ginjaw FB)

- Harvest Festival (Wikipedia)

- Chyeju dum poi byin pru wa ai lam (Zinghang Gam Htun)

 

 

 

 

Add new comment

7 + 3 =

Please wait while the page is loading

N Lung Nnan Sha Poi Byin Wa Ai Labau | Radio Veritas Asia

Error

The website encountered an unexpected error. Please try again later.