Gumhpraw Lap (10) hte  Sasana Magam Galaw Hpang Ai Sara Kaba Lai Hpawng Naw Awng

Danai Jau Ginwang kaw magam gun nga ai Sara Kaba Joseph Lai Hpawng Naw Awng a Karai magam gun (50) ning hpring Jubali poi hpe 2019 May shata (10 ) ya shani galaw lai wa sai rai nga  ai.

Sara Kaba a Jubali Poi de Wa Saradaw Francis Daw Tang hte rau kaga Wajau ni marai (6), shara shagu na Tara hkaw Sara/num ni, Nawku hpung masha ni law law mung sa du lawm ma ai.

Sara kaba a labau hpe yu yang Nawku hpung magam lam hta grai nan mau na zawn rai ap nawng shakut lai wa ai Sara lagai re hpe mu lu nga ai.Jinghpaw mung de Sasana sa galaw ai Maigan Jau ni hte rau Karai a magam hta yak yak hkak hkak rai,grai shakut lai wa sai Sara re. Jawng ma prat aten kaw nna nan shi a hpaji lam htau grau, ap nawng magam hpe madung da galaw lai wa sai grai nan shakawn ging ai Sara rai nga ai.

Sara kaba Joseph Lai Hpawng Naw Awng, 76 ning, hpe Mali Nmai Wa Lawng Lai Hpawng Ga kaw,1943 ning daram hta Kawa Lai Hpang La, Kanu Lahpai Lu yan kaw nna shangai dai daw dat sai.Lai Hpawng Ga kaw nna layang ga de 1954 ning daram hta Kawa dim Lai Hpawng Tang bum ga kaw nna, layang ga Mogaung makau, Shamyen Gyawk Mare kaw (3) ning daram na hkra, nga woi nna, Lidu lam makau Makawk Zup mare de bai htawt nga wa sai.1958 ning, laika hpaji tsang (4) hpe awng la nna ,tsang (5) lung na shaning hta Makawp zup jau rai nga ai,Wajau Collier hpe Wa Saradaw Howe gaw Hu Kawng Buga, Danai mare de htawt nga shangun  sai.Dai aten Wajau hpe shat shadu jaw na masha n nga ai majaw Sara kaba Lai Hpawng Naw Awng hpe Danai de bai shaga la hkrum ai lam chye lu ai.

1962-1963 ning aten ni hta mung Wajau Collier hte rau dum nta de pyi n wa hkra rai Danai Buga grup yin na Mare kahtawng hkan kawan katsan hkawm ai, akyu hpyi ga, tara laika, mahkawn mangwi ni sharin ya hkawm ai a majaw hpung shang ai masha grai law jat wa sai lam hpe chye lu ai.1964 ning hta gaw mung masa grai shuk wa ai majaw mawdaw lam ni pat mat ai, mawdaw lam mayan na mare buga masha ni yawng nam de hprawng mat ra ai.

Dai daram mung masa n pyaw yak hkak nga ai shara ni de lagaw leng hte hpung kawan hkawm ai, lam de masha kadai nlai mat sai,lam yan tup hpun lang shadaw pat da ai majaw lahpa she bum hkra lagaw leng hpai nna hpung kawan hkawm ai ten ni mung nga lai wa sai lam chye lu ai.

Ya na prat hte gaw grai nan shai hkat ai hku rai nga ai ,Karai Kasang a matu dai daram ap nawng shakut ai gaw grai kasi yu la ging ai Sara she rai nga ai

Kalang mi na aten hta May shata maga rai wa sai majaw Tawang Hka loi rawt wa sai rai tim lagaw leng hpai nna hka rap ai shaloi hka kaw yawng lawm mat ai, Dai majaw Sara gaw lagaw leng hpe tawn da nna,Wajau hpe bai dun rai hka rap wa ai,Wajau gaw hka ntsa kaw waw nang rai,tsawm ra yawng nna she tsam mari kaw wa lu ma ai lam tsun dan lai wa ai.

Dai shaloi hka rap ngut ai hpang Wajau gaw “ Daini Ma Naw nang hte nrai yang ngai si sai nga nna tsun ai,Wajau  mung tsawmra mi hkrap kau ai nga nna Sara a labau hta na lu nga ai.

Ya prat gaw yak ai nga tim mawdaw,cycle sha gaw mai jawn ai shara ni law mat sai.Moi na maigan jau ni  grai nan jamjau jam hkau rai let, Sasana majen je gat hkai tawn da ai apu asi ni hpe daini anhte hkam sha lu nga ga ai hpe mu lu nga ai.

Maigan Sasana Jau ni hte maren shakut shaja lai wa sai Sara Kaba a chyeju hpe nmai malap nga ai.Shana maga de mare shing nawm de na,sinat ngoi wa ai majaw Wajau hte shan lahkawng ga kaduk de,laban bat (2) daram rau yup kau ai,kalang lang shat pyi nlu sha ai majaw,kaduk kata de muk sha,sha nna nga ra ai lam mung tsun da nga ai.

Dai aten lana mi hta Wajau gaw Sara hpe sharawt la nna,tsun htet da ai ga ni mung matsing hpa rai nga ai.Wajau tsun htet da ai ga ni gaw;

(1) Ma Naw nang Wajau hte ya na zawn ru yak, jam jau hkrum ai lam ni gaw nang num la nna kashu kasha lu wa ai shaloi mau mwi tai wa na re.

2) Anhte Jau ni du sa ai lam gaw nanhte jinghpaw amyu sha ni kaji kadun rai nga ai, nanhte amyu sha ni makam masham kaja lu la na matu re.

3) Nanhte amyu sha ni masha lahkam dep na matu re,nanhte a nga shara gaw , lamu ga sumla hta pyi nmu ai.

4) Nanhte amyu ni hpe tsawra ai majaw,daini ndai zawn mungdan shuk ai rai tim, ruyak ai kade hkrum ai raitim, anhte jau ni, shakut ap nawng nga ai re nga nna tsun htet da nu ai.

Dai shana Wajau tsun dan ai mung ga ni gaw Sara kaba Joseph Lai Hpawng Naw Awng a myit masin hta dai ni aten du hkra galoi mung malap nlu ai lam tai mat nu ai.

Shingrai 1964 ning hta Wajau Collier hte ga kaduk hta rau yup ai shaloi Wajau tsun dan ai ga a majaw Sara kaba Joseph Lai Hpawng Naw Awng gaw shi myit hta “ nye a manang langai lahkawng hpe sha gaw,Karai a tengman ai mungga gam garan lu hkra ngu ai myit rawng wa nna 1967 ning hta  Mali Nmai Zup shara,Tanghpre Buga kaw hpaw tawn da ai Chyum Jawng de gumhpraw lap (10) sha gun nna chyum jawng sa lung hpang la let Tara hkaw Sara magam hpe matut gun hpai mat wa ai kaw nna daini Karai Magam Gun (50) ning hpring Ja Jubali Poi hpe galaw ai ten du hkra rai nga sai.

Sara kaba Joseph Lai Hpawng Naw Awng a Karai magam gun prat na lam ni gaw, Hpung masha, hpung Sara/saranum ni yawng a matu myitlawm hpa, kasi la hpa langai mi rai nga ai hpe mu lu nga ai.

By: Julia N-dawng Ja Ing