Yaw Shada Myit Mada Lam Kaba Na Matu Dingdung Macedonia Mungdan Na Jau Ma Ma Hte Ramma Ni Hpe Wa Sarabyin Tsun Htet Da

 Yaw shada myit mada lam kaba ga, dai lam ni hpe rau jawm shachyen galaw nga ga, nga nna Dingdung Macedonia Mungdan hta du nga ai aten Wa Sarabyin Francis tsun dat nga ai.

Lani mi sha aten la nna sa du gawan lam galaw lai wa ai Wa Sarabyin Francis a Macedonia Mungdan hkrun lam laman, shi a yaw shada ai lam ni hpe tsun shaga madi madun ai lam ni galaw lu lai wa ai re, nga ai.

Macedonia Mungdan de du shang wa ai hte, mungchying mung shawa the seng ai uhpung uhpawng ningbaw ni hpe tsun shaga ai Wa Sarabyin a  Mungga hta, “Macedonia Mungdan gaw htunghking lai masa law law, makam masham uhpung law law rau hpawng shanu nga pra ai shara mung re, ndai zawn amyu ru sai baw pa law law, makam masham uhpung law law nga nga ai masa lapran shada simsa ai masa hte rau jawm shanu nga pra ai hpe mu lu ai majaw shakawn shagrau ai, ndai gaw Mungdan a manu dan ai Sali wunli kaja nan rai nga ai, bai, Skopje gaw Mother Teresa nga kaba wa ai Mare Buga mung rai nga ai, ra kadawn dik nga ai masha ni hpe tsawra myit madun lu na lam hpe Mother Teresa ndai shara, shi a kun dinghku hta sharin hkaja lam galaw la lai wa ai rai nga ai, n-gup aga hte sha nrai ta tut amu magam hte matsan masha ni, kabai da hkrum ai ni, n-gawn n-sawn di hkrum ai ni, bu htawt hkawm masha ni hpe tsawra myit madun lai wa ai Mother Teresa gaw anhte yawng a matu a kasi kaja rai nga ai” nga nna Wa Sarabyin tsun lai wa ai.

Macedonia mungdan na n law la ai Kahtawlik hpung masha ni hpe Wa Sarabyin tsun ai hta gaw, “nbung ai htunghking makam masham law law a lapran myit hkrum gahkyin lam, tsawra lam, myit mada lam ngu ai mungga ni hpe, tinang a asak aprat, sak hkrung nga sa lam the madun shaleng lam galaw nga ra na rai ga ai” nga nna hpung mash ani hpe Wa Sarabyin tsun n gun jaw da nga ai.

Nlaw la ai Jau Mama ni hpe Wa Sarabyin tsun ai lam hta, “Madu Yesu a lagaw hpe manu dan manam pyaw ai sau chya ya ai Maria a mabyin hpe myit dum nga ga, kachyi sha re ai sau rai nga ai raitim, de a manam pyaw ai lam nta ting hpring mat lu nga ai, dai zawn sha ndai Macedonia mungdan hta hpung masha ni nlaw la ai raitim, noi kadu nga ai hpung masha ni a mai kaja ai lam ni gaw Mungdan ting a matu n-gun lu la lam byin tai lu nga ai” nga nna Nawku hpung a magam gun ni hpe Wa Sarabyin tsun n gun jaw da nga ai.

Mother Teresa gaw Yaw shada lam kaba nga ai majaw grai hkyik hkam ai masa the tsawra lu nga ai, Mother Teresa hpe kasi yu la nga ga, Nawku hpung a matu, mungkan a matu ya shada lam kaba ga, dai lam hpe rau jawm shachyen galaw nga ga, nga nna mung Macedonia Ramma ni hpe Wa Sarabyin tsun n-gun jaw dat nga ai .                  

Source:Vatican News