Wan Hkru Mat Ai Notre Dame Nawku Jawng Hpe 5 Ning Laman Ngut Hkra Bai Gaw Gap Na

France Mungdan Paris Muklum na wan wan hkru mat ai Notre Dame Nawku Jawng Kaba hpe 5 ning laman mi moi na hkrang hte n shai ai hku ngut hkra bai gaw gap lu ai nga nna gaw gap hpaji ninghkring ni tsun lai wa ma ai.

Paris Muklum a Wenyi Htingnu mung rai nna, Mungkan labau hta dan dawng ai Sali wunli htingnu kaba  Nortre Dame Nawku Jawng kaba gaw lai wa sai April shata 16 ya shani wan  hkru nna,n tsa kaw galup da ai hpun pyen shangu htam masum kaw na  htam lahkawng ram hkru mat wa ai rai nga ai.

Wan hkru ai ai shaloi Nawku Jawng a magum hkingbawng n chyun hte  magaw n kau ni hkru mat ai rai tim, Nawku Jawng dingsi noi ai shara lahkawng hte madung gawk nu ni n hkru lawm mat hkra wan sat ai ni kawn lawan ai hku makawp maga la lu ma ai.

Shaning jaw prat 850 ning ram na sai hkikhkam ai Nawku Jawng kaba ya na zawn wan hkru ai hta yawng n lawm mat ai gaw , France Mungdan a matu sha n rai, Mungkan ting a matu mung,Hkristan ni a matu mung kabu hpa rai nga ai.

Wan hkru ai lam byin ai hpang, French gumsan magan Emmanuel Macron kaw nna Nawku Jawng bai gawgap  na matu alu gumhpraw hta shingyin ai lam mung galaw dat nu ai.

Ya du hkra rai yang ,Nawku Jawng gawgap na matu alu gumhpraw wan 1000 mi jan ($ 1000 million) ram lu da sai rai nna, alu jaw bang ai ni gaw Apple, L’Oreal ,LVMH zawn re ai mungkan hta mying gumhkawng ai Company kaba ni hte French lauban sut du kaba ni lawm ma ai lam chye lu ai.

Ref: Mizzima, AFP