Wa Sarabyin: Wa Jau Ni E Karai Kasang Hte, Saradaw Hte, Jau Shada Hte, Sagu Hpung Masha Ni Hte Ni Htep Ai Hku Nga Ga

February 17, bat mali ya shani, Wa Sarabyin Francis, “International Theological Symposium on the Priesthood”, Jau prat hte seng ai Karai hpaji hka ja hti sumru ai lam hpe mungkan madang galaw ai” hta Jau ni gaw Karai Kasang hte, Saradaw hte, Jau shada hte, sagu hpung masha ni hte ni htep ai hku nga ra ai, shanhte hte hku hkau kanawn mazum nga ra ai, daw jau ra ai ngu sharin shaga let saw shaga da ai.

Jau prat (50) ning de du sang wa ai Wa Sarabyin Francis gaw, daini na Jau ni Chyoi Pra ai Wenyi jaw ya ai simsa ai hte akyu ara apu asi ni hpe hkam sha lu na matu shanhte hpe madi nna shadum da ai lam rai nga ai.

Synodal Church organizes major Symposium on hte priesthood

Jau ni sha n re ai, sak prat ap nawng daw jau sakse hkam ai ni mung, sagu rem wa kaja ni a myi man hpe mada mu mada sumru la lu ai lam shaning law law jau sai kaw na rai sai lam Wa Sarabyin Francis tsun hpaw da ai.

Rau nga ai Jau nkau ni gaw sagu rem magam hta shakut shaja ma ai zawn, nkau ni gaw lachyum n pru, akyu n rawng ai lam hpe kahtap kahtap nna galaw shut, nga shalai kau ma ai majaw teng man tsaw ra myit hpe ginlut shamat kau ma ai, ngu mung sawk sagawn tsun jahpra da ai.

Teng man, kang ka rai nna hkrak byin nga ai lam ni hpe hkap la nna, yak hkak jam jau lam ni hpe n hkrit n tsang ai hte hkrum katut hparan hpajang sa wa na hpe ra sharawng ai lam mung matut tsun shana da ai.

Daini na prat a Jau prat hte seng nna n shut n shai ai hte hkrak daw dan (decisive) sa wa na hpe madung da sa wa na hpe ra sharawng ai lam, shanhte a myit manaw, myit jasat, kyang lailen (attitude) gaw shanhte a Jau prat hta hkam jan lu ai tai na hpe ra sharawng ai lam, Jau prat ngu ai daw hpum hpe madung sumru hkawm na shangun mayu ai lam, tsun let, ndai gaw Karai Kasang hte, Saradaw hte, Jau shada, bai Karai Kasang a kashu kasha ni yawng hte ni htep hku hkau daw jau nga na matu Wa Sarabyin Francis n-gun jaw da ai.

Karai Kasang hte Ni htep Ai Lam

Jau ni gaw yawng hta na ahkyak dik shaga la hkrum ai gaw, Karai Kasang hte ni htep ai hku nga na matu rai nga ai. Dai gaw shanhte a sasana magam hta ra ahkayk ai n-gun atsam lu la na lam rai nga ai; Yesu hte ni htep ai hku sa nna Jau prat a kabu pyaw lam, myit ru myit tsan yak hkak jam jau lam ni yawng Yesu hpe tsun dan rau hkam sha let shi kaw na atsam bai la ra ai; tinang shingtai hta dai atsam hpe bai n lu mai ai. Ni htep na lam ni gaw akyu hpyi ai, simsa ai hku nga nna Karai Kasang a lam myit sumru na lam rai nga ai; dai gaw shanhte a sagu hpung masha ni hte ni htep ai hku nga lawm na matu lam woi ya na ra ai; Karai Kasang hte ni htep dik htum shara hta nga nga ga, ngu Wa Sarabyin sharin shaga da ai.

Saradaw Hte Ni Htep Ai Hku Nga Ai Lam

Saradaw hte ni htep ai hku nga ai gaw gara hku madat mara na hpe sharin la lu ai; Karai Kasang sharawng awng ai madat mara lam, hpu nau wa hpe madat mara na lam, hpu nau ni hte hku hkau kanawn mazum lam ni hpe sharin la lu ai; Saradaw gaw Nawku Hpung hpe langai hta sha ginlum kahkyin gumdin ai lam hte seng nna ga shaka da gaw de da hkrum ai wa rai nga ai; Tinang a saradaw a matu akyu ja ja hpyi na matu mung Jau ni a lit magam rai nga ai hte maren dai zawn akyu hpyi na matu mung saw shaga da ai.

Jau Shada Ni Htep Ai Hku Nga Ai Lam

Jau ni shada ni htep ai lam gaw sai rum nau na shada tsaw ra ai, magam run manang ni shada tsaw ra ai ni htep lam hpe grau shadan shadawng ai rai nga ai. Jau shada tsaw ra hku hkau ai hta san seng san pra ai hku hpu nau ni hte rau nga pra na matu ahkyak ai; tinang shingtai hkrai nga na matu n rai nga ai; shagrit shanem myit hte myit masin hpaw malang nna hku hkau tsaw ra ra ai; hkam ja ru jung ngang kang ai hte hku hkau ai wuhpung kaba tai nga ra ai, ngu Wa Sarabyin Francis Jau ni hpe shadum da ai.

Shawa Masha Ni Hte Ni Htep Ai Lam

Hpang jahtum Karai Kasang a myusha ni hte ni htep hku hkau na lam woi sumru da ai hta, bungli hku n myit ai sha, Karai Kasang a chyeju hte daw jau ai lam re hpe myit dum nga na matu shadum da ai. Htuk manu ai shara shagu hta hpu nau ni hte ni htep hku hkau ra ai;  sagu hpung masha ni a yak hkak jam jau lam ni hta hkam sha lawm, garum pawn ba sa wa ra ai; Sagu rem wa kaja Yesu Madu a ladat lailen hte ni htep hku hkau rau nga let si mani ai ladat hte sasana galaw ra ai, ngu sharin shaga da ai.

Ndai lam ni gaw lit lit ai kan dang n re ai, chyeju kumhpa she rai nga ai; Karai Kasang hkum nan anhte hte ni htep nga lawm ai zawn nga pra lu hkra shakut ga ngu, Wa Sarabyin Francis, hpang jahtum mungga ginchyum dat n-gun jaw da nga ai.

By Fr. Patrick Gawmaw Hkawng Yae

#vaticannes

#rvakachinservice

https://www.vaticannews.va/en/pope/news/2022-02/pope-calls-priests-to-draw-near-to-god-bishop-priests-people.html