Wa Sarabyin: Ramma Ni Hta Myit Mada Lam Kaba Tawn Da Nga Ai Lam

Wa Sarabyin: Ramma Ni Hta Myit Mada Lam Kaba Tawn Da Ai

  “UN International Youth Day”, August 12 ya shani, Wa Sarabyin, shi a twitter ntsa hta, Ramma ni a ntsa myit mada lam kaba tawn da ai ngu mara da nga ai. Mungkan ting a shingran yup mang ni hpe hkrang shapraw ai hta Ramma ni madung garum sa wa lu na hpe myit mada ai rai nga ai.

  Wa Sarabyin Francis gaw Romma ni a ntsa kam myit kaba grai rawng ai wa rai nga ai. Ramma myit masin hte re ai Ramma ni gaw ra kadawn ai hta hkan nna teng man tara rap ra, maren mara re ai mungkan hpe gaw de sa wa lu ma ai. Matsan Mayan re ai ni hte ra kadawn ai ni hpe mung shanhte garum shingtau lu ma ai.

  Ramma ni a garum ai madi shadaw ai, shanhte a sharawng awng ai myit masin hte shang lawm ai rai yang anhte ni a mungkan shingran, myit mada lam hpe gaw de lu na rai ga ai. Ndai mungkan hta malu masha, hka, tsi mawan hte bungli bungsi ni law law nga nga ai. Ya Ya ra ahkyak ai ni, grau nna ra ahkyak taw ai ni kaw du lu hkra shanhte ni aten dep sa du garum lu ma ai, ngu tsun da nga ai, ngu United Nations International Youth Day shani Wa Sarabyin Francis shi a twitter hta shi a mu mada hkam sha lam hpe mara da nga ai.

  1999 shaning hta galaw ai General Assembly zuphpawng kaw nna galaw hpang ai UN’s International Youth Day zuphpawng, lamang ni hpe sam maram ai lam shaning shagu August 12 ya shani hta 2000 shaning kaw nna galaw hpang wa ai re lam mung chye lu ai.

  2021 shaning na ga baw (theme) gaw “Thransforming Food Systems: Youth Innovation for Human and Planetary Health,” “Malu Masha Shabyin Ai Ladat Ni: Hkam Ja Lam Ni Hte Shinggyim Masha Ni A Matu Ramma Ni Alak Mi Laklai Ai Hku Galaw Sa Wa Na,” ngu ai rai nga ai.

  UN Secretary-General Antonio Guterres mung, “Ramma ni gaw yawng a matu kaja grau ai shawng lam myit mada shara hpe gaw de ai hta shawng lam kaw shakut nga ai ni rai ma ai, ngu tsun da nga ai. Chyam bra ana tsin-yam hkrum sha nga ai aten ni hta Ramma ni gaw dai chyam bra ana Covid-19 hpe ninghkap ai hta mung ahkyak dik ai hku prat hpe ap nawng shang lawm nga ma ai, ngu mung Guterres matut tsun da nga ai.

Catholic Church’s World Yout Day

  Kahtawlik Nawku Hpung a shaning shagu na “Mungkan Kahtawlik Ramma Nhtoi” hpe shaning shagu “Kungla shaman Poi” nhtoi (Palm Sunday) shani Mungkan shara shagu, Saradaw Ginwang Madang hku galaw nga ga ai. Ndai gaw Wa Sarabyin Yawhan Pawlu II woi hpang masat da ai lamang rai nga ai.

  Madu Yesu wudang ntsa si hkam ai 1950 ning hpring ladu hkrum masat dingsat nhtoi hpe galaw na matu 1983/4 shaning hta kam sham ai hpung masha ni Roma de sadu hpawng de lamang galaw na matu Wa Sarabyin Yawhan Pawlu II saw shaga ai hte maren, 1984 shaning, Mungkan shara shagu na Ramma seng masum (300,00) lahta de re ai ni sa du hpwng de nna Roma mare, Vatican na San Peter Pa hta “International Jubilee of Youth Day” hpe Kungla shaman poi laban nhtoi hta galaw lai wa sai. Hpang shaning, 1985 hpe “International Year of Youth” shaning ngu UN kawn shaning masat dat ya sai. Ndai zawn Mungkan Ramma ni hte seng ai lamang ni byin tai wa ai gaw Roma mare, Vatican kaw zuphpawng woi ai a akyu ara rai nga ai. Dai shaning hta mung mungkan shara shagu na Ramma, seng lahkawng mun manga (250,000) lahta de re ai ni Wa Sarabyin saw shaga ai hte maren, Vatican kaw shi hpe sa hkrum lai wa ai.

  Dai shani, 1985, December 20 ya shani, Wa Sarabyin Yawhan Pawlu II, “Mungkan Kahtawlik Ramma Nhtoi” hpe  galaw na matu ndau dat sai. Shawng na lang, Masat. (1) lang ngu na “World Youth Day (WYD), “Mungkan Ramma Nhtoi” hpe 1986 hta galaw hpang lu sai.

  Shaning shagu Kungla Shaman Poi laban hta Mungkan Ramma Nhtoi lamang hpe galaw nga ga ai hta lai nna, masum ning hpring yang kalang, Wa Sarabyin lata masat ai mungdan shara hta Mungkan Ramma ni zuphpawng nna “Mungkan Madang Ramma Hpawng” hpe Wa Sarabyin hte rau galaw ga ai rai nga ai. Dai lamang hpe hpang jahtum galaw da ai shaning gaw 2019 January shata hta rai nna, Panama Mungdan, Panama mare kaba hta galaw ai rai nga ai.

  Ya kalang bai galaw ang ai Mungdan gaw Portuguese mungdan hta rai nna, chyam bra ana Covid-19 tsin-yam a majaw 2021 shaning hta galaw na dai lamang hpe 2023, August Shata hta galaw na matu nhtoi bai sit da sai rai nga ai.

Source: Vatican News

By Fr. Patrick Gawmaw Hkawng Yae

#vaticannews

#rvakachinservice