Wa Sarabyin: Madu Yesu Hte Rau Rai Yang Prat Nnan Shagu Hta Byin Mai Ai Lam Chyu Sha Nga Ai

Wa Sarabyin: Madu Yesu Hte Rau Rai Yang Prat Nnan Shagu Hta Byin Mai Ai Lam Chyu Sha Nga Ai

April 3, laban shani, Malta kaw Missa Hkungga woi awn ai hta, Madu Yesu hte rau rai yang gaw, n bung ai prat nnan shagu hta raitim, byin mai ai lam nga nga ai, ngu Wa Sarabyin Francis, mungga hkaw tsun da nga ai.

Wa Sarabyin Francis gaw, shi a 36 lang ngu na maigan mungdan de sa du kawan ai Apostolic Visit, gaw Malta kaw rai nna, laban Missa Hkungga hpe mung woi awn la ai rai nga ai.

Mungga hpe, dai shani hti ang ai Kabu Gara Shiga hpe lakap nna hkaw tsun da ai. Masha la hte shut hpyit ai majaw chyum laika sara ni hte Pharisee ni mara hta mara shagun let Yesu hpe mahkam hkam ai lam rai nga ai.

Shanhte gaw dai myu shayi sha hpe mara shagun ai ngu ai hta, Yesu Madu hpe mahkam hkam na madung yaw shada nna ga san san ai rai ma ai.

Kaga masha ni hpe lata layun madi mara shagun ai n hkru ai hypocrisy ladat lang ai ni hpe Wa Sarabyin shadi jaw da ai. “Anhte ni a masin salum hpe teng man Madu a matu hpaw malang da ga ai rai yang, Yesu madu anhte hta mau hpa magam hpe galaw shapraw dan na ra ai”.

Hypocrisy ladat gaw kaga masha ni hpe mara shagun, jeyang ai ladat rai nga ai. Dai majaw, Wa Sarabyin Francis, kam sham ai hpung masha ni dai ladat hpe n jai lang na matu shadum da ai. Anhte gaw anhte hkum hpe anhte dinglik sagawn yu la ra ai.

Nkau ni gaw shanhte hkum hpe shanhte matsan dum lama ai ni ngu hkam la ma ai raitim, teng man myit masin salum n rawng ma ai, ngu mung shadum da ai.

Anhte galai shai ra ai lam ni a matu Madu Yesu kaw garum hpyi galai shai sa wa ga. Akyu hpyi ai gaw kaja ai; raitim, teng man tsaw ra myit madun ai hta mung tatut galaw sa wa ra ai.

Madu e, ngai nang kaw nga nga nngai, ngai a ntsa hpa galaw na ra nta, ngu Madu Yesu hpe san la ga. Hpa hpe gara hku galai shai sa wa na myit ra nta, ngu san la ga. Kaga masha ni hpe gara hku hku hkau tsun shaga kanawn mazum ra ai hpe mung sharin ya rit, ngu Madu Yesu kaw hpyi ga, nga nna Wa Sarabyin, anhte hpe saw shaga da nga ai.

Karai Kasang gaw anhte a ntsa kam myit kaba tawn da ai. Mara dat hkyam sa lam gaw dai shani hti ang ai kabu gara shiga hta na mara lu ai num sha a prat hpe galai shai shangun ai. Anhte hpe mung dai hte maren, Karai Kasang mara dat hkyam sa ya nga ai rai nna, dai hpe sakse hkam sa wa na mung myit htum pu ba ngu n nga ai.

Madu gaw anhte a lapran mau hpa galaw na hpe ahkaw ahkang jaw ga. Madu a Kabu Gara Shiga hpe kabu gara let hkap hkam la ga, ngu hpang jahtum n-gun jaw da let Wa Sarabyin shi a mungga hpe ginchyum dat shangut da ai.

Wa Sarabyin Francis gaw Malta de April 2, bat kru ya shani sa du hpang ai rai nga ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-04/pope-francis-mass-malta-homily-floriana.html