Wa Sarabyin: Lachyum N Pru, Akyu N Rawng, N Hkru Ai Ukraine Majan Hpe Jahkring Na Matu Hpyi Shawn

February 22, Wanwu Chya ai bat masum ya shani, Lusha Gam Law shang ai shani, Hpung Shawa Masha ni hte hkrum shaga ai lamang hta, Wa Sarabyin Francis, Ukraine majan hpe jahkring na matu akroi anoi hpyi shawn da nga ai.

Wa Sarabyin a myit gaw majan tsin-yam hkrum ai mung shawa masha ni kaw bai du bai du rai nga ai gaw shaning tup rai lai wa sai lam tsun hpaw tsun da ai.

February 24 ya shani gaw Ukraine majan hpaw hpang ai laning mi hpring sana lam, dai gaw lachyum n pru, akyu n rawng, n hkru ai majan hpaw hpang ai lam rai nga ai, nga nna mung Wa Sarabyin myit n pyaw let tsun shadum da ai.

Si hkrung si htan lam shabyin ai, hkala machyi hkra ai lam shabyin ai, hpyen yen yen ra ai lam shabyin ai, kau da hkrum ai ni nga wa shangun ai, shingtai hkam sha ai ni nga wa shangun ai, hten za ai lam ni shabyin ai, shut masa hkra sum shangun ai, shinggyim bawngring lam hkrat sum shangun ai; dai hkrat sum lam hte seng na sha shabyin ai.

Madu Karai Kasang gaw ndai zawn re ai gumshen ai lam shabyin ai ni hte n hkru ai lam ni hpe shabyin ai ni hpe mara raw ya u ga, Shi gaw simsa lam a Madu rai nga ai, nga nna Wa Sarabyin Francis masa lam hpe tsun shadum shadi jaw let Karai Kasang kaw mung akyu hpyi da ya nga ai.

Gumshen ai ni hte n hkru ai ni myit malai lu galai shai wa mu ga matu mung akyu hpyi da ya ai.

Maibyin ai mahkrun lam, masa lam hte majan hpe jahkring lu hkra jahkring da hpe mung hpyi shawn da ai.

Dai shani, Ukraine masha ni a hkam sha machyi ai hpe lachyim shalen ai wudang hpe mung Wa Sarabyin Francis hkap la lu ai lam chye lu ai.

Dai wudang hpe Wa Jau Vyacheslave Grynevych, Secretary General of Caritas Spes-Ukrine, hkum nan sa ap jaw ai re lam chye lu ai.

Dai wudang gaw Russia ni majan hpaw hpang ai shani, Kyiv mare kaba kaw gap kapaw ya ai amawk kaw lawm ai chyamna, (pat) adaw achyen ni hte galaw da ai re lam chye lu ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2023-02/pope-francis-prays-for-war-torn-ukraine.html

https://www.vaticannews.va/en/pope/news/2023-02/pope-cross-glass-missiles-symbolising-pain-ukrainian-people.html